Jesu o tšere nakwana a le tikologong ya ka “mošola wa Noka ya Jorodane” yeo e bitšwago Perea. (Johane 10:40) Bjale o lebile ka borwa thokong ya Jerusalema.

Jesu ga a sepele a nnoši. O sepela le barutiwa ba gagwe gotee le “mašaba a magolo,” go akaretša le balekgetho le badiradibe. (Luka 14:25; 15:1) Bafarisei le bamangwalo, bao ba solago seo Jesu a se bolelago le seo a se dirago, le bona ba gona moo. Ba na le dilo tše dintši tšeo ba swanetšego go nagana ka tšona ka morago ga go kwa Jesu a laodiša seswantšho sa mabapi le nku e timetšego, morwa yo a timetšego gotee le sa mabapi le mohumi le Latsaro.—Luka 15:2; 16:14.

Mohlomongwe ge Jesu a sa dutše a nagana ka go sola le go šinyalala ga baganetši ba gagwe, o lebiša šedi go barutiwa ba gagwe. O bolela ka tše dingwe tša dintlha tšeo a ilego a di ruta pejana kua Galilea.

Ka mohlala, Jesu o re: “Ga go phemege gore dikgopišo di be gona. Lega go le bjalo go madimabe yo di tlago ka yena! . . . Itlhokomeleng. Ge e ba ngwaneno a dira sebe o mo kgalemele gomme ge e ba a itshola, o mo lebalele. Gaešita le ge e ba a go senyetša ka makga a šupago ka letšatši gomme a boela go wena ka makga a šupago, a re: ‘Ke a itshola,’ o mo lebalele.” (Luka 17:1-4) Mantšu ao a ka ba a gopotša Petro potšišo yeo a ilego a e botšiša ya mabapi le go lebalela ka makga a šupago.—Mateo 18:21.

Na barutiwa ba tla kgona go dira dilo ka go dumelelana le mantšu a Jesu? Ge ba bolela le Jesu, ba re: “Re nee tumelo e oketšegilego,” yena o ba kgonthišetša ka gore: “Ge e ba le be le na le tumelo e lekanago le thoro ya sehlare sa mosetata, gona le be le tla re go sehlare se sa mmurupei o moso: ‘Tumoga mo o bjalege lewatleng,’ gomme se be se tla le kwa.” (Luka 17:5, 6) Ee, gaešita le tumelo e nyenyane e ka dira gore motho a kgone go dira dilo tše dintši.

Jesu o tšwela pele go ruta mabapi le bohlokwa bja gore motho a itebelele ka tsela e lekalekanego le ya boipoetšo. O botša baapostola gore: “Ke mang go lena yo a nago le mohlanka yo a lemago goba yo a dišago mohlape, yo a ka rego go yena ge a fihla a etšwa tšhemong a re: ‘Etla mo kapejana o dule tafoleng’? Go e na le moo, na a ka se re go yena: ‘Ntokišetše dijo tša go lalela, o apare thetho o mphe tše ke di nyakago go fihla ke fetša go ja le go nwa gomme ka morago wena o ka ja le go nwa’? Na a ka leboga mohlanka yoo gobane a dirile dilo tšeo a di abetšwego? Ka gona le lena ge le dirile dilo ka moka tše le di abetšwego le re: ‘Ga re bahlanka ba selo. Seo re se dirilego ke seo re bego re swanetše go se dira.’”—Luka 17:7-10.

Mohlanka yo mongwe le yo mongwe wa Modimo o swanetše go kwešiša bohlokwa bja go etiša dikgahlego tša Modimo pele. Go feta moo, yo mongwe le yo mongwe o swanetše go gopola tokelo yeo a nago le yona ya go rapela Modimo e le setho sa lapa la gagwe.

Go bonagala ka moragonyana ga moo go goroga moromiwa yo a romilwego ke Maria le Mareta. Bona ke dikgaetšedi tša Latsaro e bile ba dula kua Bethania ya Judea. Moromiwa o laodiša ka gore: “Morena, tseba gore motho yo o mo ratago o a babja.”—Johane 11:1-3.

Gaešita le ge Jesu a ekwa gore mogwera wa gagwe Latsaro o babja kudu, ga a nyame kudu. Go e na le moo, o re: “Bolwetši bjo ga se bjo bo išago lehung, eupša ke bja gore Modimo a newe letago, e le gore Morwa wa Modimo a tagafatšwe ka bjona.” O fetša matšatši a mabedi a le moo ke moka o botša barutiwa ba gagwe gore: “A re boeleng Judea.” Ba gana ka gore: “Rabi, ga se kgale Bajuda ba be ba nyaka go go kgatla ka maswika, gomme na o boela moo gape?”—Johane 11:4, 7, 8.

Jesu o araba ka gore: “Na mosegare ga o na diiri tše lesomepedi? Ge e ba motho a sepela mosegare ga a thule selo, gobane a bona seetša sa lefase le. Eupša ge e ba motho a sepela bošego, o thula selo gobane seetša ga se gona go yena.” (Johane 11:9, 10) Go bonagala a era gore nako yeo Modimo a e beetšego bodiredi bja Jesu ga se ya tšwa e fela. Go fihlela e eba nako yeo, Jesu o nyaka go diriša ka botlalo nako e nyenyane yeo e mo šaletšego.

Jesu o oketša ka gore: “Latsaro mogwera wa rena o robetše, eupša ke ya moo go yo mo tsoša.” Ka ge go bonagala gore barutiwa ba gagwe ba nagana gore Latsaro o fo ba a ikhuditše borokong le gore o tla fola, ba re: “Morena, ge e ba a robetše, o tla ba kaone.” Jesu o ba botša ka go lebanya, o re: “Latsaro o hwile . . . Eupša a re yeng go yena.”—Johane 11:11-15.

Ge Thomase a lemoga gore Jesu a ka bolawa kua Judea, fela a nyaka go mo thekga, o kgothaletša barutiwa ba bangwe ka gore: “Le rena a re yeng, gore re yo hwa le yena.”—Johane 11:16.