Jesu uzwa kwa Perea, uatumela munzi wa Betania ofumaneha likilomita zetaalu kwa upa wa Jerusalema. Maria ni Mareta, balila kaizelaa bona Lazaro yasazo shwa. Batu babañata batile kuto baomba-omba.

Cwale mutu yomuñwi ubulelela Mareta kuli Jesu wataha, mi Mareta uakufela kuyo mukatanyeza. Mareta ubulelela Jesu zanaasweli kunahana yena ni Maria ka mazazi amane, uli: “Mulena, kambe neuli teñi kwanu, kambe kaizelaaka hasika shwa.” Kono habulela cwalo haki kuli hana sepo. Mareta uli: “Naziba kuli zeukupa kaufela ku Mulimu, Mulimu uka kufa zona.” (Joani 11:21, 22) Uikutwa kuli mwendi Jesu usakona kutusa kaizelaa hae.

Jesu ualaba kuli: “Kaizelaa hao ukazuha.” Mareta unahana kuli mwendi Jesu ubulela za zuho yekaezahala kwapili fa lifasi, ili sepo yanaanani yona Abrahama ni babañwi. Mi ubonsia kuli unani tumelo ya kuli zuho yeo ikabateñi ka kubulela kuli: “Naziba kuli ukazuha ka nako ya zuho ya bafu ka lizazi la mafelelezo.”—Joani 11:23, 24.

Kono kana kikuli Jesu uka kona kuzusa Lazaro honafa? Jesu uhupulisa Mareta kuli Mulimu umufile maata fahalimwaa lifu, uli: “Ki na zuho ni bupilo. Yabonisa tumelo ku na, nihaka shwa, ukapila; mi mutu kaufela yapila ni kubonisa tumelo ku na haana kushwa nikamuta.”—Joani 11:25, 26.

Jesu hatalusi kuli balutiwa bahae babaliteñi ka nako ye habana kushwa nikamuta. Nihaiba yena uswanela kushwa, sina mwanaabulelezi baapositola bahae. (Mateu 16:21; 17:22, 23) Jesu ukoñomeka kuli kubonisa tumelo ku yena kukona kutahisa bupilo bobusa feli. Babañata bakapila kuya kuile hamulaho wakuzuha kwa bafu. Kono batu babasepahala babapila mwa linako za mafelelezo habana kushwa nikamuta. Nihakulicwalo, mutu kaufela yalumela ku yena hana kushwa lifu la kuya kuile.

Kono kana Jesu, yasazo bulela kuli, “ki na zuho ni bupilo,” wakona kuzusa Lazaro yasashwile ka mazazi amañata? Jesu ubuza Mareta kuli: “Kana walumela cwalo?” Mareta ualaba kuli: “Ki cwalo, Mulena, nilumezi kuli ki wena Kreste Mwanaa Mulimu, yanaaswanezi kutaha mwa lifasi.” Ka tumelo ya kuli Jesu wakona kueza sesiñwi ka lona lizazi leo, Mareta uakufela kwa ndu kuyo bulelela Maria kwa mukunda, kuli: “Muluti utile mi wakubiza.” (Joani 11:25-28) Honafo, Maria uzwa fa ndu, mi ulatelelwa ki batu babañwi babanahana kuli uya kwa libita la Lazaro.

Kono Maria uya ku Jesu, hafita uwela kwa mahutu ahae ni kulila, mi ubulela manzwi asazo bulela muhulwanaa hae, uli: “Mulena, kambe neuli teñi kwanu, kambe kaizelaaka hasika shwa.” Jesu habona Maria ni buñata bwa batu inze bulila, utomoha pilu, uziyeleha hahulu, mi mane ulotisa miyoko. Taba yeo ikomokisa batu babamubona. Babañwi babuza kuli: ‘Haiba Jesu naakwaluluzi meeto a sibofu, kana naasakoni kutibela yo kuli asike ashwa?’—Joani 11:32, 37.