Jesús minacha kPerea chu lakatsu wija kBetania, nema wi akgtutu kilómetros xlimakgat kxʼeste Jerusalén. Nina makgas titaxtunit lata Lázaro nilh chu xnatalan, María chu Marta, chuntiyaku lakglipuwamakgo. Lhuwa tiku minkgonit xlakata nakamakgoxamixikgo.

Uma kilhtamaku, wi tiku makatsini Marta pi Jesús talakatsuwima chu xla taxtu xlakata natatanokglha. Akxni Marta chan niku wi Jesús, wani tuku xla chu xtala lakpuwankgonit uma akgtati kilhtamaku: «Malana, komo unu xtitawila, kintala ni xtinilh». Uma ni wamputun pi xla ni kgalhi takgalhkgalhin, xlakata xla wan: «Kkatsi pi putum tuku wix naskiniya Dios, Dios namaxkiyan» (Juan 11:21, 22). Xla lakpuwan pi Jesús tlanku namakgtaya xtala.

Alistalh, Jesús wani: «Mintala nalakastakwanampara». Marta lakpuwan pi lichuwinama talakastakwanat nema naʼanan kkatiyatni, takgalhkgalhin nema xkgalhi Abrahán chu kskujnin Dios xala makgasa. Marta kanajla chu kgalhti: «Akit kkatsi pi nalakastakwanampara kxaʼawatiya kilhtamaku» (Juan 11:23, 24).

¿Tlan wi tuku natlawa Jesús? Malakapastaka Marta pi Dios maxkinit litliwakga xlakata namakgatlaja linin: «Tiku nakinkanajlani, maski naniy, nalatamapara; chu putum tiku lama chu kinkanajlani nikxni katinilh» (Juan 11:25, 26).

Jesús ni wamputun pi xtamakgalhtawakgen nikxni katinikgolh. Asta talakaskin pi xla nani chuna la kawaninit xtamakgalhtawakgen (Mateo 16:21; 17:22, 23). Uma wamputun pi tiku nakanajlanikgo tlan namakglhtinankgo latamat nema nikxni katisputli. Lhuwa tiku namakglhtinankgo uma latamat akxni nakamalakastakwanikan. Chu max kskujnin Dios tiku lamakgo nawan akxni namasputukan kakilhtamaku nialh katinikgolh. Putum tiku nalimasiyani takanajla tlan nalipawan pi ni xlipan katinilh.

Pero Jesús, tiku aku wa pi xla «talakastakwanat chu latamat», ¿tlan namakgtaya Lázaro tiku akglhuwata kilhtamaku ninit? Xla kgalhskin Marta: «¿Wix kanajlaya uma?». Xla kgalhti: «Chuna, Malana, akit kkanajlanit pi wix Cristo, xKgawasa Dios, ama tiku Dios wa pi xʼama min kkakilhtamaku». Marta katsi pi Jesús wi tuku tlan natlawa uma kilhtamaku. Wa xlakata lakapala an kxchik chu xatsekg wani xtala: «Makgalhtawakgena unu wi, chu tasaniman» (Juan 11:25-28). María lakapala taxtu chu lhuwa tiku stalanikgo xlakata lakpuwankgo pi ama niku maknukanit Lázaro.

Pero María an niku wi Jesús, lakgtatsokgosta chu tsuku tasa chu nachuna wani la xtala: «Malana, komo wix unu xtitawila, kintala ni xtinilh». Akxni akxilha pi María chu latamanin nema stalanikgo tasamakgo, Jesús nitlan limakgkatsi chu lilakgaputsa; asta tsuku tasa. Uma kaks kamalakawani tiku anta wilakgo. Pero makgapitsi kgalhskininankgo: «Komo uma chixku tlawalh pi tlan xlakawanalh lakgaxokgo, ¿nila wi tuku xtitlawalh xlakata ni xtinilh Lázaro?» (Juan 11:32, 37).