Kiki a yé lôl i Péréa, Yésu a mpam bebee ni Bétania, mbai yada i i yé bebee le kilôméta 3 i pes likôl i Yérusalem. Maria bo Marta, bilôk binyañ bi bôda bi Lasarô bi ñee inyule Lasarô a ntip wo. Ngandak bôt i nlo inyu hôgbaha bo.

I mbus, mut wada a nkal Marta le Yésu a yé lo. Jon Marta a ñôt ngwéé i boma nye. Marta a nkal Yésu jam nye ni manyañ Maria ba gwé mahoñol hala a yé ndék dilo nano. A nkal Yésu le: “A Nwet, ibale u bak hana, ki mankéé a nwo bé.” Ndi a ta bé pot hala inyule a gwé bé botñem. A nkônde le: “Me nyi le to kinje jam u mbat Nyambe, Nyambe a’ ti we jo.” (Yôhanes 11:21, 22) A nhoñol le Yésu a nla ki hôla manyañ.

Yésu a ntimbhe nye le: “Manyuñ a’ tuge.” Marta a nok le Yésu a yé pôdôl bitugne gw’a ba hana isi i dilo di nlo, botñem Abraham ni bape ba bééna. Jon a ñunda le a nhémle le hala a’ bôña. A nkal le: “Me nyi le a’ lo i bitugne i hilo hi nsôk.”​—Yôhanes 11:23, 24.

Ndi baa Yésu a nla boñ ngim jam hanano? Yésu a nhôñlaha Marta le Djob a bi ti nye ngui inyu yémbél nyemb ngéda a nkal le: “I mut a ñunda le a nhémle me, to ibale a nwo, a’ témb i niñ; yak hiki mut a niñ, a undga le a nhémle me, a’ wo yaga bé kekikel.”​—Yôhanes 11:25, 26.

Yésu a ta bé kal le banigil bé ba ba yé ha ba ga wo bé. Kiki a bi kal baôma bé, yak nyemede a nlama wo. (Matéô 16:21; 17:22, 23) Yésu a yé yigye le ngéda di ñunda le di nhémle nye, di nla bana niñ boga. Libim li bôt li ga kôhna nya niñ i ni njel bitugne. Ndi ikété bagwélél ba Djob ba ba niñ lisuk li hiai hini, ngandak i ga wo bé. Maliga ma yé le, to i ba lelaa, ba bobasôna ba ba ñunda le ba nhémle Yésu ba nla ba nkwoog nkaa le ba ga kida bé i soñ.

Ndi baa, Yésu nu a ntip kal le: “Men me yé bitugne, me yé ki niñ,” a nla boñ jam inyu Lasarô, nu a nwo hala a yé ndék dilo nano? Yésu a mbat Marta le: “Baa u nhémle hala?” Marta a ntimbhe le: “Ñ, a Nwet, me bi hémle le wen u yé Kristô, Man Nyambe nu a nlama lo munu nkoñ isi.” Ni botñem le Yésu a nla boñ ngim jam ha kel i, Marta a nhoo ke ngwéé i ndap i sooga manyañ le: “Malét a yé hana, a yé i sébél we.” (Yôhanes 11:25-28) Maria a nyodi ndap, bôt bape ba noñ nye, inyule ba nyimbe le a yé ke i soñ Lasarô.

Ndi Maria a nke tehe Yésu, a nkwo makôô mé a eek, a ntiimba pahal mahoñol ma manyañ Marta: “A Nwet, ibale u bak hana, ki mankéé a nwo bé.” A tehe bañ Maria ni bôt ba ñee, Yésu a siida, hala a teéñga nye, a kundus gwiiha. Hala a ntihba bôt ba yé ha. Ndi bape ba mbadba le: ‘Ibale Yésu a bi yibil mis ma mut a bi gwéé ndim, baa a bak bé le a boñ le i mut nunu a wo bañ?’​—Yôhanes 11:32, 37.