Jesusajj chhaqat ovejata, chhaqat dracma qollqet parläna ukhajja, Pereankpachänwa, Jordán Jawirat inti jalsu toqena. Mä juchachasirejj arrepentisisin Diosan markapar kuttʼanini ukhajja, jiwasajj kusisiñasawa ukwa uka pä uñachtʼäwinakajj yatichistu. Ukampis fariseonakasa escribanakasa, Jesusajj arrepentisir jaqenakar katoqatapatwa jupa contra parlapjjäna. Jesusajj parlkäna uk pä uñachtʼäwinakampejj ¿kunsa yatichañ munäna uk amuyapjjpachänti? ¿Kunjamsa Jehová Diosajj arrepentisir jaqenakarojj uñji uk amuyapjjpachänti? Jesusajj yaqha uñachtʼäwitwa parlarakïna, maynejj juchanakapat arrepentisi ukhajj kunatsa kusisiñasa ukwa qhanstayarakïna.

Uka uñachtʼäwinjja pä yoqani mä awkitwa parläna, jilpachjja sullkïri yoqatwa parläna. Fariseonakasa escribanakasa Jesusar istʼapkäna uka jaqenakasa kunsa sullka yoqat yateqapjjaspa uk amuytʼapjjañapänwa. Maysa toqetjja, kunsa awkimpita jilïr yoqampita yateqapjjaspa uksa amuytʼapjjañaparakïnwa. Mä arunjja, Awkisa, jilïr yoqasa kunjam chuymanïpjjänsa ukwa amuyapjjañapäna. Ukhamasti Jesusajj parlkäna uka kimsa jaqenakat kunsa yateqsna uk amuytʼañäni.

Jesusasti sänwa: “Pä yoqani mä jaqew utjäna. Sullkïrejj akham sasaw awkipar säna: ‘Awkiy, kunatï utjirinakamat nayar waktʼkitu ukay churjjeta’ sasa. Ukatwa awkejj utjirinakap jupanakar jalanoqjjäna” (Lucas 15:11, 12). Sullkïr yoqajja, janiw awkipan jiwatap layku herencia maykänti, awkipajj jakaskänwa. Antisas utat sarjjasin amtapar sarnaqañ munasaw uka horasan herenciap mayïna. ¿Kunjam sarnaqañsa munpachäna?

Jesusajj sänwa: “Mä qhawqha urunak qhepatjja, sullkïr yoqajj taqe utjirinakap apthapisaw jaya markar sarjjäna. Ukatsti jan wal sarnaqasaw uka markanjj utjirinakap tukjasïna” sasa (Lucas 15:13). Awkejj wawanakaparojj wal munasïna, kunatï wakiski ukwa churarakïna. Ukhamäkchïnsa, uka sullkïr yoqajj yaqha markaruw sarjjäna. Ukanwa warminakampi qʼañu  juchanakan sarnaqasajj herenciap tukjasïna. Ukatjja, uka markarojj jan wali tiempow purïna sasaw Jesusajj qhanañchaskakïna.

Jupajj sänwa: “Qʼal tukjasjjäna ukhajja, manqʼat pistʼañ machʼaw uka markan taqe cheqanakan utjarakïna, jupajj jan kunaniw uñjasïna. Ukatwa uka markankir mä jaqen ukar saräna, jupampiw katoqayasirakïna. Uka jaqesti khuchinak awatiriw oraqepar khitäna. Ukatsti khuchinakajj manqʼapki uka thajjonakampiw jupajj wal sistʼasiñ munäna, janiw khitis juparojj kuns churkänti” sasa (Lucas 15:14-16).

Diosan Leyiparjamajja, khuchinakajj qʼañu animalat uñjatänwa, uka waynajj khuchinak awatisaw trabajïna. Jupajj wal manqʼat awtjayasïna, ukatwa kuntï khuchinakajj manqʼapkäna uk manqʼañ munäna, animalanakakiw uk manqʼapjjäna. Ukham jan walin uñjasisaw amuytatasïna. Ukat ¿kunsa luräna? Jupajj sänwa: “¡Awkijan trabajirinakapajj walja tʼantʼanïsipkiwa, nayajj manqʼatjamaw akan jiwaskta! Ukhamajj jichhpachaw awkijan ukar sarjjä, juparojj sarakïwa: ‘Awkiy, Dios contra ukhamarak juma contraw juchachasta. Wawamätwa sañatakis janiw walïkti. Ukhamajj jumatak trabajir jaqëkiristsa ukhamak katoqasjjeta’ sasa”. Ukhamasti awkipan ukaruw sarjjäna (Lucas 15:17-20).

¿Awkipajj wawapar uñjasajj kamachpachänsa? ¿Jan amuytʼasis utat sarjjatapat wawapar toqenoqpachänti? ¿Janit sum katoqkpachäna, jan ukajj janit wawapar yäqkpachäna? Juman wawamaspäna ukhajja, ¿kamachasmänsa?

Wawapar uñjasajja, kunjamsa awkejj jikjjatasïna, kunsa lurarakïna ukwa akham sasin Jesusajj qhanañchäna: “Awkipasti jayankkipanwa jupar uñjarakïna, walpun uka wawapat sinttʼasïna. Ukatwa jupamp jikisirejj tʼijüna. Wali munasiñampiw qhomantäna, jampʼattʼarakïna” sasa (Lucas 15:20). Kuna jan walinaksa yoqapajj luräna uk awkipajj yatkchïnsa, wawaparojj sum katoqtʼäna. Ukampis judío religionan pʼeqtʼirinakajja, ‘Diosarojj uñtʼapjjtwa juparuw adorapjjarakta’ sasaw sapjjäna. Ukhamajj mä jucharar jaqejj arrepentisïna ukhajja, ¿kunjamsa Jehová Diosajj jikjjatasi uk amuyapjjpachänti? Jesusajj Awkipjam wali munasiñampiw jaqenakar katoqäna ¿uk amuyapjjpachänti?

