Pidabuluka Yezu ku Pereya, iye afika ku Bhetanya, kumabulukiro a dzuwa a Yerusalemu nsindzo wa makilometru matatu. Nakuti Lazaro akhadamala kwene kufa, Mariya na Marta akuti ndi abale a Lazaro akhali akutsukwala kakamwe. Anthu azinji abwera toera kuabalangaza.

Buluka penepo, munthu unango apanga Marta kuti Yezu akufika, natenepa Marta athamanga toera kaonana na Yezu. Mudagumanikana iwo, Marta apanga Yezu pikhanyerezera iye na m’bale wace Mariya mu ntsiku zinai, iye alonga: “Mbuya, mbamudakhala pano m’bale wanga mbadafa tayu.” Pyenepi nee pikhapangiza kuti iye nee akhali na cidikhiro. Marta alonga: “Mbwenye ngakhale cincino, ine ndisadziwa kuti cinthu consene cinaphemba imwe kuna Mulungu, Mulungu anakupasani.” (Juwau 11:21,22) Marta akhadziwa kuti Yezu akhali na mphambvu zakulamusa Lazaro muli akufa.

Yezu atawira: “M’bale wako anadzalamuka.” Natenepa, Marta akhanyerezera kuti Yezu akulonga pya kulamuswa muli akufa kwa ntsogolo pa dziko ya pantsi, kwakuti Abhrahamu na anango akhadikhirambo. Marta alonga pikhakhulupira iye mukulonga: “Ine ndisadziwa kuti iye anadzalamuka pakulamuswa kwa anyakufa pa ntsiku yakumalisa.”—Juwau 11:23, 24.

Kodi Yezu mbadakwanisa kuabalangaza mwakucimbiza pa nyatwa ineyi? Iye akumbusa Marta kuti Mulungu akhadampasa mphambvu toera kukunda kufa, iye alonga: “Ine ndine kulamuka muli akufa na umaso. Munthu onsene anandikhulupira, maseze afe, anadzakhala pontho na umaso; pontho munthu onsene ali maso angandikhulupira, iye cipo anadzafa.”—Juwau 11:25, 26.

Yezu nee akhafuna kulonga kuti anyakupfundzace akuti akhali maso mu ndzidzi unoyu cipo anafa. Mwakubverana na pidalonga iye kuna apostolo ace, iye mbadafambo. (Mateu 16:21; 17:22, 23) Yezu alonga kuti anthu angan’khulupira anadzakhala na umaso wa kwenda na kwenda. Kwa anthu azinji, umaso unoyu mbadauwina kubulukira mu kulamuswa muli akufa. Natenepa, anthu anango akukhulupirika akuti ali maso mu ntsiku zino zakumalisa panango cipo anafa. Mwakukhonda tsalakana pikhafuna kuacitikira, onsene anan’khulupira anakhala na cinyindiro cakuti angafa anadzalamuswa.

Pidalonga Yezu kuti, “Ine ndine kulamuka muli akufa na umaso,” kodi pyaphedza Lazaro? Yezu abvundza Marta: “Usakhulupira pyenepi?”Iye atawira: “Inde, Mbuya, ine ndisakhulupira kuti imwe ndimwe Kristu, Mwana wa Mulungu, ule akhadikhirwa kuti mbadabwera pa dziko.” Marta akhakhulupira kuti Yezu mbadacita pinthu pa ntsiku ineyi, natenepa iye athamanga mbaenda kapanga m’bale wace pakhundu kuti: “Mpfundzisi ali pano, iye asakucemera.” (Juwau 11:25-28) Pa ndzidzi unoyu, Mariya abuluka panyumba, mbatowererwa na anthu azinji thangwi akhanyerezera kuti iye akhaenda ku nthumbi kudaikhwa Lazaro.

Mwakusiyana na pikhanyerezera anthu, Mariya aenda kuna Yezu. Pidafika iye agodama pa miyendo yace mbapangiza mabvero mabodzi ene na a m’bale wace mbalonga: “Mbuya, mbamudakhala pano, m’bale wanga mbadafa tayu.” Pidaona Yezu Marta na anango mbakalira, iye atsukwala kakamwe mbalirambo. Anthu adaona Yezu mbakalira adzumatirwa. Mbwenye anango akhabvundza: “Khala munthu uyu akwanisa kufungula maso a boliboli, nee mbadakwanisambo kucita cinthu toera Lazaro akhonde kufa?”—Juwau 11:32, 37.