Yesu okatukidi muna Pereia, wizidi muna Betania, vata dina tezo kia kilometa tatu kuna este ya Yerusaleme. Nsanga za Lazaro, Maria yo Mareta mu dila bena lufwa lwa mpangi au. Ndonga izidi kubafiaulwisa.

Wau bemokenanga, muntu mosi ovovese Mareta vo, Yesu mu kwiza kena. Mareta wele kunkika mu nswalu. Mareta ozayisi Yesu o mambu keyindulanga yo Maria se lumbu yá iviokele kala. Ovovele vo: “E Mfumu, kele vo wakala vava, o mpangi ame nga kafwidi ko.” E mvovo miami ke misongele ko vo Mareta kena yo lukwikilu ko. Marete ovovele diaka vo, “Kana nkutu owau nzeye wo vo, konso dina olomba kwa Nzambi, o Nzambi okuvana dio.” (Yoane 11:21, 22) Mareta obenze vo Yesu olenda vuluza mpangi andi Lazaro.

Yesu umvovese vo: “O mpangi aku fuluka kefuluka.” Mareta obenze vo Yesu ovovele lufuluku lukala ova ntoto kuna sentu. Lufuluku luna Abarayama ye akaka basianga e vuvu. Mareta muna songa vo okwikilanga muna lufuluku lwalu, ovovese Yesu vo: “Nzeye wo vo ofuluka muna lufuluku muna lumbu kia mbaninu.”—Yoane 11:23, 24.

Nga Yesu olenda vanga diambu muna kubafiaulwisa? Yesu osungamese Mareta vo Nzambi wamvana nkuma muna mafwa, ovovele vo: “Mono i lufuluku yo moyo. Ndiona okwikilanga omu mono, kana nkutu ofwidi, moyo diaka kekala; konso ona mpe win’o moyo, okwikilanga omu mono, kefwa nkutu ko yakwele mvu.”—Yoane 11:25, 26.

E mvovo mia Yesu ke misongele ko vo alongoki andi ben’o moyo ke balendi fwa ko. Yandi kibeni Yesu wavovesa ntumwa zandi vo fwa kefwa. (Matai 16:21; 17:22, 23) Ozevo, Yesu edi kazolele vova vo, konso ndiona okwikilanga muna yandi, moyo a mvu ya mvu kevua. Kuna kwa ndonga yafwa, bafwete fuluka ntete muna vua moyo a mvu ya mvu. Vo i selo yakwikizi bekala o moyo kuna mbaninu a tandu kiaki, ke balendi fwa nkutu ko. Dianu vo, konso muntu okwikilanga mu Yesu kafwete kakala ye ziku vo kana nkutu ofwidi o unu, fuluka kesinga fuluka.

Yesu ovovele kala vo, “Mono i lufuluku yo moyo.” Adieyi obenze, nga Yesu olenda futumuna Lazaro, ona wafwa se vioka lumbu yá? Yesu oyuvuidi Mareta vo: “Nga okwikidi wo e?” Mareta umvutwidi vo: “Ingeta, e Mfumu, ikwikilanga wo vo nge i Kristu wa Mwan’a Nzambi, ona okwiza ova nza.” Marete wau kakwikidi vo Yesu olenda vanga diambu muna lumbu kiakina, wele vutuki ku nzo mu nswalu, obokele nleke andi Maria kuna sweki, umvovese vo: “O Nlongi olueke, ngeye kabokele.” (Yoane 11:25-28) Vana vau, Maria ovaikidi mu nzo, akaka banlende, kadi edi babenze vo wele kuna ziami kia Lazaro.

Kinga, Maria wele kwa Yesu, ofukamene vana malu mandi ye dilu, ovutukidi e diambu dina Mareta kavovese Yesu: “E Mfumu, kele vo wakala vava, o mpangi ame nga kafwidi ko.” O Yesu vava kamwene Maria odilanga, kumosi mpe ye ndonga, Yesu ovumukini, o moyo andi utelamene, obetomwene kinsanga. O wantu bena vana basivikidi. Kansi, akaka muna yau bavovele vo: ‘Avo Yesu katemona meso ma mpofo, ekuma katanini Lazaro ko kalembi fwa?’—Yoane 11:32, 37.