Thutha wa kuuma Perea, Jesu agakinya gĩcagi kĩrĩ nja ya itũũra rĩa Bethania, rĩrĩa rĩrĩ kilomita ta ithatũ mwena wa irathĩro wa Jerusalemu. Mariamu na Maritha, aarĩ a nyina na Lazaro maracakaya nĩ ũndũ wa gĩkuũ gĩake. Andũ aingĩ nĩ mokĩte kũmomĩrĩria.

Mũndũ ũmwe akeera Maritha atĩ Jesu nĩ akuhĩrĩirie, nake agateng’era nĩguo amũtũnge. Maritha akeera Jesu ũndũ ũrĩa we na mwarĩ wa nyina hihi makoretwo magĩĩciria ihinda rĩa thikũ inya akoiga: “Mwathani, korũo ũrarĩ gũkũ, mũrũ wa maitũ ndangĩrakuire.” No ti kuuga atĩ Maritha ndarĩ na mwĩhoko. Akoiga: “Nĩ njũĩ atĩ ũndũ o wothe ũngĩhoya Ngai, Ngai nĩ egũkũhe.” (Johana 11:​21, 22) Arona atĩ o na rĩu Jesu hihi no ahote gũteithia mũrũ wa nyina.

Jesu akamwĩra ũũ: “Mũrũ wa nyũkwa nĩ ekũriũka.” Maritha akeihũrĩria atĩ Jesu araria ũhoro wa ũriũkio ũgeekĩka gũkũ thĩ ihinda rĩũkĩte, kĩĩrĩgĩrĩro kĩrĩa Iburahimu na andũ angĩ maarĩ nakĩo. Na akonania nĩ etĩkĩtie biũ atĩ ũndũ ũcio nĩ ũkaahinga, akoiga: “Nĩ njũĩ atĩ nĩ akaariũka hĩndĩ ya iriũkĩro mũthenya wa mũthia.”​—Johana 11:​23, 24.

No rĩrĩ, hihi no kũhoteke Jesu aheane ũteithio o na ihinda-inĩ rĩrĩ? Jesu akaririkania Maritha atĩ nĩ aheetwo nĩ Ngai ũhoti igũrũ rĩa gĩkuũ, akamwĩra: “Mũndũ ũrĩa ũrĩonanagia wĩtĩkio harĩ niĩ, o na angĩkua nĩ agaacokio muoyo; na mũndũ o wothe ũrĩ muoyo na akonania wĩtĩkio harĩ niĩ ndarĩ hĩndĩ agaakua.”​—Johana 11:​25, 26.

Jesu ndaroiga atĩ arutwo ake arĩa marĩ muoyo matigaakua. O nake no mũhaka agaakua, o ta ũrĩa eerĩte atũmwo ake. (Mathayo 16:21; 17:​22, 23) Jesu aratĩtĩrithia atĩ kuonania wĩtĩkio harĩ we no gũtũme mũndũ akaaheo muoyo wa tene na tene. Harĩ andũ aingĩ, makaaheo muoyo ũcio kũgerera kũriũkio. Ĩndĩ arĩa ehokeku magaakorũo muoyo mũthia-inĩ wa mũtabarĩre ũyũ, no kũhoteke matigaakua o na rĩ. O na kũngĩkorũo nĩ atĩa, mũndũ wothe wonanagia wĩtĩkio harĩ Jesu no akorũo na ma atĩ ndagaakua gĩkuũ gĩa tene na tene.

No hihi Jesu thutha wa kuuga, “nĩ niĩ ũriũkio na nĩ niĩ muoyo” nĩ ekũhota gũteithia Lazaro ũrĩa ũkoretwo arĩ mũkuũ thikũ cigana ũna? Akoria Maritha, “Wee nĩ wĩtĩkĩtie ũguo?” Nake Maritha akamwĩra: “Ĩĩ, Mwathani, nĩ njĩtĩkĩtie atĩ wee nĩwe Kristo, Mũrũ wa Ngai, ũrĩa warĩ oke gũkũ thĩ.” Nĩ ũndũ wa gwĩtĩkia atĩ harĩ ũndũ Jesu angĩteithia naguo mũthenya o ũcio, Maritha agathiĩ mũciĩ akeera mwarĩ wa nyina ũũ hatarĩ andũ angĩ: “Mũrutani nĩ oka na nĩ aragwĩta.” (Johana 11:​25-28) Mariamu aigua ũguo akoima nyũmba na akarũmĩrĩrũo nĩ andũ angĩ, arĩa mareciria athiĩ mbĩrĩra-inĩ ya Lazaro.

No Mariamu agathiĩ kũrĩ Jesu, akagwa magũrũ-inĩ make akĩrĩraga, na agacokera ciugo ta iria mwarĩ wa nyina ekũgwetete akoiga: “Mwathani, korũo ũrarĩ gũkũ, mũrũ wa maitũ ndangĩrakuire.” Jesu akahutio ngoro nĩ kuona Mariamu na andũ acio makĩrĩra, agacaya, agatangĩka mũno nginya agaita maithori. Ũndũ ũcio ũkahutia arĩa mareyonera. No amwe ao makoiga: “Kaĩ mũndũ ũyũ ũrahingũrire maitho ma mũtumumu atangĩrahotire kũgirĩrĩria mũndũ ũyũ ndagakue?”​—Johana 11:​32, 37.