Yesu wabanjileko pacheche mu mpunzha ya “ku bushiya bwa Yodano” yatelwanga’mba Pelia. (Yoano 10:40) Pano wayile ku kabeta ka ku bulenge kwipi na Yelusalema.

Yesu kechi wajinga bunke ne. Wayijilenga pamo na baana banji ba bwanga ne ‘jibumba jikatampe,’ kubikapotu ne basonkeshi ne bandengamambo. (Luka 14:25; 15:1) Bafaliseo ne banembeshi, balengulwilenga byaambilenga Yesu ne byo aubilenga nabo bajingapo. Kwajinga bintu byavula bingi byo balangulukilengapo panyuma ya kumvwa bishimpi byaambile Yesu, kya mukooko waelekele, kya mwana waelekele, ne kya mwanamulume nonshi ne Lazalasa.—Luka 15:2; 16:14.

Kampe na mambo a kulanguluka pa byo bamulengulwilenga ne kumwendeleka ku balwanyi banji, Yesu watendekele kufunjisha baana banji ba bwanga. Wibafunjishe bintu byo afunjishe kimye kyo ajinga mu Ngalilea.

Waambile’mba: “Kya kine bya kwituntulako bantu bikeya. Pano bino, malwa anji awa muntu mo bikeshila! . . . Jimukai. Umvwe mulongo wenu walenga mambo, mukajipilai, kabiji umvwe walapila, mulekelaiko mambo. Nangwa kya kuba wimulenga mambo bimye bitanu na bibiji pa juba, ne aye wabwela kwi anweba bimye bitanu na bibiji amba, ‘Nalapila,’ mwafwainwa kumulekelako mambo.” (Luka 17:1-4) Byambo byo apezhezheko kwamba byafwainwa byavulwilemo Petelo bwipuzho bo aipwizhe pa kulekelako muntu mambo bimye bitanu na bibiji.—Mateo 18:21.

Abya baana ba bwanga bakonsheshe kulondela bibafunjishenga Yesu nyi? Byo baambijile Yesu amba, “Vuzhai lwitabilo lwetu,” aye wibambijile’mba: “Umvwe muji na lwitabilo nobe luchacha wa masitate, mukambila kikye kichi kya malubenyi amba, ‘Jimbuka ne kujimbwa mu kalunga ka mema!’ ne akyo kikemukookela.” (Luka 17:5, 6) Kya kine, nangwatu lwitabilo lucheche lwakonsha kulengela muntu kuba bintu bya kukumya bingi.

Yesu wafunjishe buneme bwa kwipelula byo aambijile batumwa banji amba: “Ñanyi pe anweba uji na kalume ubena kujima mu bujimi nangwa ubena kufunga jitanga ja mikooko umwambila inge wabwela kufuma ku bujimi amba, ‘Iya kuno wikale na kuja ku tebulu’? Nanchi kechi wakonsha kumwambila’mba, ‘Nnengezhezhe kajo ka mulajilo, kabiji unyinge apolonyi ne kuñingijila poso mpwishe kuja ne kutoma, apa bino ne obewa uje ne kutoma’ nenyi? Nanchi aye ukamusanchila uno kalume na mambo a kuba waingila mwingilo ye baji kumupa nyi? Byonkabyo, ne anweba umvwe mwapwisha kwingila byonse byo bemupa, ambai’mba: ‘Atweba twi bakalumetu. Twaubatu kyonka kyo twafwainwa kuba.’”—Luka 17:7-10.

Kalume wa Lesa yense wafwainwa kuyuka buneme bwa kutangizhako Bufumu bwa Lesa. Kabiji wafwainwa ne kupopwela Lesa pamo na kisemi kyanji.

Kyamweka Yesu aku upwishatu kwela kino kishimpi, muluwe wafikile wafumine ku ba Maliya ne Mata. Bano banyenga ya kwa Lazalasa baikalanga ku Betani wa mu Yudea. Uno muluwe waambile’mba: “Nkambo, awa ye mwatemwa, wakolwa.”—Yoano 11:1-3.

Nangwa kya kuba Yesu waumvwine’mba mulunda nanji Lazalasa wakolwa, bino kechi waumvwine bulanda ne. Waambile’mba: “Kino kikola kechi kya lufu ne, bino kyo kya lukumo lwa Lesa, kuba’mba Mwana Lesa atumbijikilwemo.” Waikele kokwa ko ajinga pa moba abiji kepo abujile baana banji ba bwanga amba: “Twayai tubwele jibiji ku Yudea.” Baana banji ba bwanga bamushikishe’mba: “Labi, katatakatu papo bena Yudea basakile kwimwasa mabwe, kabiji mukeba kubwelako jibiji nyi?”—Yoano 11:4, 7, 8.

Yesu wakumbwile’mba: “Nanchi kechi kuji maola 12 a mute nenyi? Umvwe muntu waenda mu mute, kechi wituntula ku kintu nangwa kimo ne, mambo umona kyeya kya ba pano pa ntanda. Bino umvwe muntu waenda bufuku, wituntula, mambo mwi aye kechi muji kyeya ne.” (Yoano 11:9, 10) Kyamweka Yesu walumbulwilenga’mba kimye Lesa kyo apele  Yesu kya kwingijilamo mwingilo wanji pano pa ntanda kyajinga kikyangye kufika. Wafwainwe kwingijisha bulongo kimye kicheche kyo ashajile nakyo.

Yesu wanungilepo’mba: “Lazalasa mulunda netu, walaala tulo, bino mbena kuya konkakwa na kumubusha.” Baana banji ba bwanga byo balangulukilenga’mba Lazalasa walaala tulo kabiji amba usakukosa baambile’mba: “Nkambo, umvwe walaalatu tulo, ko kuba’mba usakwikalatu bulongo.” Kepo Yesu ebambijile kipasu amba: “Lazalasa wafwa. . . Bino twayai tuye ko aji.”—Yoano 11:11-15.

Tomase byo ayukile’mba Yesu basakile kumwipaya mu Yudea, ne byo akebeshe kumukwasha, watundaikile bakwabo baana ba bwanga amba: “Ne atweba twayai tuyeko, kuba’mba tukafwile nanji pamo.”—Yoano 11:16.