Yesu byo asambakene Mata ne Maliya kwipi na Betani, bayile ku kilende ko bazhikile Lazalasa. Kino kilende kyajinga mu jiyengo ko babikile jibwe. Yesu waambile’mba: “Jalumunaiko jibwe.” Mata byo abujile kuyuka byakebelenga kuba Yesu, wamukainye. Waambile’mba: “Nkambo, pa kino kimye wafwainwa ubena kununka, mambo papita moba ana.” Bino Yesu wamwambijile’mba: “Nanchi kechi naji kukubuula namba umvwe waitabila usakumona lukumo lwa Lesa nenyi?”—Yoano 11:39, 40.

Onkao mambo, baalumwineko jibwe. Kepo Yesu atajile mwiulu ne kulomba amba: “Tata, nemusanchila bingi pa kuñumvwa. Nayuka namba, kimye kyonse muñumvwa; pakuba naamba bino na mambo a jino jibumba jaimana pano, pa kuba’mba betabile’mba mwantumine.” Yesu walombele pa  mvula bantu kuba’mba bayuke’mba kintu kyo akeba kuba usakwikyuba na bulume bwa Lesa. Kepo abijikile na jiwi ja peulu amba: “Lazalasa, lupukamo!” Lazalasa walupukilemo saka aji na bisapi byo bamupombele ku maulu ne ku maboko, ne pa meso bakashilepo bisapi. Yesu wibambijile’mba: “Mupombololai ayenga.”—Yoano 11:41-44.

Bayudea bavula baishile na kutekenesha Maliya ne Mata byo bamwene kino kya kukumya, bamwitabijile Yesu. Bino, bamo bayile na kubuula Bafaliseo byaubile Yesu. Ponkapo Bafaliseo ne bañanga bakatampe bakonkenejile pamo mu kije kikatampe kya Bayudea kya Saniedilini. Mu kino kije, mwajinga ñanga mwine mukatampe aye Kaifasa. Bamo bajilakene’mba: “Tusakuba byepi, mambo uno muntu ubena kuba bya kukumya byavula? Umvwe tumuleke, bantu bonse basakumwitabila kabiji bena Loma bakeya ne kwitwangata mpunzha yetu ne kisaka kyetu.” (Yoano 11:47, 48) Nangwa kya kuba baumvwine byaambile bantu bamwene Yesu na “kuba bya kukumya byavula,” bano banabalume kechi basekejilemo mu mingilo yaingijilenga Lesa kupichila mwi aye ne. Kintu kyo baakaminweko kyajinga bifulo byabo ne luusa lo bajinga nalo.

Basadusea kibashinkishe bingi bulaka Lazalasa byo asangwilwe mambo kechi baitabijile mu lusanguko ne. Kaifasa, wajinga Musadusea wibambijile’mba: “Anweba kafwako nangwa kimo kyo mwayuka ne, kabiji kechi mwayuka’mba kyawama muntu umo kufwila bantu kukila kisaka kyonse konaika ne.”—Yoano 11:49, 50; Byubilo 5:17; 23:8.

Na mambo a kifulo kikatampe kyo ajinga nakyo Kaifasa, Lesa ye wamulengejile kwamba bino, mambo “kechi wikyambile na milanguluko yanji mwine ne.” Kaifasa walumbulwilenga’mba Yesu bakamwipaya kuba’mba akabule kulubankanya bifulo ne luusa lwajinga na bantangi ba bupopweshi bwa Bayudea. Pano bino, Kaifasa waawile kuba’mba na mambo a lufu lwanji, Yesu ukapana nkuulo ya kukuula bonse “baana ba Lesa bapalañenejilemo,” kechi Bayudea bonkatu ne.—Yoano 11:51, 52.

Kaifasa walengejile ba mu Kije kya Saniedilini kukebapo mashinda a kwipayilamo Yesu. Nanchi Nikodema wa mu Kije kya Saniedilini wajinga mulunda ne Yesu wayile na kubuula Yesu kintu kyo bakebelenga kumuba nyi? Monse mo kyaikejile, Yesu wafumineko ku Yelusalema, kuchiina’mba bakamwipaya kimye kyatongwele Lesa saka kikyangye kufika.