Yezu ‘awambuka Nkulo wa Yordani’ mbaenda ku cisa cinacemerwa Pereya, pontho iye akhala kweneko ndzidzi wakucepa. (Juwau 10:40) Buluka penepo, iye akuenda kunterero kukhali nzinda wa Yerusalemu.

Yezu nee ali ekha. Iye aenda na anyakupfundzace na “mwinji ukulu,” wa anthu, kuphatanizambo anyakulipisa misonkho na anyakudawa. (Luka 14:25; 15:1) Afarisi na apfundzisi a mwambo akuti akhaipirwa na pikhalonga Yezu na pikhacita iye, akhalipombo penepo. Iwo akhali na pizinji toera kunyerezera pakumala kubvesera pidalonga Yezu pa nsangani wa bira yakutayika, mwana wakutayika, mamuna wa mpfuma na Lazaro.—Luka 15:2; 16:14.

Panango thangwi yakutcingwa na kusingirirwa na anyamalwa awo, Yezu aikha manyerezero ace kuna anyakupfundzace. Iye alonga ntsonga zingasi zakuti akhadaapfundzisa kale ku Galileya.

Mwacitsandzo, Yezu alonga: ‘Ndzidzi onsene kunadzaoneka pinthu pinacitisa munthu kugwa m’madawo. Mbwenye dzedze kuna ule anacitisa munthu kugwa m’madawo. Citani mphole-mphole. M’bale wako angakudawira, nsandike; iye angatcunyuka, mulekerere. Maseze iye akudawire kanomwe pa ntsiku, angabwera kanomwe kuna iwe mbalonga kuti: ‘Ndatcunyuka,’ iwe usafunika kumulekerera.’ (Luka 17:1-4) Mafala akumalisa panango akumbusa Pedhru pya mbvundzo ukhadacita iye thangwi ya kulekerera kanomwe.—Mateu 18:21.

Kodi anyakupfundza anakwanisa kucita pinthu mwakubverana na pidalonga Yezu? Pidalonga iwo kuna Yezu kuti, “Thimizirani cikhulupiro cathu,” iye aapanga: “Mbamudakhala na cikhulupiro ninga mbeu ya mostardha, imwe mbamudapanga muti uyu kuti: ‘Dulika pano mbuenda katcekeka m’bara!’ Iwo mbudakubverani.” (Luka 17:5, 6) Inde, maseze munthu akhale na cikhulupiro cakucepa anakwanisa kucita pinthu pikulu.

Yezu apitiriza kupfundzisa kufunika kwa kucepeseka na maonero akulinganira thangwi ya ife ene, mbapanga apostolo ace: “Mbani mwa imwe wakuti nyabasa wace angafika buluka kubasa yakulima peno yakudyesa mabira, anampanga kuti: ‘Cimbiza, bwera kuno udye pa meza?’ M’mbuto mwace, iye anampanga: ‘Cinja nguwo zako, khunganya cakudya canga mbunditumikira mpaka ndingamala kudya na kumwa, buluka penepo unakwanisambo kudya na kumwa.’ Musanyerezera kuti iye anapereka takhuta kuna nyabasace thangwi acita pidampanga iye? Nkhabe. Munjira ibodzi ene, mungamala kucita pinthu pyonsene pidaphembwa imwe, longani kuti: ‘Ndife anyabasa akukhonda thema. Pinthu pidacita ife ndipyo pikhafunika ife kucita.’”—Luka 17:7-10.

Atumiki onsene a Yahova asafunika kubvesesa kufunika kwa kuikha pinafuna Mulungu pa mbuto yakutoma. Kusiyapo pyenepi, tonsene tisafunika kudzindikira kuti ndi mwai kulambira Mulungu mbaticita khundu ya banja yace.

Pakupita ndzidzi wakucepa, afika nyakupereka mphangwa wakutumwa na Mariya na Marta. Iwo ndi abale a Lazaro, pontho iwo asakhala ku Bhetanya wa ku Yudeya. Mamuna unoyu alonga: “Mbuya, xamwali wanu wapantima anafuna imwe, akuduwala.”—Juwau 11:1-3.

Maseze akhadziwa kuti xamwali wace, Lazaro, akhaduwala kakamwe, Yezu nee adzudzumika na pyenepi. M’mbuto mwace, iye alonga: “Cifuniro ca utenda unoyu si kufa tayu, mbwenye ndi toera kupasa mbiri Mulungu, toerambo Mwana wa Mulungu apaswe mbiri kubulukira mu utenda unoyu.” Iye apitiriza kukhali iye mu ntsiku ziwiri, buluka penepo apanga anyakupfundzace: “Tendeni pontho ku Yudeya.” Iwo adzudzumika mbalonga: “Mpfundzisi, ntsiku zingasi nduli Ayuda akhafuna kukuponyerani miyala, mphapo musafuna kuenda pontho kweneko?”—Juwau 11:4, 7, 8.

Yezu atawira: “Kodi masikati nee ali na midzidzi 12? Munthu angafamba namasikati nkhabe cinan’gwegwedusa, thangwi iye asaona ceza ca dziko ino. Mbwenye munthu angafamba namasiku, asagwegweduka,  thangwi mwa iye nkhabemo ceza.” (Juwau 11:9, 10) Panango Yezu akhafuna kulonga kuti ndzidzi ukhafuna Mulungu toera iye amwaze mphangwa ukhadzati kumala. Mpaka ndzidzi unoyu, Yezu akhafunika kubandza mwadidi ndzidzi wakucepa udasala.

Yezu athimiza: “Xamwali wathu Lazaro akugona, mbwenye ine ndiri kuenda kweneko kamulamusa.” Anyakupfundza panango akhanyerezera kuti Lazaro akhagona, ndi thangwi yace iwo alonga: “Mbuya, khala iye akugona, anawanga.” Yezu aapanga pakweca: “Lazaro afa . . . Mbwenye tendeni kuna iye.”—Juwau 11:11-15.

Tomasi akhadziwa kuti Yezu mbadaphiwa ku Yudeya, natenepa toera kupangiza kuti akhafuna kumphedza, iye apanga anyakupfundza andzace: “Tendenimbo toera tife pabodzi na Yezu.”—Juwau 11:16.