I parahi na Iesu i Perea i “tera pae mai i Ioridana.” (Ioane 10:40) E reva ˈtura oia i te pae apatoa i Ierusalema.

E ere o Iesu anaˈe to ˈna tere, te vai atoa ra ta ˈna mau pǐpǐ e te hoê “nahoa rahi,” tae noa ˈtu te titau tute e te feia rave hara. (Luka 14:25; 15:1) To reira atoa te mau Pharisea e papai parau e faaino ra i ta Iesu parau e ohipa. No faaroo iho nei ratou i ta Iesu na faahohoˈaraa o te mamoe tei moˈe, te tamaiti tei moˈe na, e te taata taoˈa rahi e o Lazaro, e mea rahi te haapiiraa ia feruri ratou.—Luka 15:2; 16:14.

Paraparau atura oia i ta ˈna mau pǐpǐ, a manaˈo ai paha i te faainoraa e te hiˈo-faaooo-raa te feia patoi ia ˈna. Ua faahiti oia i te tahi mau haapiiraa ta ˈna i horoa na mua ˈtu i Galilea.

Ei hiˈoraa, ua parau Iesu: “Te vai ra iho â te tahi mau mea e hapa ˈi te taata. Ua ati râ te taata no ˈna e hapa ˈi vetahi ê! . . . A haapao maitai ia outou iho. Ia hara mai to oe taeae ia oe, a aˈo atu ia ˈna e ia tatarahapa oia, a faaore ïa i ta ˈna hapa. Ia hitu noa ˈtu taime i te mahana to ˈna hararaa mai ia oe e ia hitu atoa taime to ˈna haereraa mai ia oe ra, a na ô mai ai: ‘Te tatarahapa nei au,’ e faaore oe i ta ˈna hapa e tia ˈi.” (Luka 17:1-4) A faaroo ai Petero i teie parau, ua haamanaˈo paha oia i ta ˈna uiraa e hitu anei taime e faaore ai i te hapa.—Mataio 18:21.

Ua tia anei i te mau pǐpǐ ia ohipa ia au i ta Iesu parau? I to ratou aniraa ia Iesu ia “faarahi mai i to [r]atou faaroo,” haapapu atura oia: “Ahiri to outou faaroo mai te huero sinapi te rahi, e parau ïa outou i teie tumu sukamino: ‘A iriti tumu ia oe e a tanu ia oe i roto i te miti!’ E faaroo oia ia outou.” (Luka 17:5, 6) Noa ˈtu maa faaroo noa to ratou, e nehenehe ratou e faatupu i te mau ohipa faahiahia.

Haapii atura Iesu i te mau aposetolo i te faufaaraa ia tano noa e ia haehaa te manaˈo o te hoê taata ia ˈna iho: “O vai o outou e tavini ta ˈna e arote ra i te faaapu aore ra e tiai ra i te nǎnǎ, e na ô atu i ta ˈna tavini ia hoˈi mai: ‘Haaviti, parahi mai e tamaa’? E ore anei oia e na ô atu: ‘A tunu mai i te tahi maa na ˈu, a taamu mai i to oe pareu tûtu maa e a afai mai i te maa e ia paia roa vau, e i muri iho oe e tamaa ˈi’? E mauruuru anei oia i te tavini no te mea ua rave oia i tei faauehia ˈtu? Eita. Oia atoa, ua oti anaˈe ia outou i te rave i tei faauehia ˈtu, a na ô: ‘E tavini faufaa ore matou. Ua rave noa matou i tei faauehia mai.’”—Luka 17:7-10.

Mea maitai ia taa i te tavini tataitahi a te Atua te faufaaraa ia tuu i te haamoriraa i te Atua i te parahiraa matamua. Ia haamanaˈo atoa ratou tataitahi e e haamaitairaa taa ê ia haamori i te Atua ei mero no to ˈna utuafare.

E au ra i muri iho, tae maira te hoê taata i tonohia mai e Maria raua Mareta, na tuahine o Lazaro. I Betania i Iudea ratou e faaea ˈi. Parau maira teie taata: “E te Fatu, inaha te maˈihia nei to oe hoa here.”—Ioane 11:1-3.

I to Iesu faarooraa e mea maˈi roa to ˈna hoa Lazaro, aita oia i oto roa ino, ua na ô râ: “Te faahopearaa o tena maˈi, e ere ïa o te pohe, ia hanahana râ te Atua, ia faahanahanahia hoi te Tamaiti a te Atua maoti te reira.” Faaea noa ihora oia i te vahi to reira oia e piti mahana e na ô atura i te mau pǐpǐ: “Mai haere â tatou i Iudea.” Parau maira râ te mau pǐpǐ: “Rabi, no imi noa mai nei to Iudea i te pehi ia oe i te ofai, e te hoˈi faahou ra oe i ǒ?”—Ioane 11:4, 7, 8.

Pahono atura Iesu: “E ere anei 12 hora to te ao? Ia haere te taata i te ao, eita oia e tano i nia i te tahi mea, no te mea ua ite oia i te maramarama o teie nei ao. Tera râ, ia haere oia i te po, e tano ïa oia i nia i te tahi mea, no te mea aita  te maramarama i roto ia ˈna.” (Ioane 11:9, 10) E au ra e te hinaaro ra Iesu e parau e aita â te taime ta te Atua i faataa no ta ˈna taviniraa i hope atura. Mea titauhia ïa ia faaohipa maitai oia i te taime poto e toe ra.

Na ô atura Iesu: “Te taoto nei to tatou hoa o Lazaro, te haere nei râ vau i ǒ e faaara ia ˈna.” Manaˈo ihora te mau pǐpǐ e te taotooto noa ra Lazaro e e afaro mai oia, a na ô mai ai: “E te Fatu, te taoto ra oia, e maitai mai ïa o ˈna.” Parau roa ˈtura Iesu: “Ua pohe Lazaro . . . Mai haere anaˈe ia ˈna ra.”—Ioane 11:11-15.

No to ˈna hinaaro e turu ia Iesu, o te nehenehe e haapohehia i Iudea, na ô ihora Toma i te tahi atu mau pǐpǐ: “Mai haere atoa tatou, ia pohe hoi tatou e o ˈna.”—Ioane 11:16.