Jesusqa Perea jallpʼapi kashaspa ashkhata Diosmanta yachacherqa. Perea jallpʼaqa ‘Jordán mayu chimpapi’ kasharqa (Juan 10:40). Chantá Jesusqa Jerusalenman purirerqa, Jerusalentaj sur ladopi kasharqa.

Jesuswanqa “ashkha runas” risharqanku. Chay runasmanta wakenqa yachachisqasnin karqanku, wakintaj impuesteros, juchasapa runas ima (Lucas 14:25; 15:1). Jesusman churanakoj fariseos, leymanta yachachejkunapis chay runas ukhullapitaj risharqanku. Jesusqa paykunaman willarqa chinkasqa ovejamanta, chinkasqa qhari wawamantawan kikinchayta. Chantapis willallarqataj qhapaj runamanta, Lazaromantawan kikinchayta (Lucas 15:2; 16:14). Paykunaqa chay kikinchaykunapi sumajta tʼukurinanku karqa.

Chanta Jesusqa ñanta rishaspa Galileapi yachachisqanmanta wakin imasta watejmanta yachachillarqataj. Payqa ichapis chayta yachacherqa enemigosnin payman churanakusqankuta yuyarikusqanrayku.

Pay nerqa: “Imapis kanqapuni runata juchaman urmachinanpajqa. Chaywanpis, ay chay runamanta, pichus wajkunata juchaman urmachin, chaymanta. [...] Allinta qhawakuychej. Sichus hermanoyki contraykita juchallikun chayqa kʼamiy, chay juchanmanta pesachikojtintaj perdonay. Sichus qanchis kutita uj diallapi contraykita juchallikuspa, qanchis kutillatataj kutimun ‘perdonaway’ nispa chayqa, perdonanayki tiyan”, nispa (Lucas 17:1-4). Pedrotajrí chayta uyarispa ichá yuyarikorqa ‘¿qanchis kutitachu hermanoyta perdonanay tiyan?’ nispa nisqanta (Mateo 18:21).

Arí, Jesuspa yachachisqasnenqa mayta kallpachakunanku karqa Jesús yachachisqanman jina kausakunankupaj. Chayrayku paykuna Jesusmanta mañakorqanku: “Yanapawayku astawan creenaykupaj”, nispa. Jesustaj nerqa: “Creesqaykichejchus mostaza mujitu chhikitallanpis kanman chayqa, kay mora sachʼata niwajchej: ‘Sikʼikuspa qochapi saphichakuy’, nispa, kasusunkichejmantaj”, nispa (Lucas 17:5, 6). Arí, mostaza mujitu chhikitallanpis creeyninchej kajtenqa ashkha imasta ruwayta atisunman.

Chantá Jesusqa apostolesninman yachacherqa kʼumuykukoj sonqo kanankuta, maychus kajllatataj paykunamanta yuyanankuta. Pay nerqa: “¿Pitaj qankunamanta kamachinta chajrapi llankʼasqanmanta chayri uywata michisqanmanta kutimojtin ninman: ‘Usqhayta jamuy, tiyaykukuspa mikhuy’, nispa? ¿Manachu astawanpis ninman: ‘Imallatapis waykʼupuway, mandilta churaykukuspataj sirviway, mikhuyta ujyayta tukunaykama. Chaymantaraj qanqa mikhunki, ujyankitaj’, nispa? Patronqa mana kamachinta agradecenqachu, kasukusqanmanta, ¿icharí? Ajinallatataj qankunapis, Diospa kamachisqanta tukuyninta kasuspaqa, niychej: ‘Ni imapaj valej kamachis kanchej. Ruwasqanchejtaqa ruwananchejpuni karqa’, nispa” (Lucas 17:7-10).

Diospa kamachisnenqa Diospaj llankʼayta ñaupajman churana tiyan. Imajtinchus Diosta yupaychay, llajtanpi kaypis may sumajpuni.

Chantá uj runa Jesusta tariparqa. Paytaqa Lazaroj hermanasnin Mariawan, Martawan kachasqanku Jesusman ninanpaj: “Señor, munasqa amigoyki onqosqa kashan”, nispa (Juan 11:1-3). Lazaroqa Judeamanta Betaniapi tiyakorqa.

Jesusqa amigon Lázaro onqosqa kashasqanta willasqankutawan nerqa: “Chay onqoyqa mana wañunanpajchu, manachayqa Dios jatunchasqa kananpaj, Diospa Wawanpis jatunpaj qhawasqa kananpaj”, nispa. Jesusqa  iskay pʼunchaytawanraj chaypi qhepakorqa. Chaymantataj yachachisqasninta nerqa: “Jaku ujtawan Judeaman rinachej”, nispa. Yachachisqasnintaj nerqanku: “Yachachejníy, qaninpallaraj Judeamanta kajkuna rumiswan chʼanqaykuyta munasorqanku. Chantá, ¿ujtawanchu jaqayman riyta munashallankitaj?”, nispa (Juan 11:4, 7, 8).

Jesustaj kuticherqa: “¿Manachu uj pʼunchayqa 12 horasniyoj? Sutʼi pʼunchaypi purejqa mana imawanpis miskʼanchu, kay mundoj kʼanchayninta rikusqanrayku. Tutan purejtajrí miskʼan, paypi mana kʼanchay kasqanrayku”, nispa (Juan 11:9, 10). Jesusqa chaywan, ichá nisharqa manaraj horan chayamusqanta, uj tiempotawantaj willanan kasqanta. Chaykamataj tukuy atisqanta willayta munarqa.

Chantá Jesús nerqa: “Amigonchej Lazaroqa puñushan, noqataj rispa rijchʼarichimusaj”, nispa. Yachachisqasnenqa yuyarqanku Lázaro puñushallasqanta. Chayrayku nerqanku: “Señor, puñushallan chayqa, sanoyaponqachá”, nispa. Chantá Jesusqa sutʼita paykunaman nerqa: “Lazaroqa wañupun. [...] Kunanqa jaku paypaman”, nispa (Juan 11:11-15).

Jesuspa ujnin yachachisqanqa Tomás karqa. Payqa yacharqa Judeapi Jesusta wañuchiyta munanankuta. Jinapis payqa Jesuswan riyta munarqa. Chayrayku yachachisqa masisninman nerqa: “Jaku, noqanchejpis paywan khuska wañumuna”, nispa (Juan 11:16).