Iesu pala kö e Pere ezine la Hneopegejë Ioridrano, lo nyidrëti a hamëne la lue ceitun ne la mamoe ka patr, memine la pies ka patr. Ame la ini ne la lue ceitun tre, ene la troa kapa madrine la atre ka ietra me bëeke koi Akötresie. Hnene lo itre Faresaio me itretre cinyihan hna xöjetriji Iesu, pine nyidrë kapa la itre atr ka tun. Ngo hapeu, trotrohnine kö angatr la ini hna hamën jëne la lue ceitun? Trotrohnine kö angatr la aqane goeën Akötresie la itre atre ka ietra? Enehila, Iesu a hamëne la ketre ceitun, matre tro angatr a trotrohnine la aliene hni ne la Keme së e hnengödrai.

Kola qaja la kem me lue nekö i nyidrë. Ngöne la ceitune celë, troa qaja atrune la cipa. Tha tro kö a jol koi itre Faresaio, me itretre cinyihan, me itre xa atr e cili troa xomi ini qa ngöne la aqane ujë ne la cipa. Nge hetre ini mina fe qa ngöne la itre hnei Iesu hna qaja kowe la kem memine la haetra. Haawe, wange hnyawa ju la pengöne la köni atre celë. Öni Iesu:

“Hanawange la keme ka lue kuku trahmany. Önine jë hi la cipa koi nyidrë ka hape, ‘Kaka, hamë ni pi la edrö hna hnëkëne thatraqai ni.’ Ame hnei nyidrëti hna isa thawa pi la itre ewekë i nyidrë kowe la lue nekö i nyidrë.” (Luka 15:11, 12) Tha kolo kö a sipo edrö ke meci hë la kem. Mele pala kö nyidrë, ngo aja ne la cipa troa xome la edrö enehila, matre tro angeic a mele cas, me kuci mekun. Matre nemene ju hë la ewekë ka traqa?

“Itre drai thupene lai, hnene la cipa hna xawan asë la itre ewekë i angeic me tro gaa nany. Nge e cili, hnei angeic hna aluzine la edrö i angeic hnene la hna mele menu.” (Luka 15:13) Tha hnei angeic kö hna lapa hnalapa. Ngo hnei angeice pe hna trotrije la ketre kem ka tru ihnimin nge ka thupë angeic, me tro gaa nany. Angeic aluzin asë jë la mani angeic troa nyinyape thele la itre aja ka sis. Ngo hna traqa la jol. Öni Iesu:

 “Nge ase jë hi angeic aluzin asë la edrö i angeic, traqa pi hi la jiin atraqatr ngöne la nöje cili, ame hnei angeic hna nyiqaane drei mecijiin. Angeic a thele huliwa jë thene la ketre atre ne la nöj. Matre upi angeice jë hi troa ithue a i puaka. Nge goi pi xeni fe angeice la a i puaka, ngo pëkö ka pi thue a i angeic.”—Luka 15:14-16.

Thenge la Trenge Wathebo i Akötresie, ame la itre puaka, tre itre öni ka sis. Ngo enehila, huliwa ne la cipa troa thuane la itre öni cili. Nge pine laka meci hë angeic hnei pi xen, goi pi xeni fe angeic la itre a i öni. Nge nyipine la jol, mama cile pi hi koi angeic “la aqane menu i angeic.” Matre nemene ju hë? Öni angeic: “Ala nyimu la itre hlue i kaka, nge mana la xeni thei angatr, ngo eni pe hi la a mecijiin! Tro ni a mejë me bëeke hmaca koi kaka me hape: “Kaka, ase hë ni menu qëmekene la hnengödrai, me qëmeke i nyipë. Nge tha ijijinge hmaca kö troa ketre nekö i nyipë. Matre xomi ni jë pe hi nyine hlue i nyipë.’ ” Matre angeic a mejë jë, me bëeke koi Kem.—Luka 15:17-20.

Tro la keme i angeic a u? Tro kö nyidrë a elëhni me wesitrë angeic pine kuci mekun me trotrije la hnalapa? Tro kö la kem a tha nyipiewekë angeic, me xele ma kepe angeic? Nge maine eö ju, tro eö a u? Nge maine nekö i eö ju, tro eö lai a u?

Iesu a qaja jë la aqane ujë ne la kem memine la aliene hni i nyidrë. Öni Iesu: “Angeice pala kö e gaa nany, nge öhnyi angeice ju hi hnei kem. Ame hnei nyidrëti hna utipi angeic, me nyinyap, me haluthi angeic, me  dremi angeic.” (Luka 15:20) Ngacama, drenge hë kem la aqane mele menu ne la nekö i nyidrë, ngo madrine nyidrë troa kepe angeic. Matre hapeu, tro kö itre hene ne hmi ka selëne ka hape, atre Akötresie angatr, a trotrohnine la aqane ujë i nyidrë koi itre ka ietra? Nge tro kö angatr a trotrohnine laka, Iesu a nyitipu Akötresie?

