O Yesu kuna “simu dia Yodani” kena, muna zunga kia Pereia. (Yoane 10:40) Owau wele kuna sude ya Yerusaleme.

Yesu kena yandi mosi ko. Alongoki andi bele yandi e ntwadi, kumosi mpe ye “ndong’ayingi,” ye avakulwisi a mpaku ye asumuki. (Luka 14:25; 15:1) Afarisi ye asoneki, ana bevezanga malongi ma Yesu ye salu yandi, oyau mpe bela landi Yesu. Mayingi bena yindula mu kuma kia yingana ina o Yesu katele. Kingana kia meme diavila, kia mwana wavila ye kia mvuama yo Lazaro.—Luka 15:2; 16:14.

Nanga mu kuma kia luvezo lwa atantu andi, Yesu osidi e sungididi kwa alongoki andi. Ovutukidi diambu dimosi kabalonga kuna Ngalili.

Yesu ovovese alongoki andi vo: “Mambu metesesa wantu e sakuba kwiza kaka mekwiza. Kansi, tâtu kwa ndiona mekwizila! Diambote kwa yandi avo ozembelekwa tadi dianene muna laka, katubwa muna mbu, ke mu tesesa sakuba ko kwa mosi mun’awaya andwelo. Nutoma kuyilunga-lunga kweno. Avo mpangi aku usumukini, untumba, avo ovilukilu o ntima, unloloka. Avo nsumuka nsambwadi kekusumukina muna lumbu kimosi, yo kuvutukila nkumbu nsambwadi, oku vo, ‘Mpilukidi o ntima,’ ofwete kunloloka.” (Luka 17:1-4) E diambu dia nsuka kavovele o Yesu disungamese Petelo e kiuvu kina kayuvula mu kuma kia loloka muntu nkumbu nsambwadi.—Matai 18:21.

Nga alongoki belemvokela e mvovo mia Yesu? Vava bavovesa Yesu vo, “Utukudikila lukwikilu,” Yesu wabavuvika o ntima muna mvovo emi: “Avo lwina yo lukwikilu nze disu dia mutade, nulenda vovesa nti wau wa sikamina vo, ‘Vuzuka, wakununuka muna mbu!’ ukunulemvokela.” (Luka 17:5, 6) Kieleka, kana nkutu lukwikilu lwakete, lulenda vanga mambu mampwena.

Yesu oyantikidi longa o mfunu wa kala nlembami, ovovese alongoki andi vo: “Nani vovo nwina, una ye ntaudi ovatanga yovo ovungulanga e kambi, avo otombokele muna mpatu, kamvovesa vo, ‘Wiza-wiza oku meza wadia’? Ozevo, nga ke kumvovesa ko vo, ‘Nda kubika madia mame, vuata nlele aku a salu, wansadila yavana idia yo nua, i bosi ongeye odia yo nua’? Nga tonda ketonda ntaudi yayina, wau kavangidi dina kavoveso e? Diau adimosi mpe, oyeno avo nuvangidi mawonso nuvoveso, nuvova vo: ‘Yeto tu ntaudi zakondwa mfunu. Tuvangidi mana tufwete vanga.’”—Luka 17:7-10.

Konso selo kia Nzambi kafwete bakula o mfunu wasia mambu ma Nzambi vana fulu kiantete muna zingu. Vana ntandu, konso muntu mu yeto kafwete vilakana ko e lau tuna diau dia sambila Nzambi.

Ke kolo ko, o nati a nsangu watumwa kwa Maria yo Mareta olueke. Maria yo Mareta nsanga za Lazaro, muna Betania ya Yuda bekalanga. O nati a nsangu ovovele vo: “E Mfumu, ndiona ozolanga oyelele.”—Yoane 11:1-3.

Kana una vo Yesu owidi vo nkundi andi Lazaro oyelele, katelamene moyo ko. Ovovele vo: “O yela kwaku ke kwafwila ko, kansi nkembo a Nzambi kutwasa, kimana o Mwan’a Nzambi kakembelèlwa mo.” I bosi, ovovese alongoki vo: “Tuvutuka kuna Yuda.” Alongoki bamvovese vo: “E Rabi, ke kolo ko Ayuda bavavidi kutuba matadi, i kuna diaka ozolele vutuk’e?”—Yoane 11:4, 7, 8. 

Yesu ovutwidi vo: “Nga ke mwina ola 12 ko muna mwini e? O muntu, avo mu mwini kekangala, keta sakuba ko, e kuma kadi ntemo a nza yayi kemonanga. Kansi, o muntu avo mu fuku kekangala, sakuba keta, e kuma kadi o ntemo ke wina mu yandi ko.” (Yoane 11:9, 10) Nanga edi kazolele vova vo, e mvu mina Nzambi kasikidisa kimana Yesu kasala e salu kiandi ke mifokokele ko. Yavana mifokoka, Yesu kafwete sadila e ntangwa yakete kasidi yau.

Yesu ovovele diaka vo: “O nkundi eto Lazaro olele, kansi kûna ikwenda yansikamesa.” Alongoki babenze vo Lazaro leka kikilu kalele, se kasasuka kwandi. Dianu vo, bavovese Yesu vo: “E Mfumu, wau vo leka kalele, sasuka kesasuka.” Yesu otomene kubakiesesa vo: “Lazaro wafwidi . . . Kansi yambula twenda kwa yandi.”—Yoane 11:11-15.

Alongoki wau bazeye vo Yesu olenda vondwa muna Yuda, bazolele kuntanina. Toma ovovese akwandi alongoki vo: “Twenda mpe, kimana twafwa yandi.”—Yoane 11:16.