KAPITE 90
“Te Fakatuʼuake Pea Mo Te Maʼuli”
-
ʼE TAU MAI IA SESU, HILI TE MATE ʼO LASALO
-
“TE FAKATUʼUAKE PEA MO TE MAʼULI”
Neʼe haʼu ia Sesu mai Pele pea neʼe fakaovi mai ki te kolo ko Petania. Neʼe tuʼu ovi ki Selusalemi ia teitei kilometa ʼe tolu. Neʼe kei putu ia Malia mo Maleta, he neʼe heʼeki faʼa fualoa te mate ʼo tonā tokolua ko Lasalo. Tokolahi neʼe ʼomai ʼo fakafimalieʼi naua.
Neʼe ui age e he tahi kia Maleta te haʼu ʼa Sesu, pea neʼe alu atu aipe ʼo fakafelaveʼi kia te ia. Neʼe fakaha age e Maleta kia Sesu te manatu ʼae neʼe lagi nā maʼu tau tehina talu mai ʼaho ʼe fa: “ ʼAliki, ka na neʼe ke ʼi heni la, neʼe mole mate toku tokolua.” Kaʼe neʼe mole fakaʼuhiga leva neʼe mole kei tui. Neʼe ina ui fenei: “ ʼE kei au tui pe, ko he meʼa ʼe ke kole ki te ʼAtua, ʼe ina foaki atu anai.” (Soane 11:21, 22) Neʼe manatu ia Maleta neʼe lagi kei feala pe ke tokoni ia Sesu ki tona tokolua.
Neʼe tali fenei age e Sesu: “ ʼE toe maʼuli ake anai tou tokolua.” Neʼe manatu ia Maleta neʼe talanoa ia Sesu ʼo ʼuhiga mo te fakatuʼuake ʼae ka hoko anai ʼi te ka haʼu ʼi te kele, pea neʼe ko he ʼamanaki neʼe maʼu e Apalahamo pea mo ʼihi atu. Pea neʼe ina fakaha ia tana tui papau ʼe hoko moʼoni anai te fakatuʼuake, ʼo ina ui fenei: “ ʼE au iloʼi ʼe toe maʼuli ake anai ʼi te temi ʼo te fakatuʼuake ʼi te ʼaho fakamuli.”—Soane 11:23, 24.
Kaʼe neʼe feala koa ke fai e Sesu ʼi te lakaga pe ʼaia he meʼa moʼo fakafimalieʼi te tau tehina? Neʼe ina fakamanatuʼi age kia Maleta neʼe foaki age e te ʼAtua kia te ia te pule ki te mate, ʼi tana ui fenei age: “Ko ʼae ʼe tui kia te au, tatau aipe pe ʼe mate, ʼe toe maʼuli anai. Pea ko ʼae ʼe maʼuli pea mo tui kia te au, ʼe mole mate anai ʼi he temi.”—Soane 11:25, 26.
Neʼe mole ui e Sesu ʼe mole mamate anai ʼi he temi te ʼu tisipulo ʼae neʼe fakatahi mo ia. Maʼia pe la mo ia neʼe tonu ke mate, ohage pe ko tana fakaha age ki ʼana apositolo. (Mateo 16:21; 17:22, 23) Kaʼe neʼe fakaha lelei e Sesu ko ʼae ʼe tui kia te ia ʼe ina maʼu anai te maʼuli heʼe gata. ʼE maʼu anai e te tokolahi te maʼuli ʼaia hili tonatou fakatuʼuake. Kaʼe ko te kau agatonu ʼae ʼe maʼuʼuli ʼi te fakaʼosi ʼo te tuʼu ʼaeni, ʼe feala ke mole natou mamate ʼi he temi. ʼI te ʼu aluʼaga ʼaia ʼe lua, ko natou ʼae ʼe tui kia te ia, ʼe feala ke natou tui papau ʼe mole natou mamate anai ʼo talu ai.
Kaʼe neʼe feala koa kia Sesu, ʼae neʼe ina ui “Ko au te fakatuʼuake pea mo te maʼuli,” ke tokoni kia Lasalo, ʼae neʼe kua mate hili ki ai ni ʼaho? Neʼe fehuʼi fenei age e Sesu kia Maleta: “ ʼE ke tui koa ki ai?” Neʼe ina tali fenei kia te ia: “ ʼEi, ʼAliki, ʼe au tui ko koe ia Kilisito, te ʼAlo ʼo te ʼAtua, ia ia ʼae ʼe haʼu ki te malamanei.” Neʼe tui ia Maleta neʼe feala ke fai e Sesu he meʼa ʼi te ʼaho pe ʼaia, koia neʼe foimo alu ai ki tona ʼapi pea neʼe ina fanafana fenei ki tona tehina: “Kua tau mai te ʼAliki pea ʼe ina pauʼi koe.” (Soane 11:25-28) Neʼe alu atu aipe ia Malia, pea neʼe muliʼi ia ia e te hahaʼi, he neʼe natou manatu ʼe alu ki te fale maka ʼo Lasalo.
Kaʼe neʼe alu ia Malia kia Sesu, neʼe tuʼutuli ifo ki ʼona vaʼe mo tagi, pea neʼe ina fai age kia te ia te ʼu palalau ʼae neʼe fai e tona tehina. Neʼe ina ui fenei: “ ʼAliki, ka na neʼe ke ʼi heni la, neʼe mole mate toku tokolua.” ʼI te sio ʼa Sesu ki te fetagihi ʼa Malia mo te hahaʼi, neʼe lotomamahi ʼaupito ai mo lotohoha, pea neʼe tagi ai. Neʼe malave te faʼahi ʼaia ki te hahaʼi. Kaʼe neʼe fehuʼi fenei e ʼihi: ‘Kapau neʼe lava fakamalolo e Sesu te tagata kivi, neʼe mole feala koa la ia ke ina faigaʼi ke ʼaua naʼa mate?’—Soane 11:32, 37.