Medyo abayag a nansiansiay Jesus diad “nibaliw na Jordan” a tatawagey Perea. (Juan 10:40) Natan et sikato lay manbiahe diad abalaten a paarap ed Jerusalem.

Agbukbukor nen Jesus. Kaiba to ray disipulo to a manbiabiahe, ontan met ed “dakel a totoo,” pati saray managsingil na buis tan saray makasalanan. (Lucas 14:25; 15:1) Wadman met iray Fariseo tan eskriba a mamabalaw ed saray ibabaga tan gagawaen nen Jesus. Dakel so kaukolan dan pannonotan kayari ran nadngel iray ilustrasyon nen Jesus nipaakar ed abalang ya karnero, anak ya abalang, tan say mayaman a too tan si Lazaro.​—Lucas 15:2; 16:14.

Nayarin sankanonot nen Jesus so pamabalaw tan pangakantiaw na saramay kontrad sikato, kanian saray disipulo to so kinatongtong to. Imbaga to so pigaran punto ya imbangat to la diad Galilea.

Singa bilang, inkuan nen Jesus: “Agnapaliisan ya onsabi iray pakagapolan. Ingen, pakaskasi la imay too a panlapuan na saratan! . . . Manalwar kayo. No mankasalanan so agim, simbawam, tan no magbabawi, perdonam. Anggano maminpiton mankasalanan ed sika ed loob na sanagew tan maminpiton ompawil ed sika, ya ikuan ton, ‘Magbabawi ak,’ nepeg mon perdonaen.” (Lucas 17:1-4) Diad satay unor iran imbaga to, nayarin anonotan nen Pedro imay intepet to nipaakar ed pamerdona ya anggad maminpito.​—Mateo 18:21.

Nagawaan kasi na saray disipulo iray imbaga nen Jesus? Sanen inkuan dad Jesus, “Aruman moy pananisia mi,” sineguro tod sikara: “No walay pananisia yo a singa kamelag na bukel na mustasa, ibaga yod sayan kiew a mulberi, ‘Nabagot ka tan nitanem kad dayat!’ tan ontulok itan ed sikayo.” (Lucas 17:5, 6) On, anggan say ontan kamelag ya pananisia et baleg so nagawaan to.

Intuloy ya imbangat nen Jesus so kaimportantian na pagmaliw a mapaabeba, tan balansin pakanengneng ed sarili, inkuan tod saray apostol: “Siopad sikayo so walaay aripen a manbabaka odino manpapastol na pulok a no onsabi manlapud uma so aripen to et ibaga ton, ‘Gala la dia, dungo kad lamisaan’? Imbes, agta ibaga ton, ‘Mangiparaan kay pangdeman ko, tan manpales ka tan serbian mo ak anggad nasumpal ak a mangan tan oninum, tan kayarik et nayarian mo lay mangan tan oninum’? Kasin pisalamatan to so aripen lapud sinumpal to iray kimey to? Andi. Mipadpara, no agawaan yo lay amin ya ingganggan ed sikayo, ibaga yon: ‘Ariripen kami labat ya andi-kakanaan. Ginawa mi labat so nepeg min gawaen.’”​—Lucas 17:7-10.

Nepeg a natalosan na kada lingkor na Dios so kaimportantian na pangiyuna ed panlabayan na Dios. Sakey ni, nepeg a tandaan na kada sakey so pribilehyo ton dayewen so Dios bilang membro na sankaabungan to.

Kayari na saya, sinmabi so sakey a mensahero ya imbaki di Maria tan Marta. Agagi ra nen Lazaro, tan manaayam irad Betania, diad Judea. Imbaga na mensahero: “Katawan, nengneng mo! mansasakit imay pinabpablim a kaaro.”​—Juan 11:1-3.

Anggaman naamtaan nen Jesus ya mansasakit si Lazaro, sikatoy ag-abigla. Imbes, inkuan to: “Sayan sakit et agmansumpal ed ipapatey, noagta ed kigloriaan na Dios, pian nigloria so Anak na Dios diad panamegley na satan.” Insan sikatoy duay agew nin nansiansia diman, tan imbaga tod saray disipulo to: “Onla itayo lamet ed Judea.” Balet nanreklamo ra, ya inkuan da: “Rabbi, agano ni may panupak lawari ed sika na saray taga Judea, insan onla ka lamet diman?”​—Juan 11:4, 7, 8.

Inyebat nen Jesus: “Agta walay 12 oras no agew? No say sakey et manakar no agew, anggapoy antokaman a natalapos to, lapud nanenengneng toy liwawa a parad totoo. Balet no say sakey et manakar no labi, walay natalapos to, lapud anggapo ed sikato so liwawa.” (Juan 11:9, 10)  Nayarin say labay ya ibaga nen Jesus et agni asumpal so panaon ya inggeter na Dios parad ministeryo to. Anggad agni asabi itan, kaukolan a sigpot ton usaren so antikey a panaon a nakekeraan parad sikato.

Imbaga ni nen Jesus: “Say kaaro tayon si Lazaro et naugip, balet onla ak diman pian bangonen ko.” Lapud iisipen dan manpapainawa labat si Lazaro tan onabig lanlamang, inkuan na saray disipulo: “Katawan, no sikatoy naugip, sikatoy onabig sirin.” Kanian diniretsa ira nen Jesus: “Inatey lay Lazaro . . . Balet onla itayo ed sikato.”​—Juan 11:11-15.

Lapud amta nen Tomas a nayarin pateyen day Jesus diad Judea, tan siansian labay ton suportaan, oniay impaseseg tod saray kapara ton disipulo: “Onla itayo met, pian ompatey tayon kaiba to.”​—Juan 11:16.