Jésus alondo na Pérée na lo si fadeso na yanga ti Béthanie, so ayeke mbeni kodro so ayo kilomètre 3 na mbage ti est ti Jérusalem. Marie na Marthe angbâ ti toto kuâ ti ita ti ala Lazare, na gbâ ti azo aga ti dë bê ti ala.

Na pekoni, mbeni zo atene na Marthe so Jésus ayeke na lege, na lo si nduru awe. Tongaso, Marthe atambela na loro ti gue na devant ti Jésus. Marthe atene na Jésus ye so âmanke lo na ita ti lo Marie ayeke pensé na ndo ni, a sara lango osio awe. Lo tene: “Seigneur, tongana mo yeke fade ge, ka ita ti mbi ti koli akui ape.” Me, ye so aye pëpe ti tene so Marthe ayeke na beku ape, ndali ti so lo tene na pekoni lo tene: “Mbi hinga so ye kue so mo yeke hunda na Nzapa, Nzapa ayeke mû ni na mo.” (Jean 11:21, 22) Lo hinga so Jésus apeut ti sara mbeni ye ndali ti ita ti lo Lazare.

Jésus atene na lo atene: “Ita ti mo ayeke zingo na kuâ.” Marthe apensé atene Jésus angbâ ti sara tënë ti londongo ti akuâ so ayeke si ande na ndo ti sese na so ayeke mbeni beku so Abraham nga na ambeni zo amä na bê na ni lani. Na mbage, Marthe afa confiance so lo yeke na ni na ndo ti tënë ni so, tongana lo tene: “Mbi hinga so lo yeke zingo ande na kuâ na lâ ti nda ni.”—Jean 11:23, 24.

Ye oko, eskê Jésus apeut ti sara mbeni ye so apeut ti dë bê ti Marthe ge hio? Jésus adabe ti Marthe so Nzapa amû na lo ngangu na ndo ti akuâ, lo tene: “Zo so amä na bê na mbi, atâa lo kui, lo yeke kiri na fini. Nga, zo kue so ayeke na fini nga lo mä na bê na mbi, lo yeke kui ande lâ oko ape.”—Jean 11:25, 26.

Jésus aye pëpe ti tene so adisciple ti lo so angbâ na fini ayeke kui ande lâ oko ape. Même lo Jésus ni kue lo doit ti kui, tongana ti so lo tene lani na abazengele ti lo (Matthieu 16:21; 17:22, 23). Jésus aye ti fa so, ti duti na mabe na lo apeut ti sara si mbeni zo awara fini ti lakue lakue. Ti ambeni, ala yeke wara fini ni so ande tongana a zingo ala na kuâ. Me, azo so ayeke ngbâ ande na fini, nga so ayeke be-ta-zo na ngoi ti nda ni so, alingbi ti kui lâ oko ape. Tongaso, atâa ala kui la a zingo ala wala ala hon Harmaguédon na fini lê ti ala, azo so ayeke na mabe na Jésus apeut lâ oko ape ti kui biani biani.

Me, Jésus so atene ‘ni yeke londongo ti akuâ nga na fini’ apeut ti zingo Lazare so akui a sara alango mingi awe so? Jésus ahunda Marthe atene: “Mo mä na bê na tënë so?” Marthe atene: “En, mbi mä na bê na ni, Seigneur. Mbi mä na bê awe so mo yeke Christ, Molenge ti Nzapa, lo so ayeke ga na yâ ti dunia so.” Na dutingo na mabe so Jésus apeut ti sara mbeni ye na lango ni so, Marthe amû loro na yanga-da na lo tene yeke na yâ ti mê ti ita ti lo Marie lo tene: “Maître ayeke ge na lo hunda mo.” (Jean 11:25-28). Marie angbâ alondo na yanga-da ni, lo hon, na kete na pekoni, ambeni azo amû peko ti lo, ndali ti so ala pensé atene lo yeke gue na place ti dû ti kuâ ti Lazare la.

Nde na so, Marie ague na mbage ti Jésus, lo tï na sese, lo toto na lo tene oko tënë so ita ti lo Marthe atene fade, lo tene: “Seigneur, tongana mo yeke fade ge, ka ita ti mbi akui ape.” Na bango Marie nga na azo so ayeke dema na vundu, li ti Jésus ayeke kpô pëpe. Lo kue lo ngbâ lo toto, na ye so andu bê ti azo so ayeke bâ lani lo. Me ambeni ahunda ndo atene: ‘Jésus so azi lani lê ti waziba so, lo lingbi fade pëpe ti kanga lege na koli so ti kui?’—Jean 11:32, 37.