Yesu watambe mu Pelea, wafika ku ntwelelo ya Betani, kibundi kidi ku makilometele 3 kutunduka kwa Yelusalema. Madia ne Mata, banababo na Lazalasa bakidila ufwile. Bantu bavule abaiya kwibasenga.

Kupwa muntu umo wasapwila Mata amba Yesu kasa kufika, wanyema lubilo kukamusambakana. Mata wasapwila Yesu byobadi padi balanga na mwanabo mu ano mafuku aná amba: “A Mfumwetu, shi wadi kuno, longa mwanetu kafwilepo.” Inoko kino kekilombolapo amba Mata kadipo na lukulupilo. Wanena’mba: “Ndyukile amba kyonso kyowakalomba Leza, Leza ukakupa’kyo.” (Yoano 11:21, 22) Ukulupile amba Yesu ubwanya kukwasha mwanabo.

Yesu walondolola’mba: “Mwanenu usa kusanguka.” Mata wamone amba wisambilanga pa lusangukilo lwa kumeso pano pa ntanda, lukulupilo lwādi na Abalahama ne bantu bakwabo. Nandi walombola amba lukulupilo lwandi i lwa bine na kunena’mba: “Ndyukile amba ukasangukanga ku lusangukilo mu difuku dya mfulo.”​—Yoano 11:23, 24.

Le Yesu usa kuleta busengi panopano ponka? Wavuluja Mata amba aye udi na bukomo bumupēle Leza pa lufu, na kunena’mba: “Yewa ulombola lwitabijo mudi ami, nansha wafwa, ukekala mūmi monka; kadi muntu ense mūmi ulombola lwitabijo mudi ami kakafupo nansha dimo.”​—Yoano 11:25, 26.

Yesu kakimbengapo kunena’mba bana ba bwanga badi nabo bōmi kebakafupo, aa. Mwanda enka ne aye mwine usa kufwa, monka mwawalaile’kyo batumibwa bandi. (Mateo 16:21; 17:22, 23) Yesu walombola’mba kwitabija mwadi kutwalanga bantu ku būmi bwa nyeke. Kadi ku bavule, buno būmi bakebumona pa kupwa kusangulwa’bo. Ino boba balama kikōkeji kufika ne ku mfulo ya ino ngikadilo ya bintu abo kebakafupo nansha dimo. Nansha bikale namani, yewa yense ulombola lwitabijo mwadi akulupile amba kakafupo lonso.

Lelo Yesu mwine wanena’mba “ami ne lusangukilo ne būmi,” usa bine kusangula Lazalasa, mufwe pano ke mafuku aná? Yesu waipangula Mata amba: “Le ubaitabija’byo, a?” Aye amba: “Eyo-mwa, Mfumwami, pano naitabija’mba wi Kidishitu Mwanā Leza, yewa wiya mu ino ntanda.” Mata byaitabije amba Yesu ubwanya ne kulonga’po kintu enka mu difuku’dya, waenda lubilo ku njibo ne kusapwila mwanabo kufula amba: “Mufundiji waiya, yao ukwita.” (Yoano 11:25-28) Ponka’po, Madia wataluka ku njibo, bantu pa kumona’mba waenda ku kibundu kya Lazalasa, kebamulonda.

Ino Madia waenda kudi Yesu, wapone ku maulu andi ne kunena’nka na byanenanga mwanabo mwana-mukaji amba: “A Mfumwami, shi wadi kuno longa mwanetu kafwilepo.” Yesu pa kumona Madia ne bibumbo bidila, kabinze munda mwandi, ne ñeni ibamuvutakana, wasumija’nka ne impolo. Bantu batala abatulumuka. Bamo abeipangula’mba: “Le uno muntu wapūtwile meso a mpofu watuninye namani kukankaja uno’u kufwa?”​—Yoano 11:32, 37.