Benɛ Yesu je Perea kɛ yaa a, e ya su kɔpe ko nɛ a tsɛɛ ke Betania. Kɔpe ɔ kɛ Yerusalem a kpɛti kɛmi maa pee kaa si tomi enyɔ. Marta kɛ Maria ngɛ a nyɛminyumu Lazaro nɛ e gbo ɔ he kɔmɔ yee. Enɛ ɔ he ɔ, nihi babauu ya lejɛ ɔ konɛ a ya wo a bua.

Nɔ ko ya wó Marta tue nɔ kaa Yesu ngɛ blɔ nɔ kɛ ma, kɛkɛ nɛ Marta sa fo nɛ e kɛ Yesu ya kpe. E de Yesu ke: “Nyɔmtsɛ, kaa o ngɛ hiɛ ɔ jinɛ ye nyɛminyumu ɔ ko gbo we.” Eko ɔ, e kɛ e nyɛmiyo ɔ a susu nɔ́ nɛ ɔ he hluu. Enɛ ɔ tsɔɔ we kaa Marta be hɛ nɔ kami. Ejakaa e de kɛ tsa nɔ ke: “Se amlɔ nɛ ɔ hu, i le kaa nɔ́ tsuaa nɔ́ he pɛɛ nɛ o ma kpa Mawu ɔ, e maa pee ha mo.” (Yohane 11:21, 22) E le kaa Yesu ma nyɛ maa pee nɔ́ ko kɛ ye bua e nyɛminyumu ɔ.

Yesu de lɛ ke: “O nyɛminyumu ɔ maa te si kɛ ba wami mi ekohu.” Marta bu kaa gbogboehi a si temi nɛ maa ba hwɔɔ se ngɛ zugba a nɔ, nɛ́ Abraham kɛ ni kpahi hu hyɛ blɔ ɔ he munyu nɛ Yesu ngɛ tue. Enɛ ɔ tsɔɔ kaa Marta ngɛ hemi kɛ yemi kaa gbogboehi maa te si hwɔɔ se. E de ke: “I le kaa nyagbe ligbi ɔ nɛ ni gbogboehi maa te si ɔ, e maa te si kɛ ba wami mi.”​​—Yohane 11:23, 24.

Anɛ Yesu ma nyɛ maa pee nɔ́ ko kɛ wo e bua lo? E ha nɛ Marta le kaa Mawu ha lɛ he wami ngɛ gbenɔ nɔ. E de lɛ ke: “Nɔ tsuaa nɔ nɛ heɔ mi yeɔ ɔ, ke e gbo tete po, e maa hi hɛ ngmengmle; nɛ nɔ tsuaa nɔ nɛ hɛ ngɛ, nɛ e heɔ mi yeɔ ɔ, e be gboe gblegbleegble.”​​—Yohane 11:25, 26.

Pi nɛ Yesu ngɛ tsɔɔe kaa e kaseli ɔmɛ nɛ a ngɛ jamɛ a be mi ɔ be gboe gblee. Ejakaa Yesu de e kaseli ɔmɛ kaa lɛ nitsɛ po e ma gbo. (Mateo 16:21; 17:22, 23) Yesu ngɛ nɔ mi mae kaa ja nihi ná hemi kɛ yemi ngɛ e mi loko a ma ná neneene wami. A ma tle nihi nɛ a gbo ɔ a kpɛti nihi fuu si, nɛ a ma ná neneene wami. Se anɔkualetsɛmɛ nɛ a maa hi wami mi ngɛ nyagbe be ɔ mi ɔ lɛɛ eko ɔ, a be gboe gblee. Bɔ tsuaa bɔ nɛ e ji ɔ, ke wa ya nɔ nɛ wa ná hemi kɛ yemi ngɛ Yesu mi ɔ, wa ma nyɛ ma ná nɔ mi mami kaa wa maa hi si daa.

Yesu de ke, “Imi ji si temi ɔ, kɛ wami ɔ,” se anɛ e ma nyɛ maa ye bua Lazaro, nɛ e ye ligbi eywiɛ sɔuu ngɛ yɔkɔ mi ɔ lo? Yesu bi Marta ke: “O heɔ enɛ ɔ yeɔ lo?” Marta ha heto ke: “Ee Nyɔmtsɛ, i heɔ yeɔ kaa mo ji Kristo ɔ nɛ! Mo ji Mawu Bi ɔ nɛ ma je ɔ mi ɔ nɛ.” Akɛnɛ Marta he ye kaa Yesu ma nyɛ maa pee nyakpɛ nɔ́ ko jamɛ a ligbi ɔ he je ɔ, e kpale kɛ ho we mi ya esɔ, nɛ e ya wo e nyɛmiyo ɔ tue mi ke: “Tsɔɔlɔ ɔ ba, nɛ e ngɛ o si bie.” (Yohane 11:25-28) Oya nɔuu nɛ Maria ma blɔ nɔ, se nihi nɛ a ya ngɛ a bua woe ɔ susu kaa e yaa Lazaro yɔkɔ ɔ he, lɔ ɔ he ɔ, a te si nɛ a nyɛɛ e se.

Se Maria kɛ Yesu ya kpe nɛ e kpla si ngɛ Yesu nane nya, nɛ lɛ hu e de Yesu nɔ́ nɛ Marta ya de lɛ ɔ nɔuu. E de ke: “Nyɔmtsɛ, kaa o ngɛ hiɛ ɔ jinɛ ye nyɛminyumu ɔ ko gbe we.” Benɛ Yesu na bɔ nɛ Maria ngɛ ya foe ha, kɛ bɔ nɛ Yuda bi ɔmɛ nɛ a piɛɛ Maria he ɔ hu ngɛ ya foe ha a, Yesu hao nɛ e fo ya. Ya nɛ Yesu fo ɔ pee nihi nɛ a ngɛ lejɛ ɔ nyakpɛ wawɛɛ. Se ni komɛ lɛɛ a bi si ke: ‘Pi lɛ nɛ e bli nɔ ko nɛ a fɔ lɛ hɛ yuyuilɔ hɛngmɛ ɔ! Anɛ e ko nyɛ we nɛ e ko pee nɛ Lazaro kó gbo we lo?’​​—Yohane 11:32, 37.