Yezu ye wagati damanin kɛ Pere mara la, “Zurudɛn baji kɔfɛ.” (Zan 10:40, ABM). A be tagara sisan Zeruzalɛmu, worodugu fan fɛ.

Yezu t’a kelen. A ka kalandenw ani “jamaba” dɔ b’a kɔ. Lanpominɛlaw ni jurumukɛlaw b’o jamaba cɛma (Luka 14:25; 15:1). Fariziɲɛw ni sariya karamɔgɔw fana be yen. Olu ka teli ka Yezu kɔrɔfɔ a ka kɛwalew n’a ka kumaw kosɔn. Yezu tun ye ntalen minw la saga tununin, dencɛ tununin ani cɛɛ nafolotigi ni Lazari koo la, u tun y’u lamɛn. U be se ka miiri o ntalen kumaw bɛɛ la.—Luka 15:2; 16:14.

N’a sɔrɔ Yezu ma ɲinɛ a kɛlɛbagaw ka lɔgɔbɔri n’u ka kɔrɔfɔli kɔ. O kama, a tun ye a ka kalandenw kalan miiriya minw na k’u to Galile mara la, a segira u kan.

Ɲɛyirali fɛ, Yezu ko: “Wajibi lo sababu bena sɔrɔ min b’a to mɔgɔw kunna be cɛn, nga mɔgɔ min bena kɛ o sababu nin ye, bɔnɛ be o tigi ye. . . . Aw k’aw yɛrɛw kɔlɔsi o koow la. ‘N’i balima y’i hakɛ ta, i k’a ka filiyɔrɔ fɔ a ye. N’a nimisara, yafa a ma. N’a y’i hakɛ ta siɲɛ wolonwula tile kelen kɔnɔ, n’a segira i fɛ a siɲɛ wolonwula bɛɛ la ko i ka yafa ale ma, i ka yafa a ma.’” (Luka 17:1-4). N’a sɔrɔ Yezu ka kuma labanw ye Piyɛri hakili jigi a ka ɲiningali la. A tun ye Yezu ɲininga ko ale ka kan ka yafa mɔgɔ ma siɲɛ joli?—Matiyo 18:21.

Yala kalandenw bena se ka Yezu ka kumaw labato wa? U y’a fɔ Yezu ye ko: “Matigi, dɔ fara an ka lanaya kan.” Yezu y’u hakili sigi ko: “N’aw tun be la ne la dɔɔni dɔrɔn, hali n’o lanaya boɲa tun be mutaridikisɛ bɔ, aw tun bena se k’a fɔ yiriba nin ye ko a ka bɔn ka bɔ yan ka taga yɛrɛ tutu kɔgɔji la. A tun bena sɔn aw ta ma.” (Luka 17:5, 6, ABM). Tiɲɛn na, hali limaniya dɔɔni dɔrɔn be se k’an dɛmɛ ka kooba kɛ.

Sisan, Yezu b’a yira ko a kɔrɔtanin lo mɔgɔ ka kɛ ni yɛrɛmajigilenya miiriya ye. A y’a fɔ a ka cidenw ye ko: “Ni baaraden bɛ aw dɔ fɛ, ni o bɛ sɛnɛ kɛ wala ka baganw kɔlɔsi, ni o nana ka bɔ kungo la tuma min na, a n’a fɔ o baaraden ye ko o ka na i sigi dumuni la wa? Nka a tɛna a fɔ o baaraden ye ko a ka dumuni dila ka a cɛsiri ka ale mago ɲɛ, fo ni ale tilara dumuni ni minni la tuma min na wa, o kɔ, o na sɔrɔ ka dumuni kɛ ka minni kɛ. A bɛ barika da o baaraden ye k’a masɔrɔ o ye a ka ko fɔlenw kɛ wa? O cogo la aw fana, ci minw fɔra aw ye, ni aw ye olu bɛɛ kɛ ka dafa, aw k’a fɔ ko, aw ye baaraden gwansanw ye, ko aw ye aw niyɔrɔ baara dama de kɛ.”—Luka 17:7-10, ABM.

An kelen kelen bɛɛ ka ɲi k’a faamu ko a kɔrɔtanin lo an ka Alakow kɛ an ɲɛnako fɔlɔ ye. Ka fara o kan, an man kan ka ɲinɛ ko nɛɛma lo an fɛ ka kɛ Ala ka denbayamɔgɔ dɔ ye ani k’a bato.

N’a sɔrɔ dɔɔni o baro kɔ le, ciraden dɔ nana bɔ Yezu ye. Lazari balimamuso Mariyamu ni Marita lo y’a ci. U siginin be Betani, Zude mara la. O ciraden ko: “Matigi, i tericɛ man kɛnɛ.”—Zan 11:1-3.

Hali n’a fɔra Yezu ye ko a tericɛ bananin lo fɔɔ ka juguya, Yezu fari ma faga dusukasi bolo. A ko: “Bana nin t’a fagata ye, nga a kɛra janko boɲa ka la Ala n’a Dencɛ kan.” Ciraden nana a sɔrɔ yɔrɔ min na, a ye tile fila kɛ yen. O kɔ, a y’a fɔ a ka kalandenw ye ko u ka “kɔsegi Zude mara la.” U y’a fɔ a ye ko: “Karamɔgɔ, zuwifuw tun b’a fɛ k’i bon ni kabakuru ye a ma mɛn, e do ko an ka segi ka taga Zude mara la.”—Zan 11:4, 7, 8.

Yezu y’u jaabi ko: “Lɛrɛ tan ni fila te tile kelen kɔnɔ wa? Ni mɔgɔ min be taama tilefɛ, a te talon, bari a be yeli kɛ tile barika la, nga, ni  mɔgɔ dɔ be taama sufɛ, a be talon, bari yeelen te yen.” (Zan 11:9, 10). N’a sɔrɔ Yezu b’a fɛ k’a fɔ ko Ala ye wagati min latigɛ ale ka cidenya baara kama, o ma dafa fɔlɔ. Wagati kunkurunin min tora, a ka kan ka baara kɛ n’o ye koɲuman.

Yezu y’a fɔ tugun ko: ‘An tericɛ Lazari be sinɔgɔra, nga ne be taga a kunun.’ Kalandenw ko: “Matigi, n’a be sinɔgɔra, o kɔrɔ ko a bena kɛnɛya.” A gwɛnin lo ko kalandenw b’a miirila ko Lazari be sinɔgɔra yɛrɛ yɛrɛ la ani ko a bena wuli ka bɔ a ka bana na. O kama Yezu y’a fɔ u ye ka gwɛ ko: “Lazari sara. . . . An ka taga fɛ.”—Zan 11:11-15.

Toma b’a kala ma ko u ka teli ka Yezu faga Zude mara la. O bɛɛ n’a ta, a b’a fɛ ka kɛ ni Yezu ye. O kama a y’a tɔɲɔgɔnw jija “k’u k’a to u be taga yen u bɛɛ ka sa ɲɔgɔn fɛ.”—Zan 11:16.