Mohlomongwe ge Jesu a sa le Perea ka bohlabela bja Noka ya Jorodane, o ile a bolela ka seswantšho sa mabapi le nku e timetšego le sa mabapi le tšhelete ya tšhipi ya terakema yeo e timetšego. Diswantšho tše ka bobedi di ruta gore re swanetše go thaba ge modiradibe a itshola gomme a boela go Modimo. Bafarisei le bamangwalo ba be ba sola Jesu ka ge a amogela batho ba mohuta woo. Eupša na baswayadiphošo bao ba ithuta se sengwe diswantšhong tše pedi tša Jesu? Na ba kwešiša kamoo Tatago rena wa legodimong a ikwago ka gona ka badiradibe bao ba itsholago? Jesu bjale o bolela ka seswantšho se se kgomago pelo seo se gatelelago yona thuto ye e bohlokwa.

Seswantšho se se akaretša tate yo a nago le barwa ba babedi. Morwa yo monyenyane ke yena moanegwathwadi seswantšhong se. Bafarisei gotee le bamangwalo go akaretša le ba bangwe bao ba theeditšego ge Jesu a anega seswantšho se, ba swanetše go ithuta go seo se bolelwago ka morwa yo yo monyenyane. Lega go le bjalo, seo Jesu a se anegago ka tate le morwa yo mogolo ga se sa swanela go tšeelwa fase, ka baka la gore tsela yeo ba itshwarago ka yona le yona e a ruta. Ka gona nagana ka banna ba ba bararo ka moka ge Jesu a le gare a anega seswantšho se.

Jesu o thoma ka gore: “Monna yo mongwe o be a na le barwa ba babedi. Yo monyenyane go bona a re go tatagwe: ‘Tate, mphe karolo ya thoto yeo e welago kabelong ya ka.’ Ke moka a ba arolela thoto ya gagwe.” (Luka 15:11, 12) Ela hloko gore morwa yo yo monyenyane ga a nyake bohwa bja gagwe ka baka la gore tatagwe a hwile. Tatagwe o sa phela. Eupša morwa o nyaka karolo ya gagwe gona bjale e le gore a kgone go ipuša gomme a dire kamoo a ratago ka gona. Seo se bolela’ng?

Jesu o hlalosa ka gore: “Ka morago ge go fetile matšatši a sego kae, morwa yo monyenyane a kgoboketša dilo ka moka a tloga a ya nageng ya kgole gomme ge a le moo a gašanya thoto ya gagwe ka go phela bophelo bjo bo gobogilego.” (Luka 15:13) Go e na le gore a dule ga gabo moo a šireletšegilego, a na le tate yoo a hlokomelago bana ba gagwe, morwa yo o ya nageng e nngwe. Ge a le moo o gašanya bohwa bja gagwe ka moka ka go kgotsofatša dikganyogo tša gagwe ka tsela e gobogilego. Ke moka o tsena mathateng, ka ge Jesu a tšwela pele go anega a re:

“Ge a feditše dilo ka moka tšeo a bego a na le tšona, tlala e šoro ya wela naga yeo ka moka, a thoma go diila. O ile a ba a tloga, a gapeletša yo mongwe wa baagi ba naga yeo gore a mo thwale, yena a mo romela merakeng ya gagwe go yo diša dikolobe. O be a fela a duma go ja dijo tša dikolobe eupša go be go se yo a mo neago selo.”—Luka 15:14-16.

Go ya ka Molao wa Modimo, dikolobe e be e le diphoofolo tše di sa hlwekago; eupša morwa yo o swanetše go šoma e le modiši wa dikolobe. O bolawa ke tlala, e lego seo se mo dirago gore a nyake go ja seo ka tlwaelo e lego dijo tša diphoofolo, tšona dikolobe tšeo a di dišago. Ge morwa yoo a dutše a le mathateng e bile a tlaletšwe, “a thoma go hlaphogelwa.” O dira’ng? O ipotša a re: “Bathwalwa ba tate bao ba patlwago ke senkgwa ke ba bantši gakaakang, mola nna ke bolawa ke tlala mo! Ke tla tsoga ka ya go tate ka re go yena: ‘Tate, ke senyeditše legodimo le wena. Ga ke sa swanelwa ke go bitšwa morwa wa gago. Ntire yo mongwe wa bathwalwa ba gago.’” Ka gona o a tsoga o ya go tatagwe.—Luka 15:17-20.

Tatagwe o tla arabela bjang? Na o tla retologela go morwa’gwe a galefile gomme a mo omanyetša bošilo bja gore o ile a tloga gae? Na tatagwe o tla mo swara ka tsela ya go mo tšeela fase le ya go se mo amogele? Ge nkabe e be e le wena, o be o tla arabela bjang? Go thwe’ng ge nkabe e be e le morwa goba morwedi wa gago?

Jesu o hlalosa kamoo tate a ikwago le go itshwara ka gona ge a re: “Eitše ge [morwa] a sa le kgole tatagwe a mmona gomme a mo šokela, a mo kitimela a mo gokarela a mo atla ka lerato.” (Luka 15:20) Gaešita le ge tate a ile a kwa ka bophelo bja morwa’gwe bjo bo gobogilego, o amogela morwa’gwe gape. Na baetapele ba Bajuda, bao ba ipolelago gore ba tseba Jehofa le go mo rapela, ba tla bona kamoo Tatago rena wa legodimong a ikwago ka gona ka badiradibe bao ba itsholago? Na ba tla lemoga le gore Jesu o be a dutše a bontšha moya o swanago wa go amogela ba bangwe?