Uka awkejj wawapan arrepentisitap amuyänwa. Jayankkipanwa wawapar katoqerejj saräna, ukatwa juchanakapat awkipar arsusiñajj wawapatakejj jan añcha chʼamäkänti. Jesusajj sänwa: “Ukatsti akham sasaw awkipar säna: ‘Awkiy, Dios contra ukhamarak juma contraw juchachasta. Wawamätwa sañatakis janiw walïkti’ sasa” (Lucas 15:21).

Awkisti akham sasaw esclavonakapar säna: “Jankʼak mä suma isi apsunipjjam, sumäkis ukpun aptanipjjäta, ukampirak isthapiyapjjam, amparaparus mä anillomp uchapjjam, kayunakaparus wiskhump uchapjjarakim. Mä likʼi torillo jiktanisin kharsupjjam, manqʼapjjañäni fiestachapjjañäni. Aka wawajajj jiwatänwa, jichhajj jaktanjjewa; chhaqatänwa, jichhajj kuttʼanjjewa” sasa. Ukatsti “jupanakajj kusisiñ qalltapjjäna” (Lucas 15:22-24).

Ukañkamasti jilïr yoqapajj yapunkaskänwa. Jesusajj jupat akham sänwa: “Utar kuttʼasin niya jakʼachasjjäna ukhajja, music tukaskiri, thoqoskir istʼäna. Ukatwa jupajj servirinakat maynir jawsäna, kamacharaki sasaw jisktʼäna. Jupasti sarakïnwa: ‘Jilamaw kuttʼanjjatayna, walikiw purinjje, ukatwa awkimajj mä likʼi torillo kharsurapi’ sasa. Jupasti walpun colertʼasïna, janirakiw mantañs munkänti. Ukatwa awkipajj  mistunisin jupar wal ruwtʼäna. Jupasti awkiparojj sänwa: ‘Nayajj walja maranakaw mä esclavjam jumatak trabajta, janirakiw ni mä kutis arunakam pʼakintkti. Ukampis janiw jumajj amigonakajampi kusistʼañajatakejj ni mä cabritoksa churkistati. Ukhamarus aka yoqamajj prostituta warminakampi sarnaqasaw utjirinakam tukjani. Ukat purin ukspachaw jumajj mä likʼi torillo kharsuraptajja’ sasa” (Lucas 15:25-30).

Jesusajj humilde jaqenakarusa jucharar jaqenakarusa khuyaptʼayänwa, munasiñampiw uñjarakïna, ukampis ¿khitinakasa uka jilïr yoqjamajj jupa contra parlapjjäna? Escribanakampi fariseonakampiw ukham parlapjjäna. Jucharar jaqenakaru sum katoqatapatwa Jesusar juchañchapjjäna, ukatwa Jesusajj uka uñachtʼäwit parläna. Khitinakatï Diosan khuyapayasiñap contra parlapki ukanakajja, Jesusan yatichäwipat yateqapjjañapawa.

Jesusajja uka uñachtʼäwit parlañ tukuyañatakejja, awkejj jilïr yoqapar kamsänsa ukwa akham säna: “Munat wawa, jumajj nayamp chikäskapuntawa, taqe kunanakatï nayan utjkitu ukanakas jumankarakiwa. Ukhamarus fiestachañas kusisiñas wakisiwa, aka jilamajj jiwatänwa, jichhajj jaktanjjewa; chhaqatänwa, jichhajj kuttʼanjjewa” sasa (Lucas 15:31, 32).

Kunsa uka jaqen jilïr yoqapajj luräna ukjja, janiw Jesusajj qhanañchkänti. Ukampis Jesusajj jiwayatäsin jaktayatäkäna uka qhepatjja, “walja sacerdotenakaw creyentëjjapjjarakïna” (Hechos 6:7). Jupanakat yaqhepajja, inas Jesusajj herencia tukuntir waynat parlkäna uka uñachtʼäwi istʼapjjchïna. Jupanakajja inas sum amuytatasin juchanakapat arrepentisipjjchïna, Diosarus kuttʼanjjapjjchïna.

Uka urut aksaruw Jesusan discipulonakapajj kunsa herencia tukuntir waynat yateqapjjaspa uk sum amuytʼapjjañapäna. ¿Kunsa yateqsna? Maya, Diosajj markap taypinjja munasiñampiw sum uñjistu, kunatï wakiski ukwa churarakistu, ukhamajj janipuniw markapat jitheqtañasäkiti, janirakiw akapachan jan wali munañanakapampejj apayasiñasäkiti, ukhamatwa amuyumpi sarnaqatas uñachtʼayañäni.

Paya, jiwasatï Diosan markapat jitheqtañäni ukhajja, humilde chuymampiw Jehová Dios Awkisan ukar kuttʼanjjañasa, ukhamatwa mayamp jupar jakʼachasjjañäni.

Kimsa, awkejj perdonasiri katoqtʼasiri chuymanïnwa, ukampis jilïr yoqajj awkipat sipansa colerasïnwa, chuymapsa wal usuyasïna. Jiwasajj Diosan servirinakapjamajj perdonasirïñasawa, taqe chuyma arrepentisis Awkin utapar kuttʼanipjje ukanakarus sumwa katoqtʼañasa. ‘Jiwatäkasin jaktanjjapjje; chhaqatäkäsin kuttʼanjjapjje’ uka jilat kullakanakasampejj kusisipjjañasawa.