Nunga dipaboa Jesus taringot tu biru-biru na mago dohot hepeng logam na mago tingki di Perea ibana, di timur ni Sunge Jordan. Sarupa do parsiajaran sian dua tudosan i, ingkon marlas ni roha ma nian hita tingki muba sahalak pardosa. Alai muruk do halak Parise dohot siboto surat ala mardongan Jesus tu halak sisongon i. Diantusi nasida do lapatan ni tudosan na pinaboa ni Jesus i? Boi do diantusi nasida songon dia pangkilalaan ni Debata tu sahalak pardosa naung muba? Alani i, dipaboa Jesus ma tudosan na asing.

Di tudosan i, dipaboa ma taringot tu sahalak ama na adong dua anakna. Anakna siampudan i do na jotjot dihatai di tudosan i. Boi ma nian halak Parise, siboto surat, dohot angka na manangihon marsiajar sian anak siampudan i. Alai boi do muse nasida marsiajar sian ama dohot anak siangkangan na di tudosan i. Alani i, taparrohahon ma tudosan na pinaboa ni Jesus:

Didok Jesus ma, “Adong ma sahalak baoa nampuna dua anak. Didok sianggian ma tu bapakna, ‘Bapa, lehon ma arta parbagiananku.’ Dung i, dibagi bapakna ma artana tu anakna na dua i.” (Lukas 15:11, 12) Dipangido anak siampudan i do parbagiananna nang pe ndang mate dope bapakna. Diulahon ibana pe i, asa boi do ibana bebas mangulahon manang aha pe lomo ni rohana. Aha ma i?

Didok Jesus ma, “Dung manang na piga ari, dipapungu anak sianggian i ma sude artana jala borhat ma ibana tu luat na dao. Disi, dipasuda ma sude artana marhite mangoloi hisap-hisap ni dagingna.” (Lukas 15:13) Ndang olo ibana tading di jabu ni bapakna. Hape nunga diparade bapakna sude na porlu tu nasida. Laho ma ibana tu huta na dao. Disi ma ibana marsonang-sonang pasudahon parbagiananna. Jala diulahon ibana ma angka ulaon na rorang, dung i susa ma ibana. Didok Jesus ma muse:

 “Dung dipasuda ibana sude, masa ma haraparon di saluhut luat i jala marpogos ma ibana. Alani i, laho ma ibana jala gabe parkarejo ni halak na di luat i. Disuru ma ibana marmahan babi di ladang. Alani malena naeng allangonna ma indahan ni babi i. Ai ndang adong na mangalehon manang aha tu ibana.”​—Lukas 15:14-16.

Mangihuthon Patik ni Debata, binatang na ramun do babi. Alai gabe panjaga ni babi ma ujungna anak siampudan i. Alani malena naeng diallang ibana ma indahan ni babi i. Lungun ma rohana huhut manolsoli. Aha ma diulahon ibana? Didok ma di rohana, “Torop do parkarejo ni bapakku na marlobi-lobi sipanganonna, hape ahu dison naeng mate alani malena! Mulak nama ahu tu bapakku jala dohononku ma tu ibana, ‘Bapa, nunga mardosa ahu tu Debata dohot tu ho. Ndang tama be ahu dohonon anakmu. Bahen ma ahu parkarejom.’” Dung i laho ma ibana mulak tu bapakna.​—Lukas 15:17-20.

Boha do didok bapakna? Gabe muruk do ibana, manang disonggak do anakna i ala laho sian jabu? Olo do bapakna manjalo anakna i? Boha do molo masa songon i tu anakmu manang tu borumuna?

Dipaboa Jesus ma muse na diulahon bapakna, “Dao dope ibana, nunga diida bapakna ibana. Gabe asi ma roha ni bapakna i, marlojong ma ibana, dihaol jala diumma ma anakna i.” (Lukas 15:20) Tongtong do dijalo anakna i, nang pe nunga dibege bapakna taringot tu anakna pasuda-sudahon artana. Boi do diantusi pamimpin ni halak Jahudi parsiajaran sian tudosan on? Diboto nasida do na maniru Debata do Jesus?

