Tikang ha Perea, inabot hi Jesus hirani ha Betania, usa nga baryo nga mga tulo ka kilometro ha este han Jerusalem. Nagtataguminatay pa hira Maria ngan Marta tungod ha kamatay han ira bugto nga hi Lasaro. Damu an kinadto basi liawon hira.

Katapos, may nagpahibaro kan Marta nga tiabot hi Jesus, salit nagdagmit hiya pagtapo. Iginsumat niya kan Jesus an ginhinunahuna nira nga magbugto ha sulod hin upat ka adlaw: “Ginoo, kon nakanhi ka la, waray unta kamatay an akon bugto.” Pero, diri ito nagpapasabot nga nawad-an hiya hin paglaom. Hi Marta nagsiring: ‘Maaram ako nga anoman an imo aroon ha Dios, ihahatag niya ha imo.’ (Juan 11:21, 22) Ginhuhunahuna niya nga bangin mabuligan pa ni Jesus an iya bugto.

Hi Jesus binaton: “Mabubuhi an imo bugto.” Kahuna ni Marta nga an iya ginsisiring amo an pagkabanhaw dinhi ha tuna ha tidaraon, an paglaom nira Abraham ngan han iba pa. Ngan iginpahayag ni Marta nga natoo hiya nga mahitatabo gud ito: “Maaram ako nga mabubuhi hiya ha pamanhaw ha kataposan nga adlaw.”—Juan 11:23, 24.

Pero, posible ba nga hini nga kahimtang maliliaw dayon hira ni Jesus? Iginpahinumdom niya kan Marta nga gintagan hiya han Dios hin gahum ha pagbanhaw, ha pagsiring: “An nagpapakita hin pagtoo ha akon, bisan kon mamatay hiya, mabubuhi; ngan an ngatanan nga buhi ngan nagpapakita hin pagtoo ha akon diri na gud mamamatay.”—Juan 11:25, 26.

Diri karuyag sidngon ni Jesus nga an iya mga disipulo nga buhi pa hadto diri gud mamamatay. Kay bisan hiya kinahanglan mamatay, sugad han iya iginsumat ha mga apostol. (Mateo 16:21; 17:22, 23) Ginpabug-atan ni Jesus nga an nagpapakita hin pagtoo ha iya magkakaada kinabuhi nga waray kataposan. Para ha damu, an sugad nga kinabuhi makakarawat pinaagi ha pagkabanhaw. Pero, an magtinumanon nga nabubuhi ha kataposan hini nga sistema bangin diri na gud mamatay. Anoman an kahimtang, an bisan hin-o nga nagpapakita hin pagtoo kan Jesus makakasiguro nga diri hiya makakaeksperyensya hin permanente nga kamatayon.

Hi Jesus nagsiring pa la, “Ako an pagkabanhaw ngan an kinabuhi,” pero mabubuligan gud ba niya hi Lasaro nga pipira ka adlaw na nga patay? Ginpakianhan ni Jesus hi Marta: “Natoo ka ba hini?” Hiya binaton: “Oo, Ginoo; natoo ako nga ikaw an Kristo nga Anak han Dios, an Usa nga makanhi ha kalibotan.” Tungod kay natoo hi Marta nga may mahihimo hi Jesus hito mismo nga adlaw, nagdagmit hiya pag-uli ngan ginhuringan an iya bugto: “Inabot na an Magturutdo ngan ginpapatawag ka niya.” (Juan 11:25-28) Katapos binaya hi Maria ha balay, ngan waray pag-iha sumunod ha iya an iba kay naghunahuna hira nga makadto hiya ha lubnganan ni Lasaro.

Pero, kinadto hi Maria kan Jesus, nagtatangis nga yinukbo ha iya tiilan, ngan gin-utro an ginsiring han iya bugto: “Ginoo, kon nakanhi ka la, waray unta kamatay an akon bugto.” Pakakita ni Jesus kan Maria ngan ha mga tawo nga nananangis, nabantad an iya kasingkasing, nasubo gud hiya, ngan nagtangis pa ngani. Nabantad liwat hito an mga nakakita. Pero an iba nagpakiana: ‘Kon natambal ni Jesus an buta, diri ba niya mapupugngan an kamatay ni Lasaro?’—Juan 11:32, 37.