Kuom kinde, Yesu osebedo e alwora mar Perea man “loka Jordan.” (Johana 10:40) Sani koro owuok kochomo mwalo Jerusalem.

Yesu ok wuoth kende. Owuotho gi jopuonjrene kaachiel gi “oganda mang’ongo” moriwo nyaka josol osuru gi joricho. (Luka 14:25; 15:1) Jo-Farisai gi jondiko mosebedo ka kwedo puonj kod gik ma Yesu timo bende ni kanyo. Onge kiawa ni pod giparo ranyisi ma ne Yesu ochiwo e wi rombo molal, wuowi ma ne olal, kod mar jamwandu kod Lazaro.​—Luka 15:2; 16:14.

Nenore ni Yesu pod paro kaka jo akwedego nojare kendo notwenyone umgi. To kar keto pache e wi wachno, okawo thuolo mondo opuonj jopuonjrene moko kuom weche ma yande osepuonjogi ka en Galili.

Kuom ranyisi, Yesu wacho niya: “Gik ma kelo chwanyruok nyaka bi. To yaye nobed malit ne ng’at ma gigo nobi kokalo kuome! . . . Beduru motang’. Ka owadu otimo richo, kwere matek, to ka oloko chunye oa e richono, wene. Kata ka otimoni richo nyadibiriyo e odiechieng’ achiel mi oduogo iri nyadibiriyo kowacho ni, ‘Aloko chunya a e richo,’ nyaka to iwene.” (Luka 17:1-4) Nyalo bedo ni weche mogikgo paro ne Petro penjo moro ma ne osepenjo Yesu e wi weyo ne ng’ato richone nyadibiriyo.​—Mathayo 18:21.

Be jopuonjore ne dhi luwo kaka Yesu wachonegi? Kane gipenjo Yesu ni: “Miwae yie momedore,” Yesu ne ojiwogi niya: “Ka da bed ni un gi yie kata mana ma rom gi koth karadali, da uwacho ne yadh onungani kama, ‘Pudhri ia kae idhi ipidhri e nam!’ to obiro winjou.” (Luka 17:5, 6) Ee, kata mana yie e okang’ moro nyalo timo gik madongo.

Yesu dhi nyime puonjo gimomiyo ng’ato onego obolre ma ok obedo gi paro mokalo tong’ kuome owuon. Owacho ne jootene kama: “En ng’a kuomu ma ka nigi misumba ma purone kata ma ritone kueth, to onyalo wacho ne misumbano koduogo oa e puodho ni, ‘Bi kae mapiyo kendo ibed piny e mesa mondo ichiem’? Kar mano, donge obiro wachone ni, ‘Ikna chiemba modhiambo kendo rwak law apron mondo itina nyaka chop atiek chiemo gi metho, eka bang’ mano inyalo chiemo kendo metho’? Ok obi pwoyo misumbano nikech timo tije ma noketne ni otim, donge? Kamano bende, ka usetimo duto moketnu mondo utim, wachuru ni: ‘Wan mana wasumbni ma kayiem nono. Gik ma wasetimo e gik ma nonego watim.’”​—Luka 17:7-10.

Ng’ato ka ng’ato ma tiyo ne Nyasaye onego ong’e gimomiyo dwarore ni oket dwaro mar Nyasaye obed mokwongo e ngimane. E wi mano, ng’ato ka ng’ato onego obed mamor gi migawo makende ma en-go mar lamo Nyasaye ka en achiel kuom joode.

Nenore ni mapiyo nono bang’ mano, ng’at moro moor chopo kanyo. Nyimine Lazaro ma gin Maria gi Maritha e ma oore. Nyiminego odak Bethania e alwora mar Judea. Ng’at ma oorno wacho kama: “Ruoth, ne! osiepni mihero tuo.”​—Johana 11:1-3.

Kata obedo ni osewach ne Yesu ni tuo ohewo Lazaro osiepne, mano ok go Yesu gi kibaji. Kar mano, owacho niya: “Tuoni ok bi kelo tho, to en mar nyiso duong’ ma Nyasaye nigo mondo eka Wuod Nyasaye oyud duong’ kokalo kuom tuono.” Yesu medo bedo kama entiereno kuom ndalo ariyo kae to owacho ne jopuonjrene kama: “Wadhiuru Judea kendo.” Gikwere kama: “Rabi, nyocha eka Jo-Judea dwaro chieli gi kite, to idok kuno kendo?”​—Johana 11:4, 7, 8.

Yesu dwokogi niya: “Donge odiechieng’ nigi seche 12 mag ler, koso? Ka ng’ato wuotho e ler mar odiechieng’ ok ochwanyre e gimoro amora,  nikech oneno ler mar pinyni. To ka ng’ato wuotho gotieno, ochwanyore nikech ler onge kuome.” (Johana 11:9, 10) Nenore ni tiend gima owacho en ni thuolo ma Nyasaye omiye mar tiyonego e piny kae pok orumo. Nyaka chop kindeno, dwarore ni Yesu oti maber chuth gi thuolo manok modong’go.

Yesu medo wacho kama: “Lazaro osiepwa nindo, to adhi kuno mondo achiewe.” Nikech jopuonjre paro ni Lazaro yueyo ayueya kendo ni obiro chango, giwacho ne Yesu niya: “Ruoth, kare ka onindo to obiro winjo maber.” Eka Yesu wachonegi ayanga kama: “Lazaro otho . . . To wadhiuru ire.”​—Johana 11:11-15.

Thoma dwaro konyo Yesu nikech ong’eyo ni dipo ka onege Judea. Kuom mano, ojiwo jopuonjre wetene niya: “Wan bende wadhiuru mondo watho kode.”​—Johana 11:16.