Boi do diida bapakna na lungun roha ni anakna i jala na tutu ibana muba. Alai, ala olo ibana manjalo anakna i gabe lam mura ma anakna mangangkui dosana. Didok Jesus ma muse, “Dung i didok anakna i ma tu ibana, ‘Bapa, nunga mardosa ahu tu Debata dohot tu ho. Ndang tama be ahu dohonon anakmu.’”​—Lukas 15:21.

Didok bapakna ma tu angka hatobanna, “Pahatop! Buat jolo jubah na dumenggan jala pangkehon tu ibana. Bahen ma tintin dohot sipatuna. Buat ma lombu na ummokmok, seat ma i asa taallang jala marpesta hita. Ai nunga mate anakkon, alai mulak mangolu muse. Naung mago hian do ibana, alai nunga jumpang be.” Alani i, “marlas ni roha ma nasida”.​—Lukas 15:22-24.

Tingki i, di ladang dope anak siangkangan  i. Didok Jesus ma, “Dung mulak ibana jala nunga jonok tu jabu, dibege ma soara ni musik dohot soara ni na manortor. Dijou ibana ma sahalak sian hatoban i jala disungkun ma manang aha na masa. Didok hatoban i ma, ‘Nunga mulak anggim jala diseat amanta do sada lombu na mokmok ala sehat do ibana mulak.’ Alai gabe muruk ma ibana jala ndang olo masuk. Dung i kaluar ma bapakna jala dielek ma ibana. Alai didok ibana ma tu bapakna, ‘Nunga martaon-taon ahu gabe hatobanmu jala ndang hea hualo parentam, alai laos so hea do apala sahali dilehon ho anak  ni hambing panganonku dohot angka donganku. Alai disi mulak anakmi naung pasudahon artam rap dohot angka boru-boru na so hasea, diseat ho do lombu na mokmok di ibana.’”​—Lukas 15:25-30.

Ise do na songon anak siangkangan i, na so lomo rohana ala marasi ni roha Jesus tu angka pardosa? Siboto surat dohot angka halak Parise, jala alani i do dibahen tudosan on. Jadi, manang ise na so lomo rohana molo marasi ni roha Debata tu angka pardosa, ingkon marsiajar do sian tudosan on.

Dipaboa Jesus ma muse alus ni bapakna i tu anak siangkanganna i, “Ale anakku, tongtong do ho rap dohot ahu. Sude ampunakki, ampunam do i. Alai ingkon marpesta do hita jala marlas ni roha. Ai nunga mate anggimi, alai mulak mangolu muse. Naung mago hian do ibana, alai nunga jumpang be.”​—Lukas 15:31, 32.

Ndang dipaboa Jesus na diulahon anak siangkangan i. Alai dung mate Jesus jala dipahehe, “torop do angka malim na mangihuthon haporseaon i”. (Ulaon ni Apostel 6:7) Ra adong do sian nasida na mambege Jesus tingki paboahon tudosan on. Hona ma i tu roha ni nasida jala muba. Dung i marale-ale ma muse nasida tu Debata.

Sian tudosan i, adong parsiajaran na ringkot na ingkon ulahonon ni sisean ni Jesus. Parsiajaran na rumingkot, unang ma mandao hita sian Debata, na mangkaholongi hita jala na paradehon angka na porlu di hita. Unang ma talului hasonangan asing ni sian Debata.

Parsiajaran na asing, molo hea hita mandao sian Debata, ingkon toruk do rohanta asa boi marale-ale muse tu Ibana. Jala las ma roha ni Debata mangida hita.

Asing do na diulahon ama na di tudosan i tu anak siangkanganna i. Olo do bapakna manalpuhon hasalaan jala manjalo anak siampudanna i. Alai molo anak siangkanganna i ndang olo. Alani i, ingkon olo do naposo ni Debata manalpuhon hasalaan dohot manjalo angka dongan na muba jala mulak muse tu Debata. Las ma rohanta molo adong donganta na ‘mate alai mulak mangolu muse’ jala ‘naung mago hian alai nunga jumpang be’.