Yesu ya hi “Yordan pa a se” ngɛ he ko nɛ a tsɛɛ ke Perea a be saii. (Yohane 10:40) Lɔ ɔ se ɔ, e ngɔ e hɛ mi kɛ tsɔɔ woyi je kɛ yaa Yerusalem.

Se pi lɛ pɛ nɛ e ngɛ blɔ ɔ hiae. E kaseli ɔmɛ kɛ “nimli babauu” nɛ a kpɛti ni komɛ ji tó tsuli kɛ yayami peeli hu piɛɛ e he. (Luka 14:25; 15:1) Farisi bi ɔmɛ kɛ mlaa tsɔɔli ɔmɛ nɛ a sume Yesu sane ɔ hu ngɛ ni ɔmɛ a kpɛti. Nɔ́ hetomi níhi nɛ kɔɔ to nɛ laa a, bi nɛ laa a, kɛ niatsɛ ɔ kɛ Lazaro a he nɛ Yesu kɛ tsu ní ɔ ma ha nɛ Farisi bi ɔmɛ ma susu a yi mi saminya.​​—Luka 15:2; 16:14.

Yesu kpale ma ní komɛ nɛ e tu he munyu benɛ e ngɛ ní tsɔɔe ngɛ Galilea a nɔ mi kɛ ha mɛ. Eko ɔ, bɔ nɛ Farisi bi ɔmɛ nɛ a sume Yesu sane ɔ pee a ní ha a lɛ ha nɛ Yesu wo e kaseli ɔmɛ ga nɛ nyɛɛ se nɛ ɔ nɛ.

Yesu de ke: ‘Níhi nɛ haa nɔ nane kpataa a, ja a ba kɛ̃. Se nɔ nɛ nɔ nɛ ní nɛ ɔmɛ guu kɛ ba a, musu tloo lɛ! Nyɛɛ hyɛ nyɛ he nɔ saminya! Ke o nyɛmi tɔ̃ o nɔ ɔ, kã e hɛ mi, nɛ ke e pia e he ɔ, kɛ pa lɛ. Ke e tɔ̃ o nɔ si kpaago ligbi kake, nɛ eko fɛɛ eko se ɔ, e kpale ba de mo ke, “I pia ye he” ɔ, kɛ pa lɛ si kpaago ɔ jã kɛ̃.’ (Luka 17:1-4) Eko ɔ, nɔ́ nɛ Yesu de nɛ ɔ ma ha nɛ Petro ma kai kaa be ko nɛ be ɔ, e bi Yesu kaa e sa nɛ a ngɔ yayami kɛ pa si kpaago lo.​​—Mateo 18:21.

Anɛ kaseli ɔmɛ ma nyɛ maa ngɔ Yesu ga womi ɔ kɛ tsu ní lo? Benɛ a ya de Yesu ke, “Ha nɛ wa hemi kɛ yemi ɔ mi nɛ wa” a, e de mɛ ke: “Nyɛ hemi kɛ yemi kle kaa sinapi wu ngu kake jinɛ nyɛ ko fa sikamore tso nɛ ɔ ke e hia kɛ e sipoku kɛ je zu mi kɛ ya ma wo mi, nɛ e maa bu nyɛ tue.” (Luka 17:5, 6) Ngɛ anɔkuale mi ɔ, hemi kɛ yemi nɛ mi wa ma nyɛ maa pee ní nguahi.

Yesu ya nɔ nɛ e tsɔɔ nɔ́ he je nɛ e sa kaa waa ba wa he si, nɛ wa ko susu kaa wa nɔ kuɔ pe ni kpahi ɔ. E de e bɔfo ɔmɛ ke: “Waa ngɔ lɛ kaa nyɛ ti nɔ kake ngɛ sɔmɔlɔ nɛ huɔ [e ngmɔ], aloo e lɛɛ lohwe ha lɛ. Ke e je ngmɔ mi kɛ ba a, pe o ma de lɛ ke e ba hi si esɔesɔ nɛ e ye ní lo? Dɛbi, nɔ́ nɛ o ma de lɛ mohu ji, ‘Yaa nɛ o ya hoo ní ha mi. Lɔ ɔ se ɔ, dla o he nɛ o ba sɔmɔ mi kɛ ya si ma ye ní nɛ ma nu nɔ́ ko. Ke i gbe nya, konɛ mo hu o ya ye ní nɛ o nu nɔ́ ko.’ Tsɔlɔ ɔ, e hia we lɛ sina kaa e pee nɔ́ nɛ a fa lɛ ke e pee ɔ: ‘Enɛ ɔ kɔɔ nyɛ hu nyɛ he jã kɛ̃. Ke nyɛ pee níhi tsuo nɛ a fa nyɛ ke nyɛɛ pee ɔ, nyɛ de ke, ‘Wɔɔ lɛɛ sɔmɔli nɛ he be se nami kɛkɛ ji wɔ. Ní tsumi nɛ sa kaa wa tsu ɔ, lɔ ɔ pɛ wa tsu nɛ ɔ nɛ.’”​​—Luka 17:7-10.