Tate yo a nago le temogo a ka phetha ka go bona sefahlego sa morwa’gwe se se nyamilego gore o a itshola. Lega go le bjalo, go gata ga tate mogato wa pele ka lerato gore a yo dumediša morwa wa gagwe go nolofaletša morwa gore a ipobole dibe. Jesu o anega ka gore: “Ke moka morwa a re go yena: ‘Tate, ke senyeditše legodimo le wena. Ga ke sa swanelwa ke go bitšwa morwa wa gago.’”—Luka 15:21.

Tate o laela bahlanka ba gagwe o re: “Akgofang le tliše seaparo se setelele se se di phalago tšohle le mo apeše sona, le mo rweše palamonwana seatleng sa gagwe le diramphašane dinaong tša gagwe. Le tlišeng le powana e nontšhitšwego, le e hlabeng gomme re je re ipshine, gobane morwa yo wa ka o be a hwile gomme o boetše o a phela; o be a timetše gomme o hweditšwe.” Ke moka “ba thoma go ipshina.”—Luka 15:22-24.

Ka nako yeo, morwa yo mogolo wa tate yo o be a le mašemong. Jesu o bolela ka yena o re: “Ge a etla a batametše ntlong, a kwa mmino le dikoša. Ke moka a bitša yo mongwe wa bahlanka a mmotšiša gore go direga eng. A re go yena: ‘Ngwaneno o tlile gomme tatago o hlabile powana e nontšhitšwego, gobane o mo hweditše a sa phetše gabotse.’ Eupša a galefa a se rate go tsena. Ke moka tatagwe a tla, a mo rapeletša. Ge a fetola a re go tatagwe: ‘Ke feditše nywaga e mentši kudu ke go hlankela gomme le ka mohla ga se ka ka ka tshela taelo ya gago, fela le ka mohla ga se wa ka wa mpha putšanyana gore ke ipshine le bagwera ba ka. Eupša gateetee ge morwa yo wa gago  yo a gašagantšego thoto ya gago le bagweba-ka-mmele a fihla, o mo hlabetše powana e nontšhitšwego.’”—Luka 15:25-30.

Ke bomang bao, go swana le morwa yo mogolo, ba bego ba dutše ba sola kgaugelo le tlhokomelo tšeo Jesu a bego a di nea batho feela gotee le badiradibe? Ke bamangwalo le Bafarisei. Go sola ga bona Jesu ge a amogela badiradibe ke gona go dirilego gore a bolele ka seswantšho se. Ke therešo gore yo mongwe le yo mongwe yo a solago ge Modimo a gaugela ba bangwe o swanetše go naganišiša ka thuto ye.

Jesu o phetha seswantšho sa gagwe ka go bolela ka boipiletšo bja tate go morwa wa gagwe, ge a re: “Ngwanaka, o bile le nna ka mehla gomme dilo ka moka tšeo e lego tša ka, ke tša gago, eupša re swanetše go ipshina le go thaba gobane ngwaneno o be a hwile gomme o boetše o a phela, o be a timetše gomme a hwetšwa.”—Luka 15:31, 32.

Jesu ga a utolle seo morwa yo mogolo a feleletšago a se dirile. Lega go le bjalo, ka morago ga lehu la Jesu le tsogo ya gagwe, “lešaba le legolo la baperisita [le ile] la ikokobeletša tumelo.” (Ditiro 6:7) Lešaba leo le ka ba le be le akaretša ba bangwe ba bao ba kwelego ge Jesu a be a anega taba ya seswantšho se se matla sa mabapi le morwa yo a bego a timetše. Ee, go ile gwa kgonega gore le bona ba hlaphogelwe, ba itshole gomme ba boele go Modimo.

Go tloga letšatšing leo go ya pele, barutiwa ba Jesu ba ka kgona e bile ba swanetše go ela hloko dithuto tše bohlokwa tšeo a di tšweleditšego seswantšhong se seo se kgahlišago. Thuto ya mathomo ke ya kamoo go tlogago go le bohlokwa go dula tšhireletšegong ya batho ba Modimo, ka tlase ga tlhokomelo ya Tatago rena yo a re ratago le go re hlokomela, go e na le go kitimiša maipshino ao a goketšago “nageng ya kgole.”

Thuto e nngwe ke gore ge e ba yo mongwe wa rena a ka aroga tseleng ya Modimo, o swanetše go ikokobetša gomme a boele go Tatago rena e le gore a buše a mo amogele.

Thuto e nngwe gape e ka bontšhwa ke phapano yeo e lego gona magareng ga moya wa tate wa go amogela ba bangwe le wa go lebalela le moya wa morwa yo mogolo wa go se lebalele le wa go se amogele ba bangwe. Go molaleng gore bahlanka ba Modimo ba swanetše go lebalela le go amogela ba bangwe ge e ba motho yo a bego a arogile a itshola e le ka kgonthe gomme a boela ‘ntlong ya Tate.’ Anke re thabeleng gore ngwanabo rena yo ‘a bego a hwile o boetše o a phela’ le gore yo ‘a bego a timetše o hweditšwe.’