E au ra e ua horoa Iesu i na faahohoˈaraa o te mamoe i moˈe na e te moni ario i moˈe na i Perea i te pae hitia o te râ o te anavai Ioridana. Te manaˈo faufaa e haapii mai, ia oaoa ïa tatou ua tatarahapa anaˈe te hoê taata rave hara a hoˈi mai ai i te Atua. Ua faahapa te mau Pharisea e papai parau ia Iesu tei farii maitai i tera huru taata. Ua taa anei râ ia ratou te haapiiraa a Iesu i roto i na faahohoˈaraa? Ua taa anei ia ratou te huru aau o to tatou Metua i te raˈi no te feia rave hara tei tatarahapa? Horoa ˈtura Iesu i te hoê faahohoˈaraa putapû o te haapapu i teie â haapiiraa faufaa.

O te hoê ïa metua tane e ta ˈna e piti tamaiti, no te teina na mua teie aamu. Mea ohie no te taata atoa e faaroo ra ia Iesu, oia atoa no te mau Pharisea e papai parau, ia huti i te haapiiraa i te aamu o teie teina. Mea faufaa atoa râ ta Iesu e faatia ra no te metua tane e te tamaiti matahiapo, e haapiiraa atoa hoi te huti mai i to raua huru. A manaˈo ïa i teie e toru tane a faatia ˈi Iesu i te faahohoˈaraa:

“E piti tamaiti ta te hoê taata. Parau maira te teina i to ˈna metua tane: ‘To ˈu metua, horoa mai na i ta ˈu tufaa.’ Tufa ihora te metua tane i ta ˈna mau faufaa mai tei au ia raua tataitahi.” (Luka 15:11, 12) A tapao na e aita te metua tane i pohe i ani ai te teina i ta ˈna tufaa. Te ora noa ra to ˈna metua. Ua hinaaro râ te teina i ta ˈna tufaa i tera iho taime no te faarue i te utuafare a faaohipa ˈtu ai i ta ˈna tufaa mai ta ˈna e hinaaro. Ua aha ˈtura oia?

Faataa ˈtura Iesu: “Tau mahana i muri iho, haaputu ihora te teina i ta ˈna mau mea atoa, reva ˈtura i te hoê fenua atea, e hue atura i ta ˈna faufaa i roto i te ohipa haapaoraa ore.” (Luka 15:13) Aita te teina i faaea i te fare i reira oia e paruruhia ˈi, i pihai iho i to ˈna metua tane o te aupuru ra e te faatamaa ra i ta ˈna na tamaiti. Reva ˈtura râ oia i te hoê fenua ê, e hue atura i ta ˈna tufaa no te haamâha i to ˈna mau hinaaro tia ore o te tino. Roohia ˈtura oia e te ati, mai ta Iesu i faatia:

“Pau roa aˈera ta ˈna faufaa, tupu ihora te oˈe  rahi i taua fenua ra, e poia roa aˈera oia. Haere roa ˈtura oia e rave i te ohipa na te hoê taata no reira, o tei faaue ia ˈna ia haere i to ˈna mau fenua e haapao i te nǎnǎ puaa. Hiaai atura oia i te maa ta te puaa e amu, aita râ e taata e horoa ˈtu i te maa na ˈna.”—Luka 15:14-16.

Aita ˈtu â e ravea ta te teina maori râ te haapaoraa i te nǎnǎ puaa, noa ˈtu e animara viivii teie ia au i te ture a te Atua ia Mose. Ua pohe poia roa o ˈna, a hiaai atu ai i te maa a te puaa ta ˈna e haapao ra. I roto i to ˈna ati e to ˈna hepohepo, “haamata ˈtura oia i te feruri maitai e na ô ihora: ‘Te tamaa maitai ra te mau rave ohipa e rave rahi a to ˈu metua tane, o vau nei râ, te pohe nei ïa i te poia i ǒ nei! E reva vau i ǒ to ˈu metua tane ra, a na ô atu ai: “To ˈu metua, ua hara vau i te Atua i te raˈi e ia oe. Eita e tano faahou ia parauhia vau ei tamaiti na oe. Faariro oe ia ˈu mai te hoê o ta oe mau rave ohipa.”’” Reva ˈtura oia i ǒ to ˈna metua tane ra.—Luka 15:17-20.

E nafea to ˈna metua ia ˈna? E riri anei oia i ta ˈna tamaiti a tamaˈi ai ia ˈna no to ˈna maamaa i te faarueraa i te fare na mua roa? E tâuˈa ore anei te metua tane ia ˈna, a ore atu ai e farii maitai ia ˈna? O oe aˈe teie, e nafea oe ahiri e tamaiti aore ra e tamahine na oe?

Faaite maira Iesu i te huru aau o te metua tane e ta ˈna i rave: “Tei te atea ê â [te tamaiti], ite maira to ˈna metua tane ia ˈna, aroha ihora, horo maira, tauahi maitai ihora ia ˈna e apa maira.” (Luka 15:20) Noa ˈtu ua faarooroo te metua tane e oraraa haapaoraa ore to ta ˈna tamaiti, ua farii maitai oia ia ˈna i te hoˈiraa mai. E te mau aratai ati Iuda o te parau ra e ua ite ratou ia Iehova e te tavini ra ratou ia ˈna? E taa anei ia ratou te huru aau o to tatou Metua i te raˈi no te feia rave hara tei tatarahapa? E taa atoa anei ia ratou e te pee ra Iesu i te huru o to ˈna Metua?

