Yesu apwile mungalila vavulukile ngwavo muPeleya, “musali yaYotau.” (Yowano 10:40) Kaha ayile jino kusulo chakutalisa kuYelusalema.

Yesu kapwile nakuya ukawenyiko. Apwile natumbaji twenyi ‘namayongomena’ avatu, kuhakilako vene navaka-kutambula mitelo navaka-shili. (Luka 14:25; 15:1) VaFwaliseu navaka-kusoneka vaze vahungile vyuma apwile nakuhanjika Yesu nakulinga kuvapwile navakiko. Vapwile navyuma vyavivulu vize vatelele kushinganyeka omu Yesu ahanjikile hachifwanyisa chamukoko wakujimbala, namwana wakujimbala, namuka-luheto naLazalu.—Luka 15:2; 16:14.

Pamo Yesu ashinganyekele havyuma vamulumbilishile vaka-kole jenyi nakumupopolola, ngocho chamulingishile ahanjike kuli tumbaji twenyi vyuma avulukile hakavanga mukunangula chenyi kuNgalileya.

Chakutalilaho, Yesu ambile ngwenyi: “Vyuma vyakuhukanyisa vatu kakweshi jila yakuvihoneselamoko. Olozenyi lamba kuli ou mwavineha! . . . Lilamenunga enu vavene. Kachi nge ndumbwove nalingi shili, muhuhumune, kaha nge mwapihilila nakwalumuka, mukonekele. Numba vene nge mwakuvulumuna mapapa 7 halikumbi lyolimwe nakwiza cheka kuli ove mapapa 7 nakwamba ngwenyi, ‘Ngunapihilila nakwalumuka,’ watela kumukonekela.” (Luka 17:1-4) Awa mazu akukumishilako atela akafwile Petulu anuke chihula ahulishile kutalisa kukukonekela mapapa 7.—Mateu 18:21.

Uno tumbaji twaYesu valingile vyuma muka kweseka namazu ahanjikile Yesu? Omu valwezele Yesu ngwavo, “Tukafwe tupwenga nalufwelelo lwalunene,” ikiye ambile kuli vakiko ngwenyi: “Kachi nge mwapwanga nalufwelelo lwakweseka hamwe nalinona lyamusetale, munahase kwamba kumundosa ou ngwenu, ‘Tukuka hano, litumbe mukalungalwiji,’ kaha nawononoka kuli enu.” (Luka 17:5, 6) Eyo, nalufwelelo lwalundende lunahase kuzata vyuma vyavinene.

Yesu atwalileho kunangula vaposetolo jenyi omu chalema kupwa vakulinyisa, ambile ngwenyi: “Iya hali enu ali nandungo yenyi uze ali nakulima chipwe ali nakufunga utanga wavimuna, kaha omu mwafuma kuwande nakwiza hembo himwamwamba ngwenyi, ‘Twaya washi ulyenga vyakulya kumesa’? Uno keshi kwamba kuli ikiye ngwenyi, ‘Nguwahishile kulya chami chachingoloshi, kaha vwala lipunu, unguzachile palanga nomu nangumanyisa kulya nakunwa numba ove ulyenga nakunwako’ nyi? Keshi kusakwilila uze ndungo hakulinga vyuma amulwezanga kulingako, nyi mweka? Ngocho nayenu nawa, nge munalingi lyehi vyosena vanamilweze kulinga, ambenu ngwenu, ‘Etu tuvandungo vamokomoko kaha. Vyuma tunalingi vikiko vene twatelanga kulinga.’”—Luka 17:7-10.

Vangamba jaKalunga vosena vatela kutachikiza ngwavo chapwa chachilemu kuhaka Wangana waKalunga kulutwe. Kaha mutu himutu atela kwanuka kutokwa atwama nacho chakulemesa Kalunga hakupwa mutu wamuzuvo yenyi.

Kufumaho, kuli Yesu kwejile mutu uze vatumine kuli Maliya naMalita. Ava mapwevo vapwile vandumbu jaLazalu, kaha vatwaminenga muMbetane, nganda yamuYuleya. Uze mutu vatumine ambile ngwenyi: “Ivwa, ove Mwata! Mutu uze wazanga ali nakuviza.”—Yowano 11:1-3.

Numba tuhu Yesu vamulwezele ngwavo sepa lyenyi Lazalu naviji chikuma, oloze ikiye kalizakaminyineko. Ambile ngwenyi: “Kuviza kanechi kacheshi chakutwala kukufwako, oloze chinapu chakumutohweselaho Kalunga, mangana naMwanaKalunga vahase kumutohweselaho.” Yesu atwamine vene kuze apwile makumbi avali, kaha alwezele tumbaji twenyi ngwenyi: “Tuyenu cheka kuYuleya.” Oloze vakiko vakanyine ngwavo: “Ove Lapi, kalinwomu vene vaYuleya vasakanga kukwasa malolwa, kaha kukiko nauya cheka nawa?”—Yowano 11:4, 7, 8.

Yesu avakumbulwile ngwenyi: “Uno kakwatwama jola 12 jamusanako nyi? Kachi nge mutu mwatambuka namusana, keshi kuhukana kuchuma numba chimweko, mwomwo ali nakumona mumunyi wakaye  kano. Oloze kachi nge mutu mwatambuka naufuku, mwahukana, mwomwo kumunyika kacheshi muli ikiyeko.” (Yowano 11:9, 10) Yesu apwile nakulumbununa nge lwola luze vamuhanyine kuli Kalunga lwakuzata mulimo wenyi wakwambulula kulwapwile lika. Yesu azachishile kanawa lwola luze lwasalileko palanga nomu lwakumine.

Yesu ambile ngwenyi: “Sepa lyetu Lazalu nasavala, oloze nanguyako mangana ngukamuhindule.” Tumbaji twenyi vashinganyekele ngwavo Lazalu asavalile kaha tulo, kaha mwahinduka, ngocho vambile ngwavo: “Ove Mwata, kachi nge nasavala, kaha mwahinduka.” Yesu avalwezele hatoma ngwenyi: “Lazalu nafu. . . . Tuyenu jino kuli ikiye.”—Yowano 11:11-15.

Tomase hakutachikiza ngwenyi Yesu vanahase kukamujihila kuYuleya, kaha nawa katela kuya ukawenyiko, ambile kuli vakwavo tumbaji ngwenyi: “Tuyenu nayetu nawa mangana tukafwile nenyi hamwe.”—Yowano 11:16.