Ua umi se taimi o iai Iesu i le vaipanoa e taʻua o Perea, lea o loo “i le isi itu o Ioritana.” (Ioane 10:40) Ua faimalaga atu nei o ia i le itu i saute e agaʻi atu i Ierusalema.

E lē na o Iesu lana faigāmalaga. O loo latou ō faatasi ma ona soo, faapea le “motu o tagata” lea e aofia ai le ʻauaolafoga ma tagata agasala. (Luka 14:25; 15:1) O loo iai foʻi ma le ʻau Faresaio ma le ʻautusiupu, o ē e faitio i fetalaiga ma gaoioiga a Iesu. E tele mea ua tatau ona latou manatunatu i ai, ona o lea faatoʻā māeʻa ona faamatalaina e Iesu talafaatusa e faatatau i le mamoe na leiloa, le atalii sa leiloa, ma le tagata mauʻoa ma Lasalo.—Luka 15:2; 16:14.

Ua taulaʻi atu nei Iesu i ona soo. Atonu ona o faitioga ma tauemuga a tagata na tetee ane iā te ia, ua ia toe taʻua ai nisi o manatu sa ia aʻoaʻoina i Kalilaia.

O se faaaʻoaʻoga, ua fetalai atu Iesu: “E lē mafai lava ona lē oo mai o mea e tausuai ai. Ae peitaʻi, oi talofa i lē e māfua ai! . . . Ia outou uaʻi iā te outou lava. Afai ua faia e sou uso se agasala, ia e aʻoaʻi iā te ia, afai e salamō o ia, ia faamagalo i ai. E tusa lava pe e agasala faafitu o ia iā te oe i le aso, ma ua foʻi mai faafitu iā te oe ma faapea mai, ʻUa ou salamō,’ ia e faamagalo iā te ia.” (Luka 17:1-4) Atonu o lenā faamatalaga ua toe manatua ai e Peteru lana fesili, e faatatau i le faamagalo atu o se tasi e oo i le faafitu taimi.—Mataio 18:21.

Faamata e mafai e le ʻausoo ona gaoioi e ōgatusa ma na fetalaiga? Ina ua latou fai atu iā Iesu, “Ia e faatuputeleina lo matou faatuatua,” ua ia faamautinoa atu iā i latou: “Afai e pei lo outou faatuatua o le fatu o le sinapi, tou te fai atu i lenei laau o le sukamina, ʻIa liaʻiina ma totō i le sami!’ ma e usitaʻi mai o ia iā te outou.” (Luka 17:5, 6) Ioe, e oo lava i sina faatuatua itiiti e mafai ona faataunuuina ai mea tetele.

Ua faaauau ona aʻoaʻo atu e Iesu le tāua o le iai o le uiga o le lotomaulalo, ma le vaaiga saʻo lea e tatau ona iai i se tasi e faatatau iā te ia lava, e ala i le fetalai atu i ona aposetolo: “O ai se tasi o outou e iai se pologa o loo suatia le fanua, po o leoleo i le lafu, e faapea atu iā te ia pe a sau mai le fanua, ʻSau loa ma taoto e ʻai’? Pe e lē faapea atu ea o ia iā te ia, ʻIa sauni se mea mo aʻu ina ia fai ai laʻu ʻaiga o le pō, ia faamaulu lou ofu kuka ma auauna mai iā te aʻu seʻia uma ona ou ʻai ma ou inu, ona e ʻai ai lea ma e inu’? Na te lē talisapaia mea ua faia e le pologa, auā o mea ia e tatau ona ia faia. O lea, pe a uma ona outou faia o mea uma ua tofia atu e tou te faia, ona outou faapea ane lea, ʻO i matou o ni pologa e lē aogā. O mea ua matou faia, o mea ia e tatau ona matou faia.’”—Luka 17:7-10.

E tatau i auauna taʻitoʻatasi a le Atua ona malamalama, e tāua le faamuamua o le faia o le finagalo o le Atua. E tatau foʻi ona latou manatua le faaeaga ua latou maua e tapuaʻi atu ai i le Atua, i le avea ai ma se sui o lona aiga.

E leʻi leva ona māeʻa le faamatalaina e Iesu o lenei talafaatusa, ae taunuu ane loa se avefeʻau sa auina atu e Maria ma Mareta. O i laʻua o tuafāfine o Lasalo, ma e nonofo i Petania i Iutaia. Ua faapea atu le avefeʻau: “Le Alii e, silasila foʻi, ua maʻi lē ua e alofa faapelepele i ai.”—Ioane 11:1-3.

E ui lava o lea ua iloa e Iesu ua maʻi tigāina lana uō o Lasalo, ae e lē faapea ai ua matuā faavauvau o ia ma lē mafai ai ona toe faia se gaoioiga. Ua fetalai atu o ia: “E lē iʻu lenei maʻi i le oti, ae e iʻu ina faamamaluina ai le Atua, ina ia faamamaluina ai le Alo o le Atua i lenei mea.” Ua nofo pea Iesu i Perea mo aso e lua, ona ia fetalai atu lea i ona soo: “Ō mai tatou toe ō i Iutaia.” Ae ua latou fesili ane: “Le Aʻoaʻo e, na faatoʻā uma atu lava ona saʻili tagata Iutaia e fetogi iā te oe, ae pe e te toe maliu atu foʻi i ai?”—Ioane 11:4, 7, 8.

Ua tali mai Iesu: “E sefulu lua itula o le ao, a ea? Afai e savali se tasi i le ao, e lē fetoʻai o ia ma se mea, auā o loo vaai o ia i le malamalama o lenei lalolagi. Ae afai e savali se tasi i le pō, e fetoʻai o ia ma se mea, auā e lē o iā te ia le malamalama.” (Ioane 11:9, 10) E foliga mai o loo uiga atu lenei fetalaiga e faapea, e leʻi māeʻa le taimi atofaina a le Atua e faia ai le faiva a Iesu. O lea, a o leʻi māeʻa lenā taimi, e tatau iā Iesu ona faaaogā atoatoa le taimi puupuu o loo totoe.

Ua toe fetalai atu Iesu: “O loo mālōlō la tatou uō o Lasalo, ae ou te alu atu e fafagu iā te ia auā o loo moe.” Atonu o loo mafaufau le ʻausoo o loo mālōlō Lasalo ma o le a toe malosi o ia. O lea ua latou faapea mai ai: “Le Alii e, afai o loo mālōlō o ia, e toe malosi.” Peitaʻi ua fetalai saʻo atu Iesu: ʻUa oti Lasalo. Ae seʻi tatou ō atu iā te ia.’—Ioane 11:11-15.

E ui lava o loo iloa e Toma e ono fasiotia Iesu i Iutaia, ae o lona naunau e lagolagoina o ia, ua ia augani atu ai i isi soo: “Seʻi tatou ō foʻi, ina ia tatou oti faatasi ma ia.”—Ioane 11:16.