E sa nɛ Mawu sɔmɔli tsuo nɛ a nu sisi kaa Mawu suɔmi nya ní peemi he hia pe nɔ́ tsuaa nɔ́. Jehanɛ ɔ se hu ɔ, e sɛ nɛ wa ti nɔ ko nɔ ko hɛ nɛ je he blɔ nɛ e ngɛ kaa Mawu sɔmɔlɔ ɔ nɔ.

Eko ɔ, benɛ Yesu kɛ ní ɔmɛ gbe ní sɛɛmi nɛ ɔ nya a, e kɛ we nɛ nɔ ko nɛ Maria kɛ Marta a tsɔ lɛ Yesu ngɔ ɔ ya su lejɛ ɔ. Lazaro nyɛmi yihi ji Maria kɛ Marta, nɛ a je Betania nɛ ngɛ Yudea a. Nɔ nɛ a tsɔ ɔ ya de Yesu ke: “Nyɔmtsɛ, o huɛ nɛ o suɔ lɛ ɔ ngɛ gboe.”​​—Yohane 11:1-3.

E ngɛ mi kaa Yesu nu kaa e huɛ Lazaro be he wami wawɛɛ mohu lɛɛ, se lɔ ɔ ha we nɛ e ye aywilɛho. Mohu ɔ, e de ke: “Hiɔ nɛ ɔ be Lazaro gbee, se mohu a maa gu enɛ ɔ nɔ kɛ wo Mawu hɛ mi nyami; nɛ enɛ ɔ nɔuu a kɛ maa wo Mawu Bi ɔ hɛ mi nyami.” Yesu ye ligbi enyɔ ngɛ he nɛ e ngɛ ɔ. Kɛkɛ nɛ e de e kaseli ɔmɛ ke: “Nyɛ ha waa kpale wa se kɛ ho Yudea ya.” Kaseli ɔmɛ kplɛɛ we kaa a ya, nɛ a de lɛ ke: “Tsɔɔlɔ, pi lingmi nɛ ɔ pɛ nɛ Yuda bi ɔmɛ ka mo tɛ fiami, nɛ o yaa lejɛ ɔ ekohu?”​​—Yohane 11:4, 7, 8.

Yesu ha mɛ heto ke: “Anɛ pi ngmlɛfia nyɔngma kɛ enyɔ nɛ peeɔ ligbi kake? Ke nɔ ko nyɛɛ piani ɔ, e tɛ we si, mɛni he je ɔ, e naa je nɛ ɔ mi la a. Se ke nɔ ko nyɛɛ nyɔ mi ɔ, e tɛɔ si, ejakaa la be.” (Yohane 11:9, 10) Nɔ́ nɛ Yesu ngɛ tsɔɔe  ji kaa, be nɛ Mawu to kɛ ha lɛ ke e kɛ ba tsu ní ɔ bɛ nyagbe lolo. E sa kaa Yesu nɛ e ngɔ be bɔɔ nɛ piɛ ha lɛ ɔ kɛ gbe e ní tsumi ɔ nya loko jamɛ a be ɔ nɛ su.

Yesu ya nɔ nɛ e de ke: “Wa huɛ Lazaro hwɔ mahe, se i yaa nɛ ma ya tsɛ̃ɛ̃ lɛ.” Kaseli ɔmɛ susu kaa Lazaro hwɔ mahe nitsɛnitsɛ, nɛ e maa te si, lɔ ɔ he ɔ, a de Yesu ke: “Nyɔmtsɛ, ke mahe e ngɛ hwɔe ɔ, lɛɛ e maa hi ha lɛ.” Yesu gba mi kpoo nɛ e de mɛ ke: ‘Lazaro gbo. Nyɛ ha waa ya e ngɔ.’​​—Yohane 11:11-15.

Toma le kaa Yuda bi ɔmɛ ma nyɛ maa gbe Yesu ngɛ Yudea, se kɛ̃ ɔ, e suɔ kaa e ma fĩ Yesu se, lɔ ɔ he ɔ, e de kaseli kpa amɛ ke: “Nyɛ ha wɔ hu waa kɛ Tsɔɔlɔ ɔ nɛ ya, nɛ waa kɛ lɛ ya gbo.”​​—Yohane 11:16.