Pengudah Jesus betemu enggau Marta seduai Maria semak Betani, sida mupuk ngagai kubur Lasarus. Kubur nya siti lubang gua ke ditutup ngena batu ti besai. Jesus madahka: “Baringka batu nya ke tisi.” Tang Marta irau laban iya enda nemu utai ke deka digaga Jesus. Ku iya: “Tuan, bangkai iya tentu udah bau but, laban iya udah mati empat hari.” Taja pia, Jesus madah ke iya: “Endaka aku udah madahka, enti nuan arap, nuan deka meda mulia Petara?”—John 11:39, 40.

Pengudah batu nya dibaringka, Jesus engkadah ke langit lalu besampi: “Apai, aku beterima kasih ngagai Nuan laban Nuan ningaka sampi aku. Aku nemu Nuan seruran ningaka sampi aku. Tang aku bejaku munyi nya ketegal  orang mayuh ke bediri ngelingi aku, ngambika sida arap Nuan meh ke udah ngirumka aku.” Sampi Jesus ngasuh orang nemu, utai ke deka digaga iya ulih nyadi ketegal kuasa ari Petara. Udah nya, Jesus ngangau enggau nyawa ti inggar: “Lasarus, pansut nuan!” Lasarus lalu pansut. Kaki, jari enggau mua iya agi dibalut ngena kain. Jesus madahka: “Buka kain nya ngambika iya ulih bejalai.”—John 11:41-44.

Mayuh orang Judah ke datai ngelantangka ati Maria enggau Marta meda kereja ajih tu, lalu arapka Jesus. Tang bisi sekeda ke bukai madahka utai tu ngagai orang Parisi. Pengudah sida ninga nya, orang Parisi enggau bala tuai imam begelumu ba Raban Kunsil Orang Judah. Dalam raban nya bisi Imam Besai Kaiapas. Sekeda ari sida mutap madahka: “Nama patut digaga kitai? Orang nya udah ngereja mayuh pengawa ajih? Enti kitai nejuka iya, semua orang deka arapka iya. Pengujung iya, orang Rome deka datai lalu ngerampas Rumah Sembiang sereta bansa kitai.” (John 11:47, 48) Taja pan sida udah ninga ari mayuh saksi ke meda Jesus “udah ngereja mayuh pengawa ajih,” tang sida ba Raban Kunsil Orang Judah enda gaga ati enggau utai ke udah dikereja Petara nengah Jesus. Tu ketegal, sida semina ngemeratka kuasa sereta penuduk sida empu.

Pengangkat Lasarus ari mati tusah diterima orang Saduki, laban sida enda pechaya harapan pengangkat ari mati. Tang Kaiapas, siku orang Saduki madahka: “Kita nadai nemu utai, endaka kita nemu, manah agi enti siku orang mati ke bansa kitai ari ke semua bansa kitai dipunaska.”—John 11:49, 50; Surat Kereja Rasul 5:17; 23:8.

Petara ngasuh Kaiapas bejaku munyi nya laban iya imam besai. Nyadi nya ukai “datai ari runding iya empu.” Kaiapas deka Jesus dibunuh ngambika iya enda ngachau kuasa sereta penuduk bala tuai pengarap orang Judah. Tang jaku benabi Kaiapas nunjukka, Jesus deka nyerahka diri nyadika tebus, ukai semina ke bansa Judah aja tang ke semua “bala anak Petara ke udah pambar ba mayuh endur.”—John 11:51, 52.

Kaiapas mujur ngasuh Raban Kunsil Orang Judah ngaga pelan kena munuh Jesus. Kati Nikodimus, siku ari Raban Kunsil Orang Judah ke bekaban enggau Jesus deka madahka pelan nya ngagai iya? Taja pia, Jesus mupuk ari Jerusalem lalu nyeliahka diri ngambika iya enda dibunuh sebedau maya ti udah ditetapka Petara.