Pa numa ya kwikala mu Perea, kwi “shilya lya Yordani,” Yesu alolele ku kapinda ka ku kulyo, ku Yerusalemu.—Yohane 10:40.

Yesu taali eka, ali na basambi e lyo na “mabumba yakalamba,” apaali na bakasonkesha ba misonko na babembu. (Luka 14:25; 15:1) Bakalemba na baFarise abalesuusha ifyo Yesu alesambilisha e lyo ne milimo alebomba, nabo e po baali. Fingi baletontonkanyapo ilyo baumfwile ifilangililo ifyo Yesu abashimikiile pa mpaanga iyalubile, pa mwana uwalubile, e lyo na pa mukankaala na Lasaro.—Luka 15:2; 16:14.

Lyena Yesu atampile ukweba abasambi ifintu fimo ifyo abebelepo na pa kubalilapo ilyo aali nabo mu Galili. Ilyo alebeba pali ifi fintu, nalimo aletontonkanya pa fyo abaFarise balemupumya ne fyo balemusuusha.

Cimo ico Yesu alandilepo ca kuti: “Ifya kulufya abantu ukwisa kwena fikesa. Lelo we bulanda we ku muntu uo fyaishilamo! . . . E ico cenjeleni. Munonko nga abembuka mukalipile, kabili nga alapila, mubelele uluse. Nangu fye akubembukila imiku cinelubali mu bushiku bumo no kwisa kuli iwe imiku cinelubali, ati, ‘Nalapila,’ mubelele uluse.” (Luka 17:1-4) Amashiwi alandile mu kulekelesha nalimo yalengele Petro ebukishe icipusho aipwishe Yesu pa kweleela bambi.—Mateo 18:21.

Bushe abasambi balikonkele ifyo Yesu alandile? Ilyo baebele Yesu abati, “Tulundileniko icitetekelo,” abebele ati: “Amukwata icitetekelo icaba ngo luseke lwa lubanga, kuti mwaeba ici cimuti amuti, ‘Nukuka uyeilimba muli bemba!’ na co kuti canukuka cayailimba na muli bemba.” (Luka 17:5, 6) Kanshi umuntu nga ali ne citetekelo nangu fye icinono, kuti acita ifintu ifikalamba.

Yesu akonkenyepo ukubafunda ukuti, balingile ukuba abaicefya, kabili tabalingile ukuituumika. Atile: “Nani pali imwe uo umusha wakwe nga alelima nelyo alecema impaanga uwingamweba ilyo abwela ku mabala, ati, ‘Isa kuno nomba line, ikala tulye ifya kulya’? Lelo bushe takamwebe ati, ‘Mpekanishisha umulaalilo, fwala ne nsalu no kulandetela ifyo ndefwaya mpaka mpwishe ukulya no kunwa, e lyo na iwe walalya no kunwa’? Bushe akatasha umusha pa kucita ifyo amwebele? Ni fyo fine na imwe, ilyo mwacita fyonse ifyo bamweba ukucita, mulesosa amuti, ‘Ifwe tuli basha fye. Ifyo twacita, e fyo tufwile fye ukucita.’”—Luka 17:7-10.

Ababomfi ba kwa Lesa bonse balingile ukwishiba ico ukubikila ifya kwa Lesa pa ntanshi kwawamina. E lyo kabili bafwile ukulaibukisha ukuti ukuba bakapepa ba kwa Lesa no kuba mu cilonganino cakwe, lishuko sana.

Cimoneka kwati papitile fye inshita inono kwaisa ne ntumi ukufuma kuli Maria na Marita, bankashi ya kwa Lasaro abaleikala mu Betani, ku Yudea. Uo batumine aebele Yesu ati: “Mwe Shikulu, moneni! umuntu mwatemwa nalwala.”—Yohane 11:1-3.

Ilyo Yesu aumfwile ukuti Lasaro cibusa wakwe nalwala sana, tacamusakamike. Lelo atile: “Ubu bulwele te bwa kutwala ku mfwa, lelo bwa kucindikilamo Lesa, pa kuti Umwana wa kwa Lesa acindikilwemo.” Aikele uko ali inshiku shibili, na pa numa aebele abasambi ati: “Natuleya na kabili ku Yudea.” Abasambi bafwaile bamukaanye abati: “Mwe Kasambilisha, ni nomba line aba ku Yudea bafwaile ukumupoola amabwe, bushe na kabili e ko mulefwaya ukuya?”—Yohane 11:4, 7, 8.

Yesu abaswike ati: “Bushe mu kasuba tamwaba ama-awala 12? Umuntu nga aenda mu kasuba taipununa, pantu alamona ulubuuto lwa  pano calo. Lelo umuntu nga aenda ubushiku, alaipununa, pantu takwete ulubuuto.” (Yohane 11:9, 10) Yesu nalimo aloseshe mu kuti inshita ya kubomba umulimo Lesa amupeele yali tailapwa. Kanshi, alingile ukubombesha mu nshita iinono iyo asheleko nayo.

Yesu alandile no kuti: “Lasaro umunensu nalaala utulo, lelo ndeya mu kumubuusha.” Abasambi bamwene kwati Lasaro aletuusha fye kabili ali no kupola. E ico baebele Yesu abati: “Mwe Shikulu, nga nalaala utulo, alaba fye bwino.” Lelo Yesu alibebele icishinka ati: “Lasaro nafwa . . . Lelo natuleya uko ali.”—Yohane 11:11-15.

Toma alishibe ukuti Yesu nalimo kuti bamwipaya nga aya ku Yudea, lelo apo alefwaya ukumutungilila, aebele abatumwa banankwe ati: “Natuleya na ifwe, ukuti tuyefwila pamo nankwe.”—Yohane 11:16.