Sesusi atundu ko Peleya, aende ko Betania, otyilongo tyikala onokilometulu 3 koutundilo wo Selusalei. Pomuvo opo, Maliya na Malata ankho vena omutambo, omphange yavo Lasalu wanyima. Ovanthu ovanyingi ankho veya okuvepameka.

Pahe omunthu umwe apopila Malata okuti Sesusi weya, Malata ahateka aende-ko. Malata apopila Sesusi otyipuka ankho vekahi nokusoka nondenge yae mokueenda kuononthiki ononkhuana, ati: “Tatekulu, inkha wali kuno, ñgeno omphange yange kankhile.” Mahi otyo katyilekesa okuti ankho utupu ekevelo. Malata apopi okuti: “Ame ndyityii okuti kese etyi wiita ku Huku, Huku mekupe-tyo.” (Suau 11:21, 22) Ankho utyii okuti Sesusi upondola okututilisa omphange yae.

Sesusi emupopila okuti: “Omphange yove mapinduka-po.” Malata asoko okuti Sesusi upopia etutilo malikalingwa komutwe wandyila kombanda yohi, ekevelo ankho Ambalaiau novanthu ovakuavo vali nalio. Iya apopi etyi tyilekesa okuti ankho una onthumbi yokuti otyo matyikamoneka umwe, ati: “Ame ndyityii okuti makapinduka-po petutilo monthiki yahulilila-ko.” — Suau 11:23, 24.

Mahi, okuti pomuvo opo Sesusi ankho upondola okuvekuatesako motyitateka otyo? Sesusi ahinangelesa Malata okuti Huku wemuavela epondolo liokumana-ko ononkhia, ati: “Una ukala nekolelo mu ame, inkha unkhia, makakala vali nomuenyo. Iya una wokuna omuenyo, akala nekolelo mu ame, kakankhia-nkhia vali.” — Suau 11:25, 26.

Sesusi ankho kekahi nokupopia okuti ovalongwa vae kamavankhia-nkhia vali. Mokonda ngetyi apopila ono apositolu mbae nae ankho mankhi. (Mateusi 16:21; 17:22, 23) Sesusi ankho ukahi nokupopia okuti okukala nekolelo mwe, tyituala komuenyo wahapu. Ovanthu ovanyingi mavakakala nomuenyo oo, putyina vamatutiliswa. Mahi vamwe ovakuatyili mavakavasiwa nomuenyo konthyulilo youye uno, kamavakankhia-nkhia vali. Mahi aveho vakala nekolelo mu Sesusi vapondola okukala nonthumbi yokuti ononkhia mambukapwa-ko apeho.

Sesusi wokuapopia okuti: “Ame, ame etutilo, ame muenyo,” okuti ankho upondola okututilisa Lasalu, wankhia-le apalambe ononthiki? Sesusi apulu Malata ati: “Ove otyo utyitavela?” Ngwe akumbulula okuti: “Enga Tatekulu, ndyitavela okuti ove, ove Kilisitu Omona wa Huku, una ankho una okuya mouye.” Mokonda ankho una ekolelo liokuti Sesusi upondola okulinga tyimwe monthiki oyo, Malata akahateka aende keumbo, akapopila ondenge yae pokamphengi ati: “Omulongesi weya ukahi nokukuihana.” (Suau 11:25-28) Maliya atundu meumbo liwa-liwa, ovanthu avemulandula, ankho vasoka okuti wenda keendo lya Lasalu.

Mahi Maliya ankho wenda ku Sesusi, etyi ehika kwe aikila konongolo pu Sesusi otyo alila, apopi vali etyi omukulu wae ankho apopia-le ati: “Tatekulu, inkha wali kuno, ñgeno omphange yange kankhile.” Etyi amona Maliya novanthu ovakuavo ankho valila, Sesusi akeme, aihamenwa unene alo umwe, alili. Otyo atyihiki unene komitima viovanthu vemutala. Mahi, vamwe avapulu okuti: ‘Inkha Sesusi wapatula omaiho omumphoki, okuti ankho kapondola okulinga tyimwe opo Lasalu ahankhie?’ — Suau 11:32, 37.