Öhne hi Kem la aqane ietra ne la nekö i nyidrë, ke kola thipe la alameke i nyën. Matre nyidrëti a canga nyinyape pi troa itronyi me nyën, nge ma celë hi ka upe la nekön troa fe la hni i nyën. Öni Iesu: “Önine la neköne kowe la keme ka hape, ‘Kaka, ase hë ni menu qëmekene la hnengödrai, me qëmeke i nyipë. Nge tha ijijinge hmaca kö troa ketre nekö i nyipë.’ ”—Luka 15:21.

Matre kem a upe pi la itre hlu me hape: “Lolojë! Tro jë a xome la ketre iheetr ka qea, ene la ka mingöminge catr, nge heetrë nyëne ju, nge line jë la ketre otrene wanakoime koi nyën, nge otrë butr i nyëne ju. Nge, traqa fë pi la ketre neköi kau ka giris, nge humuthe pi, matre ce xeni jë së me madrin, ke meci hë lo la nekönge celë, ngo mele hmaca ha; nge patre hë nyëne lo, ngo bëeke hmaca ha.” Ame hnei angatr hna “ce madrine ju.”—Luka 15:22-24.

Ngöne la ijine cili, kola huliwa la haetra ngöne la hlapa. Matre Iesu a qeje angeice jë me hape: “Ame ju hi la angeic a easenyine la hnalapa, drenge ju hi angeic la mejene miuzik me fiafia. Nge angeic a hëne jë la ketre hlu, me hnyingë pengön. Sa jë hi lai hlue ka hape, ‘Bëeke hmaca ha lo jini nyipë, matre hnene la keme i nyipë hna iupe troa humuthe la ketre neköi kau ka giris, ke bëeke hmaca ha lo jini nyipë, nge egöcatr angeic.’ Haawe, elëhni jë hi angeic e cili, matre xele ju hi angeic ma hane lö. Ame hna tro ju hnei kem troa wai angeic me iele angeic. Sa jë hi angeic koi  keme ka hape, ‘Hanawang! Hnenge pala hi hna nyi hlu koi nyipë ngöne la itre macatre, nge goi tha ase fe ni ena la ketre ewekë hna amekötine hnei nyipë, ngo ame pe, tha hane fe kö nyipëti nue koi ni la ca neköi mamoe, matre tro ni a ce madrin me itre sineeng. Nge xulu pi hi la nekö i nyipë celë, atre aluzine la edrö i angeic me itre föe ne gojeny, nge nyipëti a humu kau ka girisi koi angeic.’ ”—Luka 15:25-30.

Drei la ka tune la haetra? Drei la itre ka qeje Iesu pine nyidrë utipin me hnime la itre atr me itre ka kuca la ngazo? Itretre cinyihan me itre Faresaio. Iesu a hamëne la ceitune celë pine la aqane ujë i angatr. Ngo eje hi, ini lai koi nöjei atr asë ka qajangazone la aqane iutipi i Akötresie.

Iesu a nyipune jë la ceitun hnene la trengewekë i kem kowe la haetra. Öni nyidrë: “Neköng, ce eö pala hi me eni, nge ame asë hi la itre ewekëng, ke itre ewekë i hmunë fe. Ngo qa i nyiso pe troa ce feete madrin, ke meci hë lo jini hmunë, ngo mele hmaca ha nyën; nge patre hë nyëne lo, ngo bëeke hmaca ha.”—Luka 15:31, 32.

Tha hnei Iesu kö hna qaja la aqane ujë ne la haetra. Ngo ame pe, thupene la mec me mele hmaca i Iesu, “ala nyimu fe la itretre huuj ka hane lapaun.” (Itre Huliwa 6:7) Nge ma hetre itre xan thei angatr ka hane dreng la ceitun ne la nekönatr ka patr. Eje hi, ijiji angatre fe troa wangatrehmekune la aqane menu i angatr, me ietra, me hane bëeke koi Akötresie.

Qaane ju hi lai, nyipiewekë koi itretre dreng troa amë hutin e kuhu hni angatr la itre ini ne la ceitune celë. Ame la hnapan tre, tha tro kö a “tro gaa nany” matre nyinyape thel la itre aja ka sis, ngo loi pe troa lapa hnyawa ngöne la nöje i Akötresie, Keme së ka ihnim nge ka thupë së.

Hnaaluen: E traqa ju së jea qa ngöne la gojenyi Akötresie, loi e tro sa ipië me bëeke hmaca kowe la Keme së, matre kepe së hmaca jë.

Hnaakönin: Kola mama la eisapengönene la aqane ujë ne la kem ka iutipi me nue ngazo, memine la neköne haetra ka lapa fë trenge hni, nge ka tha ikep. Hnëqa ne la itre hlue i Akötresie troa nue ngazo, me ikep e kola ietra hnei ketre, me ‘bëeke kowe la hnalapa i kem.’ Loi e tro sa madrin, ke ‘mele hmaca ha’ lo trejine me easë ‘ka mec,’ nge ‘bëeke hë lo ka patr.’