Naazwa ku Pereya, Jesu wasika kumunyinza wamunzi wa Betaniya, imunzi uuli kubusena ikulampa makkilomita otatwe kuzwa ku Jerusalemu. Mariya a Marta, ibacizyi ba Lazaro, balalila akaambo kakuti wafwa. Bantu banji baboola kuzyikubaumbulizya.

Mpoonya muntu umwi waambila Marta kuti Jesu ulaafwaafwi kusika, eelyo waunka cakufwambaana kuti akayaane anguwe. Marta waambila Jesu makani aalangilwa kuti ngaali kuyeeya walo amucizyi wakwe kwamazuba one, wati: “Mwami, ikuti nookaliko kuno, mukwesu naatakafwa.” Nokuba boobo, eeci tacaambi kuti tajisi bulangizi. Marta waamba kuti, “Ndilizyi kuti kufwumbwa ncomulomba Leza, Leza ulakupa.” (Johane 11:21, 22) Ulimvwa kuti Jesu ulakonzya kumugwasya munyina.

Jesu wamwaambila kuti: “Imunyoko ulabuka.” Pele Marta uyeeya kuti Jesu waamba bubuke bwakupona anyika ibuyoocitika kumbele, ibulangizi oobo mbwaakajisi Abrahamu alimwi abamwi. Alimwi watondezya kuti ulaalusyomo lwakuti eeci ciyakucitika ncobeni, wati: “Ndilizyi kuti uyoobuka mububuke mubuzuba bwamamanino.”—Johane 11:23, 24.

Pele sena kuli ncakonzya kucita Jesu aciindi eeci kutegwa agwasye mubukkale oobu? Jesu wayeekezya Marta kuti Leza wakamupa nguzu zyakuzunda lufwu, wamwaambila kuti: “Ooyo uundisyoma, nokuba kuti wafwa uyooba muumi alimwi; alimwi muntu woonse uupona akundisyoma takafwi pe.”—Johane 11:25, 26.

Jesu taambi kuti basikwiiya bakwe ibapona aciindi eeci tabakafwi pe. Naba nguwe weelede kufwa, mbubonya mbwaakaambila baapostolo bakwe. (Matayo 16:21; 17:22, 23) Jesu ukankaizya kaambo kakuti aabo bamusyoma balakonzya kuba abuumi butamani. Bunji bwabantu bayakuba abuumi buli boobu kwiinda mukubusyigwa kubafwu. Nokuba boobo, bantu bamwi basyomeka ibapona kumamanino aabweende bwazintu obuno tabalangilwi kufwa pe. Mumbazu zyoonse eezyi zyobilo, boonse ibamusyoma balakonzya kuba masimpe kuti tabakafwi mane kukabe kutamani.

Pele sena Jesu, ooyo iwazwa aakwaamba kuti, “Mebo ndendime bubuke abuumi,” ulakonzya kumugwasya Lazaro, lino uufwide kwamazuba aali mbwaabede? Jesu wamubuzya Marta kuti: “Sena ulaasyoma makani aaya?” Wavwiila kuti: “Inzya Mwami, ndasyoma kuti nduwe Kristo Mwana wa Leza, ooyo weelede kuboola munyika.” Kajisi lusyomo lwakuti Jesu ulakonzya kucita cintu cimwi mubuzuba mbubonya oobu, Marta wafwambaana kuya kuŋanda akwaambila mucizyi wakwe kumbali ategwa: “Mwiiyi wasika ulakwiita.” (Johane 11:25-28) Amvwe boobo, Mariya wazwa muŋanda, mpoonya bamwi bamuccilila, kabayeeya kuti uunka kucuumbwe ca Lazaro.

Muciindi cakuunka kucuumbwe, Mariya waunka kuli Jesu, wawida kumaulu aakwe kalila, eelyo waamba majwi aatondezya mbwaali kulimvwa awalo mwanookwabo Marta, ulaamba: “Mwami, ikuti nookaliko kuno, mukwesu naatakafwa.” Jesu naabona Mariya kalila antoomwe ankamu yabantu, wapenga kapati mumoyo, wausa alimwi mane yamweenda misozi. Eeci cabanjila mumoyo aabo balangilila. Pele bamwi babuzya kuti: ‘Ikuti Jesu wakajalula meso aamoofwu, sena tanaakali kukonzya kumulesya kufwa muntu ooyu?’—Johane 11:32, 37.