Ua ite te metua tane haroˈaroˈa i nia i te hohoˈa mata hepohepo o ta ˈna tamaiti e ua tatarahapa o ˈna. No te ru râ teie metua tane î i te here i te farii maitai i ta ˈna tamaiti, i faˈi roa mai ai te tamaiti i ta ˈna mau hara. Faatia ˈtura Iesu: “Na ô atura te tamaiti: ‘To ˈu metua, ua hara vau i te Atua i te raˈi e ia oe. Eita e tano faahou ia parauhia vau ei tamaiti na oe.’”—Luka 15:21.

Faaue atura te metua tane i ta ˈna mau tavini: “‘Haaviti, hopoi mai i te hoê ahu roa, te mea nehenehe roa ˈˈe, a faaahu ia ˈna, a oomo i te tapea i to ˈna rima e te tiaa i to ˈna avae. Putô atoa mai i te puaatoro oni apî poria e tupai atu. Tamaa e arearea anaˈe, i pohe na hoi ta ˈu tamaiti nei e ua ora faahou mai. I moˈe na oia e ua hoˈi mai.’ Arearea ˈtura ratou.”—Luka 15:22-24.

I tera taime, tei te faaapu te tamaiti matahiapo. Parau atura Iesu no ˈna: “I to ˈna . . . hoˈiraa mai e piriraa mai i te fare, faaroo ihora oia i te upaupa e te ori. Pii maira oia i te hoê tavini e ui maira eaha tera. Pahono atura te tavini: ‘Ua tae mai to teina, e ua tupai to metua tane i te puaatoro oni apî poria no te mea ua hoˈi mai oia e mea maitai o ˈna.’ Riri ihora râ oia e aita ˈtura i hinaaro e tomo i roto i te fare. Haere atura to ˈna metua tane i rapaeau e taparu ia ˈna ia tomo mai. Pahono maira oia i to ˈna metua tane: ‘Ahia ˈtura matahiti to ˈu taviniraa ia oe e haapao-noa-raa i ta oe i faaue mai. Aita roa ˈtu râ oe i  horoa mai i te hoê puaaniho apî ia tamaa vau e to ˈu mau hoa. I te taeraa mai iho â tena tamaiti ta oe, o tei hue i ta oe faufaa na te mau vahine taiata, tupai ihora ïa oe i te puaatoro oni apî poria no ˈna.’”—Luka 15:25-30.

O vai tei faahapa, mai te tamaiti matahiapo, i te aroha-hamani-maitai-raa e te tâuˈaraa Iesu i te feia riirii e te feia rave hara? Te mau papai parau e Pharisea. No to ratou faahaparaa ia Iesu tei farii maitai i te feia rave hara i horoahia ˈi teie faahohoˈaraa. Ia haamanaˈo maitai ïa te taata atoa o te faahapa ra i to te Atua aroha hamani maitai i teie haapiiraa.

No te faaoti i ta ˈna faahohoˈaraa, faatia ˈtura Iesu i te taparuraa te metua tane i ta ˈna tamaiti matahiapo: “Ta ˈu tamaiti, to pihai iho noa na oe ia ˈu, e ta ˈu mau taoˈa atoa, na oe ïa. E mea tia râ ia arearea e ia oaoa tatou, i pohe na hoi to teina e ua ora faahou mai. I moˈe na oia e ua hoˈi mai.”—Luka 15:31, 32.

Aita Iesu i faaite eaha ta te tamaiti matahiapo i rave i muri iho. I muri aˈe râ i to Iesu poheraa e tia-faahou-raa, “e rave rahi atoa tahuˈa tei tiaturi.” (Ohipa 6:7) Ua faaroo atoa paha vetahi ia Iesu i te faatiaraa i teie faahohoˈaraa putapû. Ua nehenehe atoa ïa ratou e feruri maitai, e tatarahapa a hoˈi mai ai i te Atua.

Mai tera mahana mai i nehenehe ai te mau pǐpǐ a Iesu e haamanaˈo maitai i te mau haapiiraa faufaa ta ˈna i horoa na roto i teie faahohoˈaraa faahiahia e i titauhia ˈi ia na reira ratou. Na mua roa, e haerea paari ia faaea i roto i te nunaa paruruhia o te Atua, i reira to tatou Metua o te here ra ia tatou e haapao e e aupuru ai ia tatou, eiaha râ ia haere hanoa ma te imi i te haamâha i to tatou mau hinaaro tia ore i “te hoê fenua atea.”

Te tahi atu haapiiraa, ia hahi ê tatou i te eˈa o te Atua, ia hoˈi haehaa ïa tatou i to tatou Metua e tia ˈi ia fanaˈo faahou i ta ˈna farii maitai.

E haapiiraa atoa te huti mai i te taa-ê-raa i rotopu i te metua tane tei farii maitai i ta ˈna tamaiti a faaore ai i ta ˈna hara, e te matahiapo tei inoino a ore atu ai e farii maitai i to ˈna teina. Ia ineine te mau tavini a te Atua i te faaore i te hara e te farii maitai i te tahi taata tei hahi ê na, e ua tatarahapa mau râ i muri aˈe a hoˈi mai ai i te fare o to tatou Metua. E oaoa anaˈe no to tatou taeae tei “pohe na” e “ua ora faahou mai,” e tei “moˈe na” e “ua hoˈi mai.”