Jesu o tšwa Perea, gomme o fihla ka ntle ga motse wa Bethania, motsana wo o lego bokgole bja dikhilomithara tše e ka bago tše tharo ka bohlabela bja Jerusalema. Maria le Mareta, e lego dikgaetšedi tša Latsaro, ba a lla ka ge Latsaro a sa tšwa go hwa. Ba bantši ba tlile go tlo ba homotša.

Ke moka motho tsoko o botša Mareta gore Jesu o a batamela, gomme Mareta o kitimela go yo mo gahlanetša. Mareta o botša Jesu seo yena le ngwanabo ba ka bago ba be ba nagana ka sona matšatšing a mane, o re: “Morena, ge nkabe o be o le mo, kgaetšedi ya ka nkabe a se a hwa.” Lega go le bjalo, se ga se bolele gore ga a na kholofelo. Mareta o re: “Ke a tseba gore dilo tše dintši tše o di kgopelago go Modimo, Modimo o tla go nea tšona.” (Johane 11:21, 22) Mareta o nagana gore Jesu o sa dutše a ka thuša kgaetšedi ya gagwe.

Jesu o araba ka gore: “Kgaetšedi ya gago o tla tsoga.” Mareta o phetha ka gore Jesu o bolela ka tsogo ya nakong e tlago ya mo lefaseng, e lego kholofelo yeo Aborahama le ba bangwe ba bego ba na le yona. Le gona o bontšha go dumela ga gagwe gore seo se tla direga e le ka kgonthe, o re: “Ke tseba gore o tla tsoga tsogong letšatšing la mafelelo.”—Johane 11:23, 24.

Lega go le bjalo, na e ka ba e le gore Jesu a ka ba imolla le semeetseng boemong bjo? O gopotša Mareta gore yena o na le matla ao a a neilwego ke Modimo a go fenya lehu, o re: “Yo a dumelago go nna, gaešita le ge a ka hwa, o tla phela; le gona yo mongwe le yo mongwe yo a phelago e bile a dumela go nna, a ka se ke a hwa le gatee.”—Johane 11:25, 26.

Jesu ga a bolele gore barutiwa ba gagwe bao ba phelago ka nako yeo ba ka se tsoge ba hwile. Le yena o swanetše go hwa, bjalo ka ge a ile a botša baapostola ba gagwe. (Mateo 16:21; 17:22, 23) Jesu o gatelela gore go dumela go yena go ka lebiša bophelong bjo bo sa felego. Ba bantši ba tla hwetša bophelo bjo bjalo ka tsogo ya bahu. Lega go le bjalo, bao ba botegago bao ba tla bego ba phela bofelong bja tshepedišo ye ba ka no se latswe lehu le gatee. Go sa šetšwe gore boemo ke bofe, bohle bao ba dumelago go yena ba ka kgodišega gore ba ka se hwele sa ruri.

Eupša na Jesu, yo a itšego: “Ke nna tsogo le bophelo,” a ka thuša Latsaro yo bjale a nago le matšatši a hwile? Jesu o botšiša Mareta o re: “Na o dumela se?” Mareta o araba ka gore: “Ee Morena; ke dumetše gore o Kriste Morwa wa Modimo, Yena yo a bego a tlo tla lefaseng.” Mareta ka ge a dumela gore Jesu a ka dira se sengwe ka lona letšatši leo, o kitimela gae gomme a botša ngwanabo ka thopeng, o re: “Morutiši o gona gomme o a go bitša.” (Johane 11:25-28) Ka nako yeo, Maria o tloga ntlong, go se go ye kae a latelwa ke ba bangwe, bao ba naganago gore o ya lebitleng la Latsaro.

Go e na le moo, Maria o ya go Jesu, a wela dinaong tša gagwe a lla, ke moka a boeletša mantšu a ngwanabo a re: “Morena, ge nkabe o be o le gona, kgaetšedi ya ka nkabe a se a hwa.” A kgomilwe ke go bona Maria a lla gotee le mašaba, Jesu a tsetsela, a tshwenyega, a ba a ntšha megokgo. Seo se kgoma bao ba bonago boemo bjo. Eupša ba bangwe ba a botšiša ba re: ‘Ge e ba Jesu a kgonne go fodiša monna yo a belegwego e le sefofu, na o be a ka palelwa ke go thibela gore yo le yena a se hwe?’—Johane 11:32, 37.