Jesu wapeja mukuvo ari Pereya, “mwombera mwo Jordani.” (Johani 10:40) Wari anoringa kakusi, acienda Jerusarema.

Jesu aaripi ega. Vajiji vake vanoenda nae pamwepo no vandhu “vazinji,” kubatanijavo vashabisi no vashaishi. (Luka 14:25; 15:1) VaFarisi no vatari varipovo, vanoshoraya zvinonanga Jesu no zvaanoita. Ivona vano zvakawanda zvo kurangarira pasure po kunanga ka Jesu mufananijo ngo pamusoro po bvuta rakasvejeka, mwana wainga wakasvejeka no womukhupuki na Razaro.—Luka 15:2; 16:14.

Kangaije acindhorangarira ngo kuvereketehwa kwaanoitwa ngo vanomuzonda, Jesu anotanga kubhuya no vajiji vake. Iyena anopsasa mafundo aakajijisazve mu Garireya.

Inga muezaniso, Jesu anoti: “Atingagari ticina bzikhugu. Kaveta khombo kwaari anoita kuti bzikhugu bziite ngo ndava yake. . . . Basopanyi! Hama yako ikakuxaixira, ipangirei. Kudari ikatenderuka, ikungurirei. Kudari yona yecikuxaixira runomwe pa njiku, yozovia kokupsanga, yeciti runomwe kuti: ‘Ndatenderuka,’ unozoikungurira basi.” (Luka 17:1-4) Kangije masoko okupejisira aya anoceuja Pedhru mubvunjo waakaita ngo pamusoro po kuregerera runomwe.—Mateu 18:21.

Waro vajiji vanokwanisa kuita mukuzwirana no zvanangari Jesu here? Povanokumbira Jesu kuti, “engejeranyi kutenda kwedu,” iyena anovanyindisa kuti: “Mukava no kutenda kudari inga mbhumba yo pfunde [kana mostardha], maizonanga ku muti uwo kuti: ‘Jibvitei, uende kojisima mu jombe,’ iwona waizomuzwira.” (Luka 17:5, 6) Zvokadi kamare, kudari vakava no kutenda kudoko, vanokwanisa kuita zviro zvikuru.

Jesu anoenderera mberi acijijisa kusisira ko kujivona ngo maitiro o kujidodokesa no akaezanana. Iyena anobvunja vapostori kudari: “Ngowapi wenyu, ano muranda anorima mu munda, nokuti anohavisa bzifuyo, akavia ku munda anomubvunja, kuti: ‘Nghwinai ngo kukasika, garai po kuhira’? Aazoambi, here, kumubvunja kuti: ‘Ndinasirirei bzokuha, simirai, undizisire bzokuha, ndihe no kumwira; sure kwabzo iwewe unozoha no kumwavo’? Tenji anozobonga muranda, kani, ngokuti wakaita bzaakatumwaro? Ndibzonavo bzondhobzo imwimwi, sure ko kuita bzese bzo makatumwa, nanganyi kuti: ‘Tiri varanda vacingafaneri ciro. Taita basi bzo taidikana kuita.’”—Luka 17:7-10.

Mushandiri umwe na umwe wa Mwari anodikana kuzwisisa kusisira ko kudira pakutanga zvinoda Mwari. Kusiyapo izvo, umwe na umwe aadikani kukanganwa rudakajiso hwaanahwo hwo kunamata Mwari inga umwe wo vopambhuri yake.

Zvinovoneka inga kuti pasure pazvo, inoguma ndhumwa inobva ka Maria na Marta, hambzaji ja Razaro. Ivona vanogara mu Bhetania yo Judheya. Ndhumwa iyi inoti: “Tenji, wiya wo unoda, ari kuhwaja.”—Johani 11:1-3.

Pikija eciziva kuti shamwari yake iri kuhwaja maningi, Jesu aakonehwi cokuita ngo kusuruvara. Iyena anoti: “Ndhenda ii aiurai, kaveta nja kupa goja Mwari, kuti Mwana wo mundhu akojwe ngo ndava yayo.” Anogara njiku ndhatu perepo wobvunja vajiji vake kuti: “Ngatihwirire Judeya!” Ivona vanon’gun’guta vaciti: “Mujijisi! Sambi wari vaJuda vaida kumufura ngo mapuwe, waro munodabze kuendeyo?”—Johani 11:4, 7, 8.

Jesu anodavira kudari: “Ngari yo njiku aiiti gumi na mbiri, kani? Ndiani anofamba masikati aakhugunywi, ngokuti anovona kujeka ko nyika ino. Kaveta ndiani anofamba usiku anokhugunywa, ngokuti aana rujeko.” (Johani 11:9,  10) Zvinovoneka kuti Jesu ari kunanga kuti mukuvo waakapuwa ndi Mwari kuti aite mushando wake auto wapera. Ngokudaro, anodikana kunasa kushandisa mukuvo wasarari.

Jesu anoengejera eciti: “Lázaro, xamwari yedu, wakavata. Kaveta ndinoenda komumusa.” Zvinovoneka kuti vanorangarira kuti Razaro wakazorora hake, anozovanga. Vajiji vanoti: “Tenji, kudari yena wakavata, anozorarama.” Jesu anovabvunja acikasiki-siki kuti, “Lázaro wafa. . . . Wari ngatende kwaari.”—Johani 11:11-15.

Eciziva kuti Jesu anozourawa mu Judheya zve ecida kumubesera, Tomasi anobvunja vajijidoni kudari: “Ngatende tese, tofa nayena!”—Johani 11:16.