Éyoñe Yésus a tôbaneya Marthe ba Marie e fefele Béthanie, ba be be ba ke soñe Lazare. Soñ éte é ne mbas akôm, a akok e butu été yôp. Ane Yésus a jô na: “Tama va’an akok.” Mbôle Marie a nji wô’ô jam a kômbô bo, nye na: “A Tat, éyoñe ji a nga nyum; amu a wuya melu menyin.” Ve Yésus a jô nye na: “Ke me ate jô wo na, nge wo abuni, wo aye yen ngule Zambe?”​—Jean 11:39, 40.

Nde ba vaa akok. Ane Yésus a bete mise yôp a ye’elane na: “A Tat, ma ve wo akéva, amu ô wô’ôya ma. Me ma zu ma yeme na wo wô’ô ma kom ése, ma te kobô kobô ve asu ba bôtô a tele me mbôma’ane nyôl na be buni fo’o na wo fo’o ô nga lôme ma.” Meye’elane Yésus a bo bôt été ma liti bôte ba vô’ôlô nye na, jam a zu bo a zu de bo a ngule  Zambe. Éyoñe te a yôtane tyiñe yôp na: “A Lazare kui atan!” Ane Lazare a kui mo a mebo me too nka’an a bibabe biyé, ndombo é to nye ñyalan asu. Nde Yésus a jô na: “Ti’ane nye biôme nyôl, mi jô’é fe nye a ke.”​—Jean 11:41-44, Mfefé Nkôñelan.

Éyoñe ba yene jam ete, abui Bejuif da te zu volô Marie ba Marthe minlem ba buni Yésus. Ve ba bevo’o ba ke kañete Bepharisien jôme Yésus a te bo. Ajô te Bepharisien a bemie beprêtre ba mane sulane Sanhédrin, nda mejô Bejuif, na be bo ékôan. Beta prêtre, Caïphe, a ne fe ésulan éte. Ba bevo’o y’été ba jô na: “Bi bo aya? Amu môte nyô a bo aka’a beta be mam abui. Nge bi ajô’é nye nalé, wôna bôte bese be aye buni nye: a bôte ya Rome be aye zu tyam nlame wongan a bi ayoñe dangan.” (Jean 11:47, 48) Ja’a ba te wô’ ane bôte ba te zu jô na Yésus a bo “aka’a beta be mam abui,” be nji wô’ô mevak a mame Zambe a bo a zene ya be Yésus. Jame ba taté tele ôsu é ne éto a éjôé jap.

Ajô ya na Lazare a te wômô miñwuan é ne angôndô ya mbia jam asu besadducéen, mbe be nji buni ñwôman miñwuan. Caïphe, môt émien a ne mone Sadducéen a nyoñe nkobô a jô’ô na: “Mi nji fo’o yeme jam éziñ. Ye mia simesane ke na, e ne mia mfi nge môte wua wua nye a wu asu babôtô, a lôte na ngum ayoñe bôt ôse ô jañ?”​—Jean 11:49, 50, Mfefé Nkôñelan; Mam Minlôman 5:17; 23:8.

Caïphe a nji kobô nalé amu ‘fe’e jé émien,’ a ne Zambe nnye a tindi nye na a kuli bifia bite amu éto beta prêtre a bili. Caïphe a liti na, da sili na Yésus a wu asu na a bo teke ndamane éjôé a ngule betebe ôsu ya ñyebe Bejuif be bili. Da yené fo’o na, nkulan ajô Caïphe wu, wo liti na, a zene ya awu dé, Yésus a ye ve ntañ, sa ke ve asu Bejuif étam, “ve amu fe a ye kôane bone be Zambe be nga tyaman.”​—Jean 11:51, 52.

Caïphe a tôé ñsôñane wé na, a futi Sanhedrin ôsimesane ya bôndé fe’e ya wôé Yésus. Éko éziñ na, Nicodème, nyô a ne mvôé Yésus a zu nye kate jame te. Éyoñe te ébien, Yésus a kôlô Jérusalem, amu a nji yiane wu ôsusua na awolo Zambe a tyik da kpwaan.