Jesusqa Perea lawmantam Betania llaqtaman ña chayaykuchkarqaña, Betaniaqa Jerusalenpa hichpallanpiñam karqa. Chaypim Lazaroqa tawa punchawña wañukurqa, hinaptinmi panin Mariawan Martaqa llakisqallaña karqaku. Chaymi achka runakuna llakinkupi kaysiq rirqaku.

Hinaptinmi Jesus hichpallapiña kasqanmanta Martaman huk kaqnin willaykuptin Martaqa kallpaylla taripaykuq lluqsirqa. Hinaspam ñañan Mariawan sunqunkupi kaqta Jesusman nirqa: “Señor, sichum kaypi kawaq karqa hinaptinqa turillayqa manachá wañukunmanchu karqa”, nispa. Chayta nispanpas Mariaqa nirqataqmi: “Manam iskayrayanichu tukuy ima mañakusqaykita Dios qusunaykimantaqa”, nispa (Juan 11:21, 22). Payqa yacharqam Jesusqa imatapas ruwananpaq atiyniyuq kasqanta.

Jesusñataqmi nirqa: “Turikiqa hatarimunqam”, nispan. Martañataqmi piensarqa hamuq punchawpi Abrahanpas hinaspa Diosta yupaychaqkunapas kawsarimunankumanta rimasqanta. Chaymi mana iskayrayaspan nirqa: “Ñuqaqa yachanim tukupay punchawpi wañuqkuna kawsarimuptin paypas hatarimunanta”, nispa (Juan 11:23, 24).

Jesusñataqmi Diosmanta atiy chaskisqanta yuyarichinanpaq Martata nirqa: “Pipas ñuqapi iñiqqa wañuspanpas kawsarimunqam, pipas kawsaqqa hinaspa ñuqapi iñiqqa manam haykapipas wañunqachu”, nispa (Juan 11:25, 26).

Jesusqa apostolninkunamanmi willakurqaña wañuchisqa kananmanta (Mateo 16:21; 17:22, 23). Chaymi Jesusqa mana rimachkarqachu qatiqninkuna manaña wañunankumantaqa, aswanqa ‘paypi iñiqkuna’ wiñay kawsayta haypanankumantam rimachkarqa, chaytaqa achkam kawsarispaña haypananku karqa. Tukupay punchawkunapim ichaqa Diospa piñakuynin punchaw chayamuptin manaña wakinqa wañunqakuchu. Chaynaqa, Jesusta imapiñapas kasukuqkunaqa wiñay kawsaytam chaskinqaku.

Hinaptinqa, ¿yaqachu Jesusqa imallatapas Lazarorayku ruwarqa? Payqa nirqam: “Ñuqam kani kawsarichiqpas hinaspa kawsay quqpas”, nispa. Hinaspam Martata nirqa: “¿Creenkichu chayta?”, nispa. Martañataqmi nirqa: “Arí señor, ñuqaqa creenim Diospa churin Cristo kasqaykita, qamqa runakunaman hamunanpaq kaqmi kanki”, nispa. Martaqa manam iskayrayarqachu Jesusqa Diospa atiyninwan imapas ruwananmantaqa. Chaymi wasinman chaylla kutispan ñañanta sapallanpi nirqa: “Yachachiqmi kaypi kachkan hinaspam qayasuchkanki”, nispan (Juan 11:25-28). Mariañataqmi chaylla wasimanta lluqsirqa, hinaptinmi runakuna qipanta qatirqaku Lazaropa sepulturanman risqanta piensaspanku.

Mariam ichaqa Jesuspa kasqanman rirqa, hinaspam ñawpaqninpi qunqurakuykuspan waqakurqa “señor, kaypi kaptikiqa turillayqa manach  wañukunmanchu karqa” nispan. Chayna waqasqanta hinaspa Mariata qatiq runakunapa waqasqanta qawaykuspanmi Jesusqa llumpayta llakirikuruspan paypas waqarurqa. Chaymi wakinqa uyarayarqakuraq, wakinmi ichaqa niqku: “Kay runaqa ñawsa runapa ñawinta qawarichichkaspanqa, ¿manachu Lazarota wañunanmanta libraykunman karqa?”, nispa (Juan 11:32, 37).