Sa bau dede nona tiko voli o Jisu e Peria, ena “tai ni Joritani.” (Joni 10:40) Qo sa gole vaka ina ceva, i Jerusalemi.

Eratou tomani Jisu na nona tisaipeli, o ira na “ilala levu,” na daukumuni ivakacavacava kei ira na ivalavala ca. (Luke 14:25; 15:1) Era gole tale ga na Farisi kei na vunivola era dau vakalewai Jisu. E levu na ka mera vakasamataka nira rogoca na vosa vakatautauvata i Jisu me baleta na sipi kei na gonetagane e yali, na tagane vutuniyau kei Lasarusa.​—Luke 15:2; 16:14.

Se rairai nanuma vinaka tu o Jisu na nodra vakalelewa na dauveitusaqati kei na nodra veivakalialiai, mani vakamacalataka vei ratou na tisaipeli eso na ivakavuvuli a cavuta mai Kalili.

Kena ivakaraitaki, a tukuna o koya: “Ena dredre me sega ni yaco eso na ka ni veivakatarabetaki. Ia e kalouca o koya e vakavuna! . . . Mo qarauni iko. Ke valavala ca na tacimu, vunauci koya, ke veivutuni, vosoti koya. Ke valavala ca mada ga vakavitu vei iko ena dua na siga qai lesu mai vakavitu vei iko me kaya, ‘Au sa veivutuni,’ e dodonu mo vosoti koya.” (Luke 17:1-4) De dua na iotioti ni yatuvosa qori e rairai nanuma lesu kina o Pita na nona taro me baleta na veivosoti vakavitu.​—Maciu 18:21.

Vakacava eratou na muria na tisaipeli na vosa i Jisu? Ni ratou kaya vei Jisu, “Ni vakalevutaka mada na neitou vakabauta,” e vakadeitaka vei ratou: “Ke mani vaka na levu ni sore ni musita na nomudou vakabauta, dou rawa ni kaya ina vunikau levu qo, ‘Mo tacavu mo lai tei i wasawasa!’ ena talairawarawa vei kemudou.” (Luke 17:5, 6) Io, e levu na ka ena rawati ke lailai mada ga na vakabauta.

Sa qai vakamacalataka o Jisu na bibi ni yalomalumalumu kei na rai donu, e kaya vei ratou na yapositolo: “O cei vei kemudou ena kaya vua na nona tamata cakacaka e dau siviyara se vakatawa manumanu ni lesu mai na iteitei, ‘Lako sara mai na teveli mo kana’? Sega, ena kaya ga, ‘Vakarautaka mai na kequ ivakayakavi, dara mai nomu isulu ni vakarau kakana mo qaravi au. Oti noqu kana kei na noqu gunu, mo qai kana o iko, mo gunu tale ga.’ Ena sega ni vakavinavinaka vua na tamata cakacaka ya ni cakava na ka ga e lesi me cakava, se vakacava? O kemudou tale ga, ni dou sa cakava na ka kece e lesi vei kemudou, mo dou qai kaya: ‘Keitou dauveiqaravi tawayaga. Na ka keitou cakava e dodonu ga me keitou cakava.’”​—Luke 17:7-10.

E bibi vei ira na dauveiqaravi i Jiova mera vakaliuca na loma ni Kalou. Mera nanuma tale ga ni ka dokai nodra qarava na Kalou nira lewe ni nona vuvale.

Ni oti ga qori, erau vakauitukutuku mai o Meri kei Marica, erau ganei Lasarusa, ratou vakaitikotiko e Pecani mai Jutia. Erau kaya: “Turaga, e tauvimate na nomuni itokani dredre.”​—Joni 11:1-3.

E sega ni rarawa vakasivia o Jisu ni rogoca ni tauvimate levu nona itokani o Lasarusa, ia e kaya: “Ena sega ni tini ena mate na tauvimate qo, ia ena vakalagilagi kina na Kalou. Me vakalagilagi tale ga kina na Luve ni Kalou.” Ni oti e rua na siga nodratou tiko e kea, sa qai tukuna vei ratou na tisaipeli: “Me datou lako tale i Jutia.” Ia eratou kaya vua: “Rapai, era se qai via vakaviriki iko mada ga ena vatu na kai Jutia, oni via lako tale kina?”​—Joni 11:4, 7, 8.

E sauma o Jisu: “Vakacava, e sega ni 12 na aua ena dua na siga? Ke dua e taubale ena siga ena sega ni coqa e dua na ka ni raica tiko na rarama ni vuravura. Ia ke dua e taubale ena bogi, ena tarabe ni sega vua na rarama.” (Joni 11:9, 10) E vakaibalebaletaka tiko ni se sega ni gauna lokuci  ni Kalou me vakacavara kina o Jisu nona cakacaka vakaitalatala. E bibi gona me vakayagataka vinaka o Jisu na gauna lekaleka se vo.

E tomana o Jisu: “Sa moce na nodatou itokani o Lasarusa, ia au sa lako qo meu lai vakayadrati koya.” Ratou nanuma na tisaipeli ni moce tiko o Lasarusa me vakacegu, ratou kaya sara: “Turaga, ke moce dina o koya, ena bula vinaka mai.” Sa qai tukuna vakamatata o Jisu: ‘Sa mate o Lasarusa, ia tou lako mada ga vua.’​—Joni 11:11-15.

Ni kila o Tomasi ni rawa ni vakamatei mai Jutia o Jisu, e vakaraitaka sara nona veitokoni ena nona uqeti ratou na vo ni tisaipeli: “Me datou lako tale ga me datou mate vata kei koya.”​—Joni 11:16.