Jesu hasaabonani ni Mareta ni Maria inze ali bukaufi ni munzi wa Betania, baliba kwa libita la Lazaro. Libita leo ki mukoti okwahezwi ka licwe fa munyako waona. Jesu ulaela kuli: “Hamuzwise licwe.” Mareta ubulela ka kubilaela, ka kusaziba zabata kueza Jesu. Ubulela kuli: “Mulena, nako ye mwendi sanunka, kakuli sekufitile mazazi amane.” Kono Jesu umubulelela kuli: “Kana nenisika kubulelela kuli haulumela ukabona kanya ya Mulimu?”—Joani 11:39, 40.

Ka mukwa ocwalo, bazwisa licwe. Cwale Jesu uinulela meeto kwa lihalimu ni kulapela kuli: “Ndate, naitumela ku wena kakuli uniutwile. Ki niti, neniziba kuli waniutwanga kamita; kono nibulezi cwalo kabakala buñata bobu nipotolohile, kuli bulumele kuli ki wena yanilumile.”  Jesu halapela fa nyangela, ubonisa batu babaliteñi fo kuli zaatuha aeza ulieza ka maata azwa ku Mulimu. Jesu kihona ahuwa ka linzwi lelituna, uli: “Lazaro, zwa mo!” Mi Lazaro uzwa mwa libita, inze atatilwe masila fa mubili kaufela ni kwa pata. Jesu uli: “Hamu mutatulule mi mumulisele azamaye.”—Joani 11:41-44.

Majuda babañata babatile kuto omba-omba Maria ni Mareta babona makazo ye mi baba ni tumelo ku Jesu. Kono babañwi baya ni kuyo bulelela Bafalisi zaezize Jesu. Bafalisi ni baprisita babahulu bakopana hamoho mwa kuta yetuna ya Majuda, yona Sanhedrini. Mwa kuta mo, kunani muprisita yapahami, yena Kayafa. Babañwi ku bona bali: “Lukaezañi, kakuli mutu yo ueza limakazo zeñata? Haiba lumutuhelela feela cwana, batu kaufela bakaba ni tumelo ku yena, mi Maroma bakataha ni kuto luamuha sibaka saluna ni sicaba saluna.” (Joani 11:47, 48) Nihaike kuli baikutwezi kwa lipaki zeiponezi Jesu inze aeza “limakazo zeñata,” baana ba habatabiswi ki zasweli kueza Mulimu ka Jesu. Babilaela feela litulo ni maata a bona.

Kuzuswa kwa Lazaro kwa bafu kuswabisa hahulu Basaduki babasa lumeli kuli kunani zuho ya bafu. Kayafa, yali Musaduki, cwale ubulela kuli: “Hakuna semuziba nihanyinyani, mi hamulemuhi kuli sesinde ku mina kikuli mutu alimuñwi ashwele batu kufita kuli sicaba kaufela siyundiswe.”—Joani 11:49, 50; Likezo 5:17; 23:8.

Mulimu utahisa kuli Kayafa abulele manzwi ao bakeñisa situlo sahae, kakuli ‘haaipuleleli feela zeo ka ili yena.’ Kayafa utalusa kuli Jesu abulaiwe ilikuli asike azwelapili kunyinyafaza maata ni kukuezo ya babahulu ba bulapeli bwa Sijuda. Kono bupolofita bwa Kayafa butalusa kuli lifu la Jesu likatahisa tiululo, isiñi feela yeliulula Majuda kono ya ‘bana ba Mulimu kaufela bane bahasani.’—Joani 11:51, 52.

Kayafa utahisa kuli ba kuta ya Sanhedrini balele za kubulaya Jesu. Kana Nekudema yali mulikanaa Jesu, uka mutaluseza zebalela kueza ku yena? Kono Jesu kapili-pili uzwa mwa libaka zeli bukaufi ni Jerusalema, ilikuli asike abulaiwa pili nako yatomile Mulimu isika fita kale.