Ne nofo malie atu a Iesu i “te suā feitu o te Iolitana” i te koga e igoa ki a Pelea. (Ioane 10:40) Ne toe faimalaga atu ei a ia i te feitu ki saute ki Ielusalema.

Ne seki fanatu tokotasi a Iesu. Ne faima‵laga fakatasi atu latou mo ana soko, e pelā foki mo ‘tino e tokouke,’ e aofia i ei a tino ‵tae lafoga mo tino agasala. (Luka 14:25; 15:1) Ne ‵nofo atu foki i konā a te kau Falesaio mo failautusi, kolā ne fakamasei faeloa ne latou a pati mo faifaiga a Iesu. Ne uke ‵ki eiloa a mea ne ‵tau o mafau‵fau latou ki ei e uiga ki tala fakatusa ne fakamatala mai ne Iesu e uiga ki te mamoe ne galo, te tama tagata ne galo, mo te tagata maumea mo Lasalo.—Luka 15:2; 16:14.

Kāti ko te mea koi masaua ‵lei ne ia a fakamaseiga mo fakatauemuga o ana tino ‵teke, ne saga atu a Iesu ki ana soko. Ne toe taku malie atu ne ia a nisi manatu kolā ne akoako atu muamua ne ia i Kalilaia.

E pelā mo muna a Iesu: “E se mafai eiloa o se oko mai a mea kolā e ‵siga ei a tino. Kae kalofa eiloa i te tino telā e māfua mai i ei a mea konā! . . . Ke ‵saga tonu ifo ki a koutou eiloa. Kafai e fai ne tou taina se agasala, polopoloki atu a ia, kae kafai e salamō, fakamagalo atu. Kafai e agasala a ia ki a koe fakafitu taimi i te aso kae foki atu fakafitu ki a koe kae fai atu, ‘Au ko salamō,’ e ‵tau eiloa o fakamagalo ne koe a ia.” (Luka 17:1-4) Kāti ne fakamasaua atu ne toe pati konā ki a Petelu e uiga ki te fesili telā ne ‵sili atu ne ia e uiga ki te fakamagalo atu fakafitu taimi.—Mataio 18:21.

E mata, ne mafai o tau‵tali atu a soko ki pati a Iesu? I te taimi ne fai atu ei latou ki a Iesu, “Fakalasi aka te motou fakatuanaki,” ne fakatalitonu atu penei ki a latou: “Kafai te otou fakatuanaki e pelā mo te lasi o te fuaga o te sinapi, ka fai atu koutou ki te lakau tenei ko te sukamina, ‘Masagi ki luga kae fano o tu i te tai!’ kae ka fakalogo eiloa te lakau tenā ki a koutou.” (Luka 17:5, 6) Ao, e mafai foki ne se tamā fakatuanaki o fai a mea ‵lasi.

Ne toe akoako atu ei ne Iesu a te tāua o te mauaga o se kilokiloga loto maulalo kae paleni e uiga ki a koe eiloa, ana muna ki te kau apositolo: “Ko oi te tino i a koutou e isi sena pologa telā e fakamalū laukele io me e tausi manu ka fai atu ki a ia i te taimi ko foki mai i tena galuega, ‘Vau fakavave o kai’? I lō te fai penā, e mata, ka se fai atu a ia, ‘Fakatoka se mea mo oku kai i te afiafi, pei tou gatu situati kae tavini mai ke oko ki te taimi e oti ei au ne kai kae inu, ka oti ko mafai ei koe o kai kae inu’? E a, ka se loto fakafetai a ia ki tena pologa me ne fai ne ia a mea kolā ne fakatonu atu ke fai? E penā foki koutou, kafai ko oti ne fai ne koutou a mea katoa kolā ne tuku atu ke fai, ko fai atu ei penei: ‘A matou ne pologa e seai ne aoga. A mea kolā ko oti ne fai ne matou ko mea eiloa ne ‵tau o fai ne matou.’”—Luka 17:7-10.

E ‵tau eiloa o malamalama a tavini taki tokotasi a te Atua i te tāua o te fakamuamua o manakoga o te Atua. E se gata i ei, e ‵tau o masaua ne tino taki tokotasi a te tulaga taulia ko maua ne ia ke tapuaki atu ki te Atua e pelā me se tino i tena kaukāiga.

Kāti mai tua ifo eiloa o te taimi tenei, kae tu mai se avefekau ne uga mai ne Malia mo Maleta. A lāua ko tuagane o Lasalo kae ‵nofo atu i Petania i Iuta. Ne fai atu te avefekau: “Te Aliki! A te tino telā e alofa malosi koe ki ei e masaki.”—Ioane 11:1-3.

E tiga eiloa ne iloa ne ia me ko masaki malosi tena taugasoa ko Lasalo, ne seki pokotia masei a Iesu ona ko te fanoanoa. I lō te fai penā, ne fai atu a ia: “A te masaki tenei e se iku ki te mate, kae e fai penā ke faka‵malu ei te Atua, ko te mea ke faka‵malugina te Tama a te Atua e auala i te mea tenei.” Ne nofo atu a ia i konā i aso e lua, kae ne fai atu ei a ia ki ana soko: “Tatou ka toe ‵foki ki Iuta.” Kae ne ‵teke atu latou: “Te Faiakoga, ne fatoa oti fua ne lamalama koe ne tino Iuta ke peipei ki fatu, kae ka toe fano foki koe ki ei?”—Ioane 11:4, 7, 8.

Ne tali atu a Iesu: “E a, e se 12 itula o te ao? Kafai e sasale se tino i te mainaga o te ao, e se siga a ia i se mea, me e lavea ne ia te mainaga o te lalolagi tenei. Kae kafai e sasale se tino i te po, e siga a ia, me e seai se mainaga i loto i a ia.” (Ioane 11:9, 10) Kāti ne fakauiga a ia me ne seki palele atu a te taimi  ne fakatoka ne te Atua mō te taviniga a Iesu i te lalolagi. Kae ke oko atu ki te taimi tenā, e ‵tau eiloa mo Iesu o fakaaoga katoatoa ne ia te taimi toetoe telā koi ‵toe mai mō ia.

Ne toe fai atu a Iesu: “A Lasalo te ‵tou taugasoa ko to tena moe, kae ka malaga atu au o ‵fagu aka a ia.” Kāti ne ma‵natu aka latou me i a Lasalo ko malōlō fua kae ka toe ‵lei a ia, telā ne fai atu a soko: “Te Aliki, kafai a ia e moe, ka toe ‵lei a ia.” Ne taku ‵tonu atu a Iesu ki a latou: “A Lasalo ko mate, . . . Kae ko tatou ka olo atu ki a ia.”—Ioane 11:11-15.

Ona ko te iloa ‵lei ne Toma me ka tamate a Iesu i Iuta, ne fia fesoasoani atu foki a ia ki tou tagata, telā ne fakamalosi atu ei a ia ki ana taina: “Tatou ka olo foki, ko te mea ke ‵mate fakatasi tatou mo ia.”—Ioane 11:16.