Zezi jasoli Pere mɛn’n nun lɔ bali Betanin klɔ’n i wun lɛ. Betanin klɔ’n wo Zerizalɛmun i wia afiliɛ lɔ bue’n su lɔ. Ɔ nin Zerizalɛmun be afiɛn ti nun kilo nsan. Mari nin Mati be wla w’a bo, afin be niaan bian Lazaa w’a wu. Sran kpanngban b’a ba be fɔnvɔlɛ.

Sran kun wa seli Mati kɛ Zezi su ba. Ɔ maan ɔ ɔli ndɛndɛ ko kpɛli i atin. Ɔ seli Zezi kɛ: “Min Min, sɛ ɔ ti kɛ a o wa’n, nn min niaan bian’n w’a wuman.” Mati nin i niaan bla’n be jin ndɛ kunngba sɔ’n i kanlɛ su, i cɛn ba nnan yɛ. Sanngɛ nán kɛ Mati i wla nunman like wie fi su ti-ɔ. Afin ɔ seli kɛ: “N si kɛ like kwlaa nga a srɛ Ɲanmiɛn’n, Ɲanmiɛn mán wɔ.” (Zan 11:21, 22) Ɔ maan ɔ si kɛ Zezi kwla cɛn i niaan bian’n.

Zezi seli i kɛ: “Ɔ niaan bian wá cɛ́n.” Mati buli i kɛ blɛ mɔ bé wá cɛ́n sran mun asiɛ’n su wa’n, i ndɛ yɛ Zezi kan-ɔn. Abraamun nin Ɲanmiɛn i sufuɛ wie’m be lafili i sɔ’n su wie. Mati kannin ndɛ kun fa kleli kɛ ɔ lafi sa sɔ’n su. Ɔ seli kɛ: “N si kɛ blɛ kasiɛn’n nun’n, ɔ́ wá cɛ́n.”​—Zan 11:23, 24.

?Sanngɛ Zezi kwla yo like kun naan Mati i wla gua ase dɔ ngalɛ’n su? Ɔ kpɛnnin Mati i wla kɛ Ɲanmiɛn mɛnnin i tinmin kɛ ɔ kwla wie’n. Ɔ seli i kɛ: “Sran ng’ɔ kle kɛ ɔ lafi min su’n, kannzɛ ɔ wu’n, ɔ́ ɲán nguan. Sran kwlaa ng’ɔ o nguan nun m’ɔ kle kɛ ɔ lafi min su’n, ɔ su wuman le.”​—Zan 11:25, 26.

Nán kɛ Zezi su se kɛ i sɔnnzɔnfuɛ nga be o lɛ’n, be su wuman le ti-ɔ. I kpa bɔbɔ’n, ɔ seli i akoto’m be kɛ ɔ́ wú. (Matie 16:21; 17:22, 23) Sanngɛ ɔ su se kɛ sran kwlaa ng’ɔ kle kɛ ɔ lafi i su’n, ɔ́ ɲán nguan m’ɔ leman awieliɛ’n. Sran wie’m be liɛ’n, sɛ be wu naan be cɛn’n, yɛ bé ɲán nguan sɔ’n niɔn. I sɔfuɛ’m be sɔnnin. Sanngɛ kɛ mɛn wíe’n, Ɲanmiɛn sufuɛ nga be te o nguan nun’n be liɛ’n, atrɛkpa be su wuman le. I kwlaa yoli-o, be nga be kle kɛ be lafi Zezi su’n, be kwla lafi su kɛ wie’n su kwlaman be mlɔnmlɔnmlɔn.

Zezi seli kɛ: “Min yɛ n cɛn sran-ɔn. Yɛ min yɛ n man sran nguan-ɔn.” ?Sanngɛ Zezi kwla cɛn Lazaa m’ɔ wuli w’a di cɛn ba lele nnan’n? Ɔ usali Mati kɛ: “?A lafi ndɛ sɔ’n su?” Yɛ ɔ tɛli i su kɛ: “Ɛɛn, min Min, n lafi su kɛ wɔ yɛ a ti Klisi’n niɔn, yɛ wɔ yɛ a ti Ɲanmiɛn i Wa m’ɔ fata kɛ ɔ bla mɛn’n nun’n niɔn.” Mati lafili su kɛ Zezi kwla uka be cɛn sɔ’n nun. Ɔ maan ɔ wanndi ɔli awlo ko seli i niaan bla’n blɛlɛlɛ kɛ: “Like klefuɛ’n w’a ba. I waan a bla.” (Zan 11:25-28) Kɛ Mari tili i sɔ’n, ɔ fin sua’n nun fiteli. Sran nga be o lɛ’n, be buli i kɛ ɔ su kɔ Lazaa i asieliɛ’n su lɔ. I sɔ’n ti’n, be suli i su.

Mari ɔli Zezi i wun lɔ naan w’a koto i bo. Kɛ ɔ́ yó sɔ’n, nn ɔ́ sún. Ɔ kannin ndɛ nga i niaan bla’n dun mmua kan kleli Zezi’n wie. Ɔ seli i kɛ: “Min Min, sɛ ɔ ti kɛ a o wa sa’n, nn min niaan bian’n w’a wuman.” Kɛ Zezi wunnin kɛ Mari nin be nga be su i su’n, be su sun’n, i awlɛn’n kpɛli i klun, yɛ i wla boli i wun. Kpɛkun ɔ sunnin. Ɔ maan be nga be o lɛ’n be kwla wunnin i kɛ ɔ klo Lazaa kpa. Sanngɛ sran wie’m be seli kɛ: “Bian nga yɛ ɔ tikeli aɲinsifuɛ’n i ɲinma’n niɔn. ?Yɛ ngue ti yɛ ɔ yacili bian nga lɛ m’ɔ wuli-ɔ?”​—Zan 11:32, 37.