Omu Yesu afumine kuPeleya, ahetele kwakamwihi naMbetane, nganda yize yapwile jikilomita jitatu kumututuko waYelusalema. Vandumbu jaLazalu vaMaliya naMalita vapwile nakulishona ndumbwavo uze afwile. Kaha vatu vavavulu vejile nakuvavendejeka.

Mutu umwe alwezele Malita ngwenyi Yesu ali nakwiza, kaha alahile nakumusesa. Malita alwezele Yesu vyuma apwile nakushinganyeka ikiye nandumbwenyi Maliya hamakumbi aze awana, ambile ngwenyi: “Ove Mwata, kachi wapwanga kuno kachi ndumbwami kafwileko.” Echi kachasolwele nge Malita kapwile nalutalililoko. Kaha ambile ngwenyi: “Ngunatachikiza ngwami vyeshovyo naulomba kuli Kalunga, mwakuhanavyo.” (Yowano 11:21, 22) Ashinganyekele ngwenyi pamo Yesu nahase kukafwa ndumbwenyi.

Yesu ambile ngwenyi: “Ndumbwove mwasanguka.” Malita omu evwile mazu kana, ashinganyekele ngwenyi Yesu apwile nakutalisa kukusanguka chize nachikapwa hano hamavu kulutwe, kulumbununa lutalililo luze apwilenga nalwo Apalahama navakwavo veka. Hakusaka kusolola lufwelelo lwenyi, etavile ngwenyi vyuma kana navikasoloka chikupu. Ambile ngwenyi: “Ngunatachikiza ngwami mwakasanguka omu nakukapwa kusanguka halikumbi lyakukuminyina.”—Yowano 11:23, 24.

Uno Yesu alingileko vyuma vimwe mangana akumise ushona vapwile nakwivwa tahi? Anukishile Malita ngwenyi Kalunga amuhana ngolo jakufungulula kufwa, ambile ngwenyi: “Ou mwangufwelela, numba nge mwafwa, mwakayoya cheka. Kaha weshowo ali nakuyoya oholyapwa nakungufwelela, keshi kukafwako.”—Yowano 11:25, 26.

Yesu kalumbunwine nge tumbaji twenyi vaze vapwile vavatonyi halwola luze kaveshi kukafwako. Mwomwo naikiye atelele kufwa, nge muze alwezele vaposetolo jenyi. (Mateu 16:21; 17:22, 23) Yesu alumbunwine nge weshowo mwamufwelela mwakayoya haya myaka yosena. Vatu vavavulu navakatambula kuyoya kana kuhichila mukuvasangula. Oloze vatu vakushishika vaze navakapwa vavatonyi hakukuma chakatwamino kamyaka yino kaveshi kukafwako. Kala mweshomwo nachikapwa, vatu vosena vaze vafwelela muli Yesu kaveshi kukanonga haya myaka yosenako.

Kutala Yesu uze ambile ngwenyi, “Ami yami kusanguka, yami kuyoya,” ahashile kusangula Lazalu uze afwile tahi? Yesu ahulishile Malita ngwenyi: “Unetavila vyuma kana nyi?” Ikiye amukumbulwile ngwenyi: “Eyo ove Mwata, ngunetavila ngwami ove yove Kulishitu MwanaKalunga uze vambile ngwavo mwakeza mukaye.” Hakuwana nge Malita afwelelele ngwenyi Yesu mwalingako vyuma vimwe, alahililile kwimbo, kaha asanyikile ndumbwenyi Maliya nakumuyevetela ngwenyi: “Muka-kunangula neza, ali nakukusanyika.” (Yowano 11:25-28) Ngocho, Maliya akatukile nakuya, kaha vatu veka vamukavangijilenga hakushinganyeka ngwavo apwile nakuya kuchimbumbe chaLazalu.

Oloze Maliya ayile kuli Yesu, kaha aholokelele kumahinji enyi nakuputuka kulila nakuhanjika mazu nge aze ahanjikile ndumbwenyi Malita ngwenyi: “Ove Mwata, kachi wapwanga kuno kachi ndumbwami kafwileko.” Omu Yesu amwene Maliya navatu vavavulu vapwileko vali nakulila, alishishimwine nakulyonyinga chikuma, kaha aputukile kulila. Ngocho chuma kanechi chakwachile vatu vavavulu kumichima. Oloze vamwe vahulishile ngwavo: ‘Kachi nge Yesu ahindwile mutu uze asemukile kapuputa, kaha ika ahonenanga kukinga Lazalu azeneke kufwa tahi?’—Yowano 11:32, 37.