Jesusajj Martampi Mariampi Betania marka jakʼan jikisisajja, Lazarojj imatäkäna uka sepulturaruw sarapjjäna. Uka sepulturajj mä qollunkänwa, punkupasti qalampi atkatatarakïnwa. Jesusajj sänwa: “Uka qal ateqapjjam” sasa. Kunatsa Jesusajj ukham säna uk janiw Martajj amuykänti, ukatwa akham säna: “Tata, niya thujstatäjjpachawa, pusi uröjjchejjaya” sasa. Jesusasti jupar sarakïnwa: “Jumatï creyïtajja Diosan kʼajkir chʼamapwa uñjäta sasajj ¿janit sisksma?” sasa (Juan 11:39, 40).

Uka qal ateqapjjäna ukhajja, Jesusajj alajjpachar uñtasaw akham sasin oración luräna: “Awkiy, nayar istʼatamat yuspärsmawa. Cheqansa nayajj yattwa, jumajj istʼapunistawa. Nayamp chik saytʼatäsipki uka jaqenak laykuw  nayajj ukham sista, ukhamat nayar khitanitam creyipjjañapataki” sasa. Jesusajj kuntï lurañampiskäna ukjja, Diosan chʼamapampiw lurañapäna, uk uñjapjjañapatakiw Jesusajj taqen istʼkata oración luräna. Ukatjja jachʼat artʼäna: “¡Lázaro, mistunim!” sasa. Lazarojj kayunakas amparanakas telanakamp chʼoqantata, ajanupas mä pañompi chʼoqantata ukhamaw mistunïna. Jesusasti sarakïnwa: “Chʼoqarapjjam, sarnaqarakpan” sasa (Juan 11:41-44).

Walja judionakaw Mariampiru Martampiru chuymachirejj jutapjjäna, jupanakat waljaniw Jesusan milagrop uñjasajj jupar creyiñ qalltapjjäna. Ukampis yaqhepanakajja, Jesusan milagropat fariseonakar yatiyiriw sarapjjäna. Fariseonakampi jilïr sacerdotenakampejja, Sanedrinankir jilïrinakampiw tantachasipjjäna. Caifás jachʼa sacerdotesa jupanakampi chikaw ukan tantachasirakïna. Jupanakat yaqhepajja, akham sapjjänwa: “¿Kamachañänisa? Aka jaqejj walja milagronakwa luri. Ukhamak jaytañäni ukhajja taqeniw jupar confiyapjjani, ukatjja romanonakaw jutasin lugarassa markassa aparapjjestani” sasa (Juan 11:47, 48). Jesusan milagronakap uñjirinakampi parlkasasa, Diosajj Jesús toqe milagronak luratapat yatkasasa Sanedrinankirinakajj janiw kusisipkänti. Antisas jupanak pachpatakwa llakisipjjäna, jilïrïñatwa apaqapjjestani sasaw llakisipjjäna.

Saduceonakajj jiwatat jaktañajj janiw utjkiti sasaw sapjjäna, ukhamajj Lazaron jaktatapajja jupanakatakejj janiw walïkänti. Caifás sutini saduceo jaqejj akham sänwa: “Jumanakajj janiw kunsa yatipktati, janirakiw amuyasipktasa, jumanakatakejj walïspawa mä sapa jaqen marka layku jiwañapajja, markpach tukjatäñat sipansa” sasa (Juan 11:49, 50; Hechos 5:17; 23:8).

Niyakejjay Caifasajj jachʼa jilïr sacerdotëchïnjja, Diosaw ukham arsuyäna “janiw pachpa amuyupat uk parlkänti”. Caifasajj religión pʼeqtʼirinakaru respetasipkakiñapataki ukhamarak autoridadanakarjam uñjasipkakiñapatakiw Jesusar jiwayañ munäna. Ukampis Caifasajj mä profecía arsuskäna, jaqenakar salvañatakiw Jesusajj jiwañapäna. Janiw judionak laykukejj jiwañapäkänti, jan ukasti Diosan wawanakapajj yaqha markanakan ananukutäpkäna ukanakar salvañatakiw jiwañaparakïna (Juan 11:51, 52).

Caifasajja Sanedrinankirinakarojj kunjamsa Jesusar jiwayapjjaspa uk parlakipapjjañapatakiw chʼamañchäna. Sanedrinankiri Nicodemo sutini jaqejja, Jesusan amigopänwa ukhamajj ¿Sanedrinankirinakan amtapjja Nicodemot Jesusar yatiypachäna? Cheqansa Jesusajj jupar jiwayañ amtapjjatap yatïna ukhajja, Jerusalenat sarjjänwa. Jiwayatäñataki Diosajj arskäna uka horasajj jan purinitap layku.