Kitatyi kimo, Yesu wadi mu ntanda itwa bu Pelea idi “bukila bwa Yodano.” (Yoano 10:40) Pano waenda dya kunshi dyenda ku Yelusalema.

Yesu kadipo bunka. Wendanga pamo na bandi bana ba bwanga pamo ne “bibumbo bikatampe,” kubadila’mo ne basonkeja musonko ne babipya-mambo. (Luka 14:25; 15:1) Bafadiseo ne basonekeji, bene batopeka Yesu pa byanena ne byalonga, nabo badi’po. Badi na bivule bya kulangulukila’po pa kupwa kwivwana Yesu usekununa kyelekejo kya mukōko mujimine, mwana mujimine, mpeta ne Lazalasa.​—Luka 15:2; 16:14.

Padi Yesu ukivulukile matope ne mifutululo ya balwana nandi, o mwanda waalamukila kwisamba na bana bandi ba bwanga. Watenga myanda imo yaafundije mafuku kunyuma mu Ngadilea.

Kimfwa Yesu wanena’mba: “Bya kukukaja binenwe’nka kwiya. Inoko, malwa andi yewa wibileta! . . . Mwitei mutyima banwe bene. Shi mwanenu wapi mambo, mufunine, ino shi wesāsa, mulekele. Nansha shi wakupi mambo misunsa isamba-ibidi ku difuku kupwa waiya kodi misunsa isamba-ibidi, unena’mba, ‘Nesāsa,’ ufwaninwe kumulekela.” (Luka 17:1-4) Padi bino binenwa ye bino bibavuluja Petelo kipangujo kyaipangwile kitala kulekela misunsa isamba-ibidi.​—Mateo 18:21.

Le bana ba bwanga bakabwanya kulonga mungya binenwa bya Yesu? Pobanena Yesu amba, “Witubweje’ko lwitabijo,” webakulupija amba: “Shi mwadi na lwitabijo lwa bukata bwa luze lwa mutade, mwadi ba kunena uno mutyi wa tundyamu amba, ‘Juka kekune mu dijiba!’ nao wadi wa kwimukōkela.” (Luka 17:5, 6) Bine ludingo lwa lwitabijo lubwanya kulonga bintu bikatampe.

Yesu waendelela na kufundija kamweno kadi mu kwikala mwityepeje, ne kwimona na bujalale, na kunena batumibwa bandi amba: “I ani pomudi’po udi na umpika udima nansha ukumba luombe, ukamunena shi wajoka mu madimi’mba, ‘Iya kuno bukidi udye ku meza’? Ino, le kakamunenapo amba, ‘Nongolwele’ko bidibwa bya kyolwa, vwala kisandi kya kaji uñingidile enka ne byompwa kudya ne kutoma; penepa nobe kōdi ne kutoma’? Kakafwija’kopo umpika, mwanda waloñanga bintu bimupelwe kulonga, mwene i amo? Banwe nenu, shi mubalonga bintu byonso bimupelwe kulonga, nenai’mba: ‘Twi bapika ba bituputupu. Byotwalonga i byotwadi tunenwe kala kulonga.’”​—Luka 17:7-10.

Mwingidi yense wa Leza ufwaninwe kwivwanija’mba kutūla tumweno twa Leza pa kifuko kibajinji kudi na kamweno. Ne kadi, muntu yense ufwaninwe kuvuluka dyese dyadi nadyo dya kutōta Leza bu muntu wa mwinjibo yandi.

Mobimwekela, i kupwa’tu pano, pafika mukendi utuminwe na ba Madia ne Mata. I banababo na Lazalasa bana-bakaji, kadi bashikatanga mu Betani wa Yudea. Mukendi ubanena’mba: “Mfumwetu, tala! yewa osenswe kisanso kikatampe ubelanga.”​—Yoano 11:1-3.

Yesu pa kuyuka’mba mulunda nandi Lazalasa wabela bininge, kakwetwepo bulanda. Ino aye wanena’tu amba: “Ino misongo ke ya kufikijapo ku lufu, aa, ino i mwanda wa ntumbo ya Leza.” Washikata’nka paadi’pa mafuku abidi, kupwa wasapwila bandi bana ba bwanga amba: “Twayai monka mu Yudea.” Abo abapele’mba: “A Labi, mwene i enka panō padi pakimba bene Yudea kukwasa mabwe, kadi koenda’ko monka?”​—Yoano 11:4, 7, 8.

Yesu walondolola’mba: “Mwene mu dyuba mudi nsá 12? Shi muntu unanga dyuba, kakukalangapo ku kintu, mwanda umwene kitōkeji kya ino ntanda. Ino shi muntu unanga bufuku, ukukalanga, mwanda kitōkeji kekidipo mwadi.” (Yoano  11:9, 10) Mobimwekela usaka kunena’mba kitatyi kipelwe Yesu na Leza mwanda wa mwingilo wandi kekyapwile. Byokikidi’ko, Yesu usaka kwingidija ne pa mfulo kitatyi kityetye kimushadile’ko.

Yesu ubweja’ko amba: “Lazalasa mulunda netu walāla, ino keñenda’ko nkamulangule.” Bana ba bwanga pa kulanga’mba Lazalasa ukōkolokwanga bitupu usa kubūka, abanena’mba: “A Mfumwetu, shi ulēle, nankyo usa kukoma.” Yesu webasapwila patōkelela’mba: “Lazalasa wafu . . . Pano twayai kwadi.”​—Yoano 11:11-15.

Tomase pa kuyuka’mba Yesu ubwanya kwipaibwa mu Yudea, ne byadi na mutyima wa kumukwatakanya, wanena bana ba bwanga bakwabo amba: “Twendei netu, amba tukafwe nandi pamo.”​—Yoano 11:16.