Ha sulod hin halipot nga panahon, nakadto hi Jesus ha ‘tabok han Jordan’ ha lugar nga gintatawag nga Perea. (Juan 10:40) Yana, nagbiyahe hiya ngadto ha sur ha Jerusalem.

Diri hiya nag-uusahan. Kaupod niya an iya mga disipulo, an “damu nga tawo,” ngan an mga parasukot hin buhis ngan magpakasasala. (Lucas 14:25; 15:1) Nakadto liwat an mga Pariseo ngan eskriba nga nakontra ha ginsisiring ngan ginbubuhat ni Jesus. Damu an ira angay hunahunaon katapos nira mabatian an mga ilustrasyon mahitungod han nawara nga karnero, nawara nga anak, riko nga tawo ngan kan Lasaro.—Lucas 15:2; 16:14.

Bangin nahuhunahuna pa ni Jesus an pagpakaraot ngan panyam-id han iya mga parakontra, salit nakiistorya hiya ha iya mga disipulo. Iya ginhisgotan an pipira nga punto nga iya pa la igintutdo ha Galilea.

Pananglitan, hi Jesus nagsiring: “Diri malilikyan an pag-abot han mga hiparakdolan. Kondi kairo han usa nga amo an hinungdan han pag-abot hito! . . . Paghatag hin atensyon ha iyo kalugaringon. Kon makasala an imo bugto, sawaya hiya, ngan kon magbasol, pasayloa hiya. Bisan kon makasala hiya hin pito ka beses kada adlaw ngan magbalik-balik hiya ha imo hin makapito basi sumiring, ‘Nagbabasol ako,’ kinahanglan pasayloon mo hiya.” (Lucas 17:1-4) Iton ultimo nga mga pulong bangin nagpahinumdom kan Pedro han iya iginpakiana hadto mahitungod ha pagpasaylo hin pito ka beses.—Mateo 18:21.

Magios ba an mga disipulo uyon ha ginsiring ni Jesus? Han nagsiring hira kan Jesus, “Tagi kami hin dugang nga pagtoo,” iya ginpasarig hira: “Kon may pagtoo kamo nga sugad kaguti han liso han mustasa, masiring kamo hini nga kahoy nga mulberi, ‘Magabot ka ngan mahitanom ha dagat!’ ngan masugot ito ha iyo.” (Lucas 17:5, 6) Oo, bisan an gutiay nga pagtoo makakahimo hin dagku nga butang.

Iginpadayon ni Jesus an pagtutdo ha iya mga apostol mahitungod han importansya han pagpaubos ngan han pagkaada timbang nga pagtagad ha kalugaringon, pinaagi ha pagsiring: “Hin-o dinhi ha iyo an may uripon nga nag-aarado o nag-aataman han mga hayop ngan masiring ha iya pag-uli niya tikang ha uma, ‘Pakadi dayon ha lamesa ngan lingkod basi ka kumaon’? Diri ba masiring lugod hiya ha uripon, ‘Iandam an akon panihapon, ngan pag-epron, serbihi ako tubtob nga matapos ako kumaon ngan uminom; katapos, mahimo ka na kumaon ngan uminom’? Diri hiya magpapasalamat ha uripon kay ginbuhat la niya an sugo ha iya, diri ba? Sugad man, kon nabuhat na niyo an ngatanan nga sugo ha iyo, siring kamo, ‘Waray kami pulos nga mga uripon. Ginbuhat la namon an amon obligasyon.’”—Lucas 17:7-10.

Kinahanglan masabtan han tagsa nga surugoon han Dios nga importante an pag-una han Ginhadian. Dugang pa, sadang hinumdoman han ngatanan nga pribilehiyo an pag-alagad ha Dios sugad nga membro han Iya panimalay.

Posible nga waray pag-iha katapos hini, inabot an mensahero nga ginsugo nira Maria ngan Marta, an kabugtoan ni Lasaro nga naukoy ha Betania ha Judea. An mensahero nagsiring: “Ginoo, may sakit an imo pinalangga nga sangkay.”—Juan 11:1-3.

Bisan kon hinbaroan ni Jesus nga grabe an sakit han iya sangkay nga hi Lasaro, waray hiya manluya tungod han duro nga kasubo. Lugod, hiya nagsiring: “Ito nga sakit diri magriresulta hin kamatayon kondi hin himaya han Dios, basi himayaon an Anak han Dios pinaagi hito.” Nagpabilin hiya ha iya gin-uukyan hin duha ka adlaw, katapos iya ginsidngan an mga disipulo: “Balik kita ha Judea.” Pero nagreklamo hira: “Rabbi, diri pa la maiha karuyag han mga taga-Judea nga batuhon ka. Kay ano nga mabalik ka ngadto?”—Juan 11:4, 7, 8.

Hi Jesus binaton: “Diri ba 12 ka oras an kaadlawon? Kon naglalakat ha kaadlawon an bisan hin-o, diri hiya nahipapakdol kay nakikita niya an kalamrag hini nga kalibotan. Pero kon naglalakat ha gab-i an bisan hin-o, nahipapakdol hiya kay waray hiya kalamrag.” (Juan 11:9, 10) Bangin karuyag niya sidngon nga diri pa tapos an panahon nga iginhatag han Dios para ha iya pagministeryo. Samtang diri pa ito natatapos, kinahanglan gamiton niya hin bug-os an nabibilin nga halipot nga panahon.

Hi Jesus nagdugang: “Nakaturog an aton sangkay nga hi Lasaro, pero makadto ako basi pukawon hiya.” Matin-aw nga tungod kay kahuna han mga disipulo nga napahuway la hi Lasaro ngan matatambal, hira nagsiring: “Ginoo, kon nakaturog hiya, mag-oopay hiya.” Salit hi Jesus prangka nga nagsiring: “Patay na hi Lasaro . . . Kadto kita ha iya.”—Juan 11:11-15.

Maaram hi Tomas nga posible mamatay hi Jesus ha Judea, pero karuyag niya suportaran hi Jesus, salit gin-aghat niya an iya mga igkasi-disipulo: “Kadto liwat kita, bisan kita mamatay upod niya.”—Juan 11:16.