Hesus a sali for di Perea i tabata yegando Betania, un pueblito ku tabata situá un tres kilometer ost di Herúsalèm. Maria i Marta tabata tristu debí ku nan ruman hòmber Lázaro a muri algun dia promé. Hopi hende a bin konsolá nan.

Komo ku Marta a haña sa ku Hesus tabata yegando, el a kore pa bai kontr’é. El a bis’é: “Señor, si bo tabata akinan, mi ruman lo no a muri.” Probablemente, esei tabata loke é i su ruman muhé tabata pensa e último kuater dianan ku a pasa. Pero Marta tabatin speransa. El a bisa Hesus: “Mi sa ku tur loke bo pidi Dios, Dios lo duna bo.” (Huan 11:21, 22) El a pensa ku kisas Hesus por a hasi algu pa su ruman hòmber.

Hesus a bis’é: “Bo ruman lo lanta for di morto.” Marta a pensa ku Hesus lo tabata referí na e futuro resurekshon ku lo bai tin riba tera, loke tantu Abraham komo otro sirbidó di Dios tabata spera riba dje. Anto ekspresando su konvikshon ku esei lo sosodé sigur, el a bisa Hesus: “Mi sa ku lo e lanta den e resurekshon riba e último dia.”—Huan 11:23, 24.

Pero Hesus lo por a hasi algu pa trese alivio na e momento ei? El a kòrda Marta ku Dios a dun’é poder riba morto. El a bisa Marta: “Esun ku pone fe den mi, maske e muri, lo bolbe biba; i tur ku ta bibu i ku pone fe den mi lo no muri nunka.”—Huan 11:25, 26.

Hesus no tabata ke men ku su disipelnan ku tabata na bida e tempu ei lo no a muri nunka. E mes lo mester a muri, manera el a bisa su apòstelnan. (Mateo 16:21; 17:22, 23) Loke e tabata ke enfatisá ta ku hende ku pone fe den dje lo por biba pa semper. Kon asina? Wèl, hopi hende lo risibí bida eterno pa medio di resurekshon. Pero, hende fiel ku lo ta na bida na fin di e mundu akí lo no muri nunka. Sea kual sea e kaso, tur hende ku pone fe den Hesus por tin e speransa di risibí bida eterno.

Pero, Hesus, kende a kaba di bisa ku e ta “e resurekshon i e bida,” por a hasi algu pa Lázaro, kende ya tabatin algun dia morto? Hesus a puntra Marta: “Bo ta kere esaki?” Marta a kontestá: “Sí, Señor; mi ta kere ku abo ta Kristu, e Yu di Dios, esun ku mester a bini na mundu.” Marta tabatin fe ku Hesus lo por a hasi algu e dia ei mes. P’esei el a kore bai kas i bisa Maria den privá: “E Maestro t’ei i ta puntra pa bo.” (Huan 11:25-28) Mesora Maria a sali bai. E hendenan ku tabata einan a asumí ku ta na graf di Lázaro e tabata bai i nan a siguié.

Pero Maria a bai serka Hesus. Ku awa na wowo, el a kai na pia di Hesus i a ekspresá e mesun sintimentunan ku su ruman muhé: “Señor, si bo tabata akinan, mi ruman lo no a muri.” Hesus a sinti doló ora el a mira Maria i e otro hendenan ta yora; awa a kuminsá basha for di su wowo. Esei a konmové e hendenan ku tabata einan. Algun di nan a puntra: ‘Si Hesus por a duna e hòmber siegu su bista, lo e no por a hasi nada pa evitá ku esun akí a muri?’—Huan 11:32, 37.