Kwa ihinda rĩigana ũna, Jesu akoretwo gĩcigo-inĩ kĩa Perea, “mũrĩmo ũrĩa ũngĩ wa Jorodani.” (Johana 10:40) Egũcoka athiĩ erekeire Jerusalemu mwena wa mũhuro.

Jesu ndarĩ wiki. Arĩ na arutwo ake o hamwe na “kĩrĩndĩ kĩnene,” na gatagatĩ-inĩ kao kũrĩ na etia a mbia cia igooti na ehia. (Luka 14:25; 15:1) O na Afarisai na andĩki-Watho, arĩa mokagĩrĩra Jesu nĩ ũndũ wa maũndũ marĩa oigaga na ageka marĩ ho. Marĩ na maũndũ maingĩ ma gwĩciria thutha wa kũigua ngerekano iria Jesu ataarĩria ciĩgiĩ ng’ondu ĩrĩa yorĩte, mwanake ũrĩa worĩte, na ya gĩtonga na Lazaro.​—Luka 15:2; 16:14.

Hihi nĩ ũndũ wa ũrĩa okĩrĩirũo na kũnyirũo nĩ thũ ciake, Jesu rĩu akerekeria meciria harĩ arutwo ake. Akarĩrĩria maũndũ mamwe marĩa aarutanĩte hau kabere arĩ Galili.

Kwa ngerekano, akoiga: “Gũka kwa maũndũ marĩa matũmaga andũ mahĩngĩke gũtingĩĩthemeka. Ĩndĩ kaĩ ũrĩa ũmarehaga arĩ na haaro-ĩ! . . . Mwĩmenyagĩrĩrei. Mũrũ wa Ithe wanyu angĩhia, mũkaanie, na angĩĩrira, muohere. O na angĩkwĩhĩria maita mũgwanja mũthenya ũmwe na oke kũrĩ wee maita mũgwanja, agĩkwĩraga, ‘nĩ ndahera,’ no mũhaka ũmuohere.” (Luka 17:​1-4) No kũhoteke ciugo icio cia kũrĩkĩrĩria nĩ ciaririkania Petero kĩũria kĩrĩa orĩtie kĩgiĩ kuohanĩra nginya maita mũgwanja.​—Mathayo 18:21.

Hihi arutwo acio nĩ mekũhota kũrũmĩrĩra ciugo icio cia Jesu? Thutha wa kwĩra Jesu, “Tuongerere wĩtĩkio,” akameera ũũ: “Mũngĩrĩ na wĩtĩkio ũigana mbegũ ya karatarĩ-rĩ, no mwĩre mũtĩ ũyũ wa ndare, ‘Munyũka uume haha ũkehande iria-inĩ!’ naguo no ũmwathĩkĩre.” (Luka 17:​5, 6) Ũguo nĩ kuuga atĩ o na wĩtĩkio mũnini no ũhingie maũndũ manene.

Jesu agathiĩ na mbere kũrutana bata wa kwĩnyihia na gũkorũo na mawoni maigananĩru kwĩyerekera, akeera atũmwo ake: “Nũ thĩinĩ wanyu ũrĩ na ngombo ĩrarĩma na mũraũ kana ĩrarĩithia ũngĩmĩra yoima mũgũnda, ‘Ũka haha o rĩu na ũikare metha-inĩ ũrĩe’? Handũ ha ũguo-rĩ, na githĩ ndangĩmĩra, ‘Haarĩria irio ciakwa cia hwaĩ-inĩ, na wĩhotore ũndungatĩre nginya ndĩkie kũrĩa na kũnyua, na thutha ũcio no ũrĩe na ũnyue’? Ndangĩcokeria ngombo ĩyo ngatho nĩ ũndũ wa gwĩka ũrĩa ĩgwathĩtwo, kana tiguo? O ũndũ ũmwe na ũcio, thutha wa kũhingia maũndũ mothe marĩa mwathĩtwo, ugagai: ‘Ithuĩ tũrĩ ngombo itarĩ kĩene. Tweka o ũrĩa tũkwagĩrĩirũo nĩ gwĩka.’”​—Luka 17:​7-10.

Mũndũ o wothe ũtungatagĩra Ngai nĩ agĩrĩirũo kũmenya bata wa kũigaga wendi wa Ngai mbere. Makĩria ma ũguo, nĩ abatiĩ kũririkana gĩtĩo kĩrĩa arĩ nakĩo gĩa gũthathaiya Ngai arĩ ũmwe wa andũ a nyũmba yake.

Hihi kahinda kanini thutha ũcio, gũgoka mũndũ ũtũmĩtwo nĩ Mariamu na Maritha, aarĩ a nyina na Lazaro. Maikaraga taũni-inĩ ya Bethania ĩrĩa ĩrĩ Judea. Mũndũ ũcio akoiga: “Mwathani, mũrata waku ũrĩa wendete nĩ mũrwaru.”​—Johana 11:​1-3.

O na thutha wa kwĩrũo atĩ mũratawe Lazaro nĩ mũrwaru mũno, Jesu akaga gũtoorio nĩ kĩeha. Handũ ha ũguo, akoiga: “Mũrimũ ũyũ ti wa kũrehe gĩkuũ, ĩndĩ nĩ wa gũtũma Ngai agoocwo, nĩguo Mũrũ wa Ngai agoocithio kũgerera harĩ guo.” Agaikara o kũu arĩ thikũ igĩrĩ, agacoka akeera arutwo ake: “Rekei tũcoke Judea.” Makaregana nake makamũũria: “Rabii, githĩ andũ a Judea matiĩrĩgĩte kwenda gũkũhũũra na mahiga, na rĩu ũrenda gũcoka o kuo?”​—Johana 11:​4, 7, 8.

Jesu akameera: “Gũkoragwo na ũtheri wa mũthenya mathaa ikũmi na merĩ, githĩ tiguo? Mũndũ o wothe angĩthiĩ hĩndĩ ĩyo kũrĩ na ũtheri, ndangĩhĩngwo nĩ kĩndũ, tondũ nĩ arona ũtheri wa thĩ.  No mũndũ o wothe angĩthiĩ ũtukũ, nĩ ahĩngagwo, tondũ gũtirĩ na ũtheri.” (Johana 11:​9, 10) No kũhoteke arenda kuuga atĩ ihinda rĩrĩa Ngai aigĩte rĩa ũtungata wa Jesu ti ithiru. Kwoguo Jesu abatiĩ kũhũthĩra wega biũ ihinda inini rĩrĩa rĩtigarĩte.

Jesu agathiĩ na mbere kuuga: “Mũrata witũ Lazaro nĩ akomete, no nĩ ngũthiĩ kuo ngamũũkĩrie.” Hihi arutwo magĩciria atĩ Lazaro no kũhurũka ahurũkĩte na atĩ nĩ ekũhona, makamwĩra: “Mwathani, angĩkorũo nĩ akomete, nĩ ekũigua wega.” Jesu akameera ũũ cararũkũ: “Lazaro nĩ akuĩte . . . No rekei tũthiĩ kũrĩ we.”​—Johana 11:​11-15.

Nĩ ũndũ wa kũmenya atĩ Jesu no oragĩrũo Judea, na ndarenda kũmũtiganĩria, Toma akeera arutwo acio angĩ: “Nĩ tũthiĩi o na ithuĩ, tũgakue hamwe nake.”​—Johana 11:16.