Ka Yesu osea Perea, ochopo e alwora mar Bethania ma en gweng’ man kilomita adek kowuok yo wuok-chieng’ mar Jerusalem. Lazaro nyocha otho machiegni. Maria kod Maritha ma gin nyimine Lazaro ywago thone. Ji mang’eny obiro hoyogi.

Kae to ng’at moro nyiso Maritha ni Yesu biro. Maritha dhi mapiyo mondo oromne. Maritha nyiso Yesu gimoro ma nenore ni en kaachiel gi nyamin-gi gisebedo ka giparo. Owachone kama: “Ruoth, ka dine bed ni in kae, owadwa dine ok otho.” Kata kamano, mano ok nyis ni oonge gi geno. Maritha wacho niya: “Ang’eyo ni gimoro amora mikwayo Nyasaye, Nyasaye biro miyi.” (Johana 11:21, 22) Pod en gi yie ni Yesu nyalo konyo owadgi mosethono.

Yesu dwoke kama: “Owadu biro chier.” Maritha paro ni Yesu wuoyo kuom chier mar kinde ma biro, ma en chier ma Ibrahim kod jomamoko bende ne geno. Kae to onyiso yie ma en-go ni chier ma kamano biro timore adier. Owacho ne Yesu niya: “Ang’eyo ni obiro chier e kinde chier chieng’ giko.”​—Johana 11:23, 24.

Kata kamano, be ne nyalore mondo Yesu ochier Lazaro gie sano? Oparo ne Maritha ni Nyasaye osemiye teko kod nyalo mar loyo tho. Owachone kama: “Ng’at ma nyiso yie kuoma, kata ka otho, obiro bet mangima kendo; bende, ng’ato ang’ata mangima kendo ma nyiso yie kuoma ok bi tho ngang’. Be iyie gi mano.”​—Johana 11:25, 26.

Yesu ok tem wacho ni jopuonjrene ma ne ngima e kindeno ne ok dhi tho ngang’. Kata mana en owuon nyaka to otho, mana kaka ne osewacho ne jootene. (Mathayo 16:21; 17:22, 23) Yesu temo jiwo ni joma nyiso yie kuome nyalo yudo ngima ma nyaka chieng’. Ji mang’eny ibiro chier mondi eka giyud ngimano. Kata kamano, ok bi chuno ni joma pod ngima moluoro Nyasaye otho, sama giko mar pinyni biro chopo. Kuom jogo duto, gima ng’ato ka ng’ato nyalo bedogo gadier en ni ka ginyiso yie kuom Yesu to ok gibi tho tho ma nyaka chieng’.

Kata kamano, Yesu eka oa wacho ni “An e chier kendo an e ngima.” Be onyalo konyo Lazaro ma koro osebet e liel kuom ndalo ang’wen? Yesu penjo Maritha kama: “Be iyie gi mano?” Odwoke ni: “Ee, Ruoth, aseyie ni in e Kristo Wuod Nyasaye, jal ma ne onego obi e piny.” Nikech Maritha nigi yie ni Yesu nyalo timo hono moro e odiechieng’no, oringo pacho kendo onyiso nyamin-gi ka gin kar kendgi niya: “Japuonj ni kacha, kendo oluongi.” (Johana 11:25-28) Gikanyono, Maria wuok e ot, kendo jomamoko luwe ka giparo ni odhi kama liend Lazaro nitiere.

Kar mano, Maria dhi ir Yesu, opodho e tiende koywak, kendo onwoyo mana weche ma nyamin-gi nende osewacho ne Yesu. Owacho kama: ‘Ruoth, ka dine bed ni in kae, owadwa dine ok otho.’ Yesu kecho Maria kod oganda ma ywak kode. Chunye chandore kendo en bende pi wang’e chuer. Joma nene koywak wuoro ahinya. To moko kuomgi penjo niya: ‘Ka Yesu e ma noyawo wenge ng’at ma muofucha, donge nonyalo geng’o ng’atni kik tho?’​—Johana 11:32, 37.