Éyoñe mon éyoñ a lôteya, Yésus a ke mfa’a ya “Jourdain yat” vôm ba loene na, Pérée. (Jean 10:40) Éyoñe ji a ke mfa’a ya Sud, e Jérusalem.

Yésus a nji bo étam. Ba béyé’é bé ba ke dulu te, benyoñe taxe a bebo mam abé be ne fufulu a “bôte abui,” ba tôñe nye. (Luc 14:25; 15:1) Bepharisien a bescribe, bôte ba ve mone jam ase Yésus a jô nge bo ve abé, be ne fe valé. Be bili abui mame ya fas éyoñe be maneya wô’ô minkana Yésus a nga kan a lat a ntômba ô nga jañ, mon a nga ke si fe a nkukume môt ba Lazare.​—Luc 15:2; 16:14.

Éko éziñ, mbôl a ngenan a bili minkomekan a ékpwe’ele besiñe bé ôsimesan, a dutu ôsimesan beyé’é bé. A kate be jam éziñ a mbe a tatéya kobô éyoñ a mbe Galilée.

Yésus a jô na: ‘E se nguleya bobane na e mam ma kolé ôbak me bo te kui, ve ngo’o nyu a bo na me kui! . . . Taba’ane miabebiene ntyel. Nge monyoñ a te bo abé, komeka’ane nye, a nge a tyendé, jamé’é nye. A nge a bo wo abé biyoñe zangbwale e môs, a a zule be wo biyoñe zangbwal, a jô’ô na: ma jôban, wo ye jamé nye.’ (Luc 17:1-4, Mfefé Nkôñelan) Ñye’elan ôte wo yiane bo na Pierre a beta simesane nsili a nga sili a kômbô’ô yem nge a yiane jamé tañe biyoñe zangbwal.​—Matthieu 18:21.

Ye beyé’é ba ye fo’o kui na be bo mam avale Yésus a jô? Éyoñe ba jô Yésus na, “Kô’ôla’ane bia mbunan,” a jô be na: “Nge mi nga ye bi mbunan ane fes ôndôndôô, mi nga ye jô élé murié jina na: Fumi’i si a béba’an e mañ été; a é nga ye wô’ô mia.” (Luc 17:5, 6, Mfefé Nkôñelan) Ôwé, ja’a ve mon abime mbunan a ne bo beta be mam.

Yésus a ke ôsu a ye’ele mfi ya bi fulu éjote nyul a mbamba ñyenane môt a bili e be émien, a jô’ô minlômane na: “Za ya be mia, nge a bili mbo ésaé a senan si, nge na a ve mimbame biyeme bidi, a ye jô nye éyoñ a soya mefube na: za’a tabe tawôlô ndian éto ébiene ji? Ngaa a ye viane jô nye na: kôme ma ndian, jaék mengômesane ya saane ma, akekui me maneya di a nyu; mvus éte, wo wo ye di a nyu. Ye a ye ve mbo ésaé ate akéva amu a nga bo e jam be nga bendé nye? Mia fe, éyoñ mi maneya bo e jam be nga bendé mia, jô’ane na: Bi ne bebo bisaé be ne teke mfi, bi nga bo e jam bi nga yiane bo.”​—Luc 17:7-10, Mfefé Nkôñelan.

Mbo ésaé Zambe ase a yiane kôme yeme mfi ya telé mam me Zambe ôsu ényiñe jé. A fe na, môt ase a yiane kôme simesane beta ma’a a bili mfa’a ya kañe Zambe ane ébu’a jia ya nda bôte jé.

Mvuse ya valé nde môt éziñ a so, Marthe ba Marie mbe ba te nye lôm. Be ne bekale be Lazare, a ba nyiñe Béthanie ya Judée. Môte ba te lôm a jô na: “A Nti, yeme na nyômvoé a kon.”​—Jean 11:1-3, Mfefé Nkôñelan.

Akusa bo a wô’ô na mvôé jé Lazare ja kon abui, jame te é nji dañe taé Yésus nlem. Ve, a viane jô na: “Ôkon ôte ô nji bo ôkon awu, ô ne asu duma Zambe, ane Mone Zambe a ye nyoñe duma été.” Ane a beta tabe vôm a né melu mebaé, éyoñe te a kate beyé’é bé na: “E nkelan, bi bulan e Judée.” Be nji kañese nde ba jô na: “A Rabbi, ke beyude be ndôme jeñ ana’ana na ba lume wo mekok, éyoñe te wo téé na wo beta ke wôé?”​—Jean 11:4, 7, 8, Mfefé Nkôñelan.

Yésus nye na: “Ye mewolo me nji bo awôm a mebaé e ngumba môs? Nge môt a wulu a môs, a ye bo te kolé ôbak, amu a wulu a yene éfufub ya si nyô. Nge môt a wulu a alu, a kolé ôbak, amu a wulu a yene éfufub ya si nyô.” (Jean 11:9,  10, Mfefé Nkôñelan) Éko éziñ a kômbô liti na, abim éyoñe Zambe a nga ve asu ésaé nkañete Yésus é ngenane te man. Nté jam ete é ngenane te kpwaan, Yésus a yiane belane mon éyoñ ase a li’iya nye.

Yésus a beta jô na: “Mvôé jam Lazare, a ne ôyo; ma ke vele nye ôyo.” Mbôle ba buni na Lazare a ke fo’o nya ôyoo, na a wo’one mone jôm, nde beyé’é bé ba jô nye na: “A Nti, nge a ne ôyo, ke a ye ñhe nyiñ.” Ane Yésus a kate be bôsa na: “Lazare a wuya . . . Nkelane ñhe vôm a né.”​—Jean 11:11-15, Mfefé Nkôñelan.

Mbôle be yemeya na, Yésus a yiane wu e Judée, a ba kômbô su’u nye, Thomas a jô beyé’é bevo’o na: “Bia fe nkelan, bia be nye bi ke wu.”​—Jean 11:16, Mfefé Nkôñelan.