Yésu a nyén ndék ngéda i Péréa, “uu ngwañ u Yordan.” (Yôhanes 10:40) Ndék ngéda, a nyoñ njel Yérusalem i nwelmbok.

Yésu a ta bé nyetama. Banigil bé ba nyéga nye lôñni “mamut makeñi”, mu ikété mamut ma, di gwé bakottas ni baboñbéba. (Lukas 14:25; 15:1) Farisai ni bayimbén ba ba mbéna yahal mam Yésu a mboñ ni kal, yak bo ba yé mu nlôñ u. Ba nlama ôt mahoñol ngandak i mbus le ba nok dihéga Yésu a nti inyu ntômba nimlaga, man nimlaga, ni inyu ngwañ mut bo Lasarô.​—Lukas 15:2; 16:14.

Bebek mu kii a nhoñol diyana di bakolba bé, Yésu a nke ni bisu i kwel ni banigil bé inyu mam a bi bôk a niiga i Galiléa.

Kiki hihéga Yésu a nkal le: “Ngok baagene i nla bé hañ. Ndi ngoo ni mut a nlona yo! . . . Bébomede yoña yihe. Ibale manyuñ a mboñ béba, béhe nye; ibale a ntam béba yé, nwéhél nye. To ibale hiki kel a mboñ we béba ngélé isaambok, ndi a témb i weeni ngélé isaambok, a kal le: ‘Me ntam béba yem,’ u nlama nwéhél nye.” (Lukas 17:1-4) I jam li nsôk lini li hoñlaha Pétrô mbadga a bi bat inyu yi ngélé yañen a nlama nwéhél maasañ.​—Matéô 18:21.

Baa banigil ba Yésu ba ga la noñ bibañga gwé? Ngéda ba nkal nye le: “Kônde bés hémle,” Yésu a nlédés bo ni bini bibuk le: “Ibale hémle nan i bak keñi kiki hisiina hi mbôô, ki ni yé le ni kal e sikômina ini le: ‘Nupla hana, u béla i tuye!’ I nôgôl ki bé.” (Lukas 17:5, 6) Yak hisii hi hémle i nla ti we pôla i boñ mam makeñi.

Yésu a nke ni bisu i unda nseñ i bana suhulnyuu, ni i tehe bésbomede i nya i kôli, a nkal banigil le: “Njee ikété nan, ibale a gwé nkol u u nsélél nye i wom tole u ntéédana nye bémba, a’ kal wo ngéda u nlôl i wom le: ‘Lo yén ngélé yada i téblé, u je’? Baa a’ kal bé wo le: ‘Héñha mambot, u kôôbana me yom i je inyu kôkôa, u gwélél me nson letee me mal je ni nyo; i mbus, ha nyen yak we w’a je ni nyo’? A mbégés bé nkol inyule u mboñ i mam a mbat wo le u boñ, hala bé? Hala nyen yak bé, i ngéda ni mal boñ mam momasôna ba nkal bé le ni boñ, kala le: ‘Di yé minkol mi yañga mi mi kôli bé ni bibégés. I jam di lam-ga boñ jon di mboñ.’”​—Lukas 17:7-10.

Hiki ngwélél Djob a nlama tehe nseñ i bii gwéñe bi Djob kiki jam li bisu i niñ yé. Jam lipe li yé le di nlama bii mu mahoñol més le i sélél Djob li yé nsima nkeñi.

I nene le i mbus nkwel unu, nlegel nwin wada a nlo. Maria ni Marta bon ba ñom nye. Ba yé bilôk binyañ bi Lasarô, ba niñ i Bétania i Yudéa. Nlegel nwin a nkal Yésu le: “A Nwet, nun-ki! I mut u ngwés a nkon.”​—Yôhanes 11:1-3.

To hala kiki a ntip nok le liwanda jé Lasarô a nkon ngandak, hala a nlôôha bé tééñga nye. Yésu a nkal le: “Lisuk li unu kon li ta bé nyemb, ndi li yé inyu ti Nyambe lipém le ndi ni njel ini, Man Nyambe a kôhna lipém.” I mbus, a nyén ki ha dilo diba ndi, a kal banigil bé le: “Di témbék i Yudéa.” Ndi banigil ba nkal nye le: “A Rabi, hala a ta bé jôga li ngéda le bôt ba Yudéa ba bé yéñ ôm we ngok, ndi wee u ntémb ki nyoo?”​—Yôhanes 11:4, 7, 8.

Yésu a ntimbhe le: “Njamuha u gwé jôm li ngeñ ni iba, hala bé? Ibale mut a nhiôm njamuha, a mbômda bé yom yo ki yo inyule a ntehe mapubi ma nkoñ isi unu. Ndi ibale mut a nhiôm juu, a mbômda inyule mapubi ma ta bé  ikété yé.” (Yôhanes 11:9, 10) I nene le Yésu a nsômbôl kal le ntjegek ngéda Djob a ntéé inyu nson wé i yé ngi tagbe. Jon a nlama tibil gwélél ndék ngéda a nginda gwé.

Yésu a nkônde le: “Liwanda jés Lasarô li nke ilo, ndi me ke nyoo inyu tôdôl nye.” Banigil ba nhoñol le Lasarô a yé noi ndi a ga telep, jon ba nkal Yésu le: “A Nwet, ibale a yé i ke ilo, wee a’ témbna mbôô wé.” Yésu a nkal ni bo maliga le: “Lasarô a nwo . . . Ndi di kenek i nyeni.”​—Yôhanes 11:11-15.

To hala kiki Tômas a yé nkwoog nkaa le Yésu a nla nimis niñ yé i Yudéa, a nit nye mu makidik mé. Jon a nkal bana banigil le: “Yak bés di kenek, le ndi di wo lôñni nye.”​—Yôhanes 